خطبة اخويا
خطبة اخويا
في خطبة اخويا الصغير اول ما اديت النقوط لعروسته قالت له هيه اختك اللي مكملتش تعليمها دي بتجيب كل المبالغ دي منين ؟ يا خوفي لتكون الفلوس دي شمال ولا داخلة من سكة مش هي!
ده االي حصل في خطوبه اخويا وقدامه دمي غلي في عروقي، بس أخويا محمود أول ما شاف وشي قلب ألوان، دخل يطفي النار وقال بصوت واطي
يا نورا، معلش.. دي شيري دبش شوية وصريحة، متخديش على كلامها.
مبقتش طايقة القعدة، قمت دخلت الحمام أغسل وشي وأهدى، وفجأة سمعت صوتها من ورا الباب وهي بتهلفط مع صحباتها
شوفتوا اللبس؟ كات ومكياج كلها حاجات غاليه.. باينة أوي يعني شغالة إيه! دي من بتوع النايت كلوب واللي زيهم.
وتقولك هشتري لأخويا شقة؟ واحدة معاها دبلوم تجارة هتجيب تمن شقة منين؟ أكيد مفيش غير السكك الواطية والنوم في حضن العواجيز!
إحنا بتوع حكومة ومناصب، مينفعش نلمس القرش الحرام ده أبداً.
سمعت الكلام والضحك المكتوم، وضحكت بس بوجع.. يعني البنت اللي تعبت وشقيت وبنت نفسها بمجهودها، لازم تبقى ماشية بطال؟
طلعت موبايلي وكلمت السمسار فوراً
بقولك إيه يا أستاذ سيد.. موضوع شقة العريس ده انساه، أنا صرفت نظر.
وقفت ورا الباب، سانده ضهري
على الحيطة، وكلام شيري بيرن في ودني زي الجرس. والسمسار على الناحية التانية بيحاول يغريني
يا ست نورا، ده صاحب الشقة نزل لي في تمنها 100 ألف جنيه عشان خاطر عيونك، والمنطقة شياكة وتليق بيكي!
قولتلك قفلنا الموضوع يا أستاذ سيد، سلام.
قفلت السكة، خدت نفس طويل ودخلت الأوضة عليهم.
الضحك انقطع فجأة. شيري كانت قاعدة جنب أخويا محمود وبصت لي من فوق لتحت باحتقار مقرف. وأمي كانت قاعدة على رأس التربيزة، وشها جايب ألوان وساكتة.
قعدت مكاني، راحت الست الموظفة فاتحة بوقها تاني
يا نورا، متزعليش مني لو كلامي كان دبش شوية، أنا قلبي أبيض.
سكتت شوية وكملت أنا بس خايفة عليكي، إنتي بنت ومعاكيش غير دبلوم، والدنيا برا صعبة.. خفي المكياج واللبس ده شوية عشان الناس متفهمكيش غلط.
بصيت في عينيها بكل قوة يفهموا إيه يا حبيبتي؟
يعني شكلك النهاردة.. لو حد من زمايلي في المصلحة شافك، هيفتكروا إن أخت محمود شغالة شغلانة كده ولا كده.
ضحكت ببرود وطبطبت على إيد أخويا أنا بشتغل في مكان حساس، والوسط بتاعنا بيحاسب على المظهر والبرستيج أوي.
أخويا محمود نزل راسه في الطبق، وبدل ما ينطق بكلمة حق، بص لها بابتسامة صفراء
وقال
يا نورا، شيري متقصدش، هي بس واخدة على نظام الشغل والميري.
حسيت إني عايزة أرجع من كتر القرف.. بقى ده أخويا اللي شيلته على كتافي؟
أمي اتدخلت أخيراً وقالت بصوت واطي
خلاص يا بنتي، حصل خير.. وشيري عندها حق برضه، ابقي خدي بالك من لبسك بعد كده.
جيت أتكلم، راحت أمي قرصتني في إيدي وهمست في ودني
بوسي إيدك وش وضهر إن أخوكي لقى واحدة موظفة وحلوة كده! إنتي يدوب معاكي دبلوم وهي خريجة جامعة ومعاها كادر.. يعني مش من توبنا أصلاً، استحملي عشان المركب تسير.
شربت بق مية وسكتت خالص. شيري شالت المظروف من على التربيزة وهي بتقول بمنتهى التناحة
أنا هاخد النقوط ده يا نورا ومش هكسفك.. أهي مساعدة وخلاص، مهما كان مصدرها.
الخطوبة خلصت والناس مشيت. جيت أطلب أوبر عشان أرجع الفندق، أمي سحبتني من إيدي وراحت بيا في ركن بعيد.
استني يا نورا.. قوليلي، الفلوس اللي كنتي شايلاها لشقة أخوكي جاهزة؟
قلت لها بجمود يا أمي أنا بلغت السمسار خلاص، مفيش شقق.
أمي عينيها طلعت لبرة نعم يا اختي؟! يعني إيه؟ ده إنتي واعدة أخوكي!
كنت واعدة محمود أخويا السند، مش محمود اللي خطيبته بتهين أخته قدام الغريب والقريب وهو حاطط
لسان في بوقه! بتقول عليا ماشية مع عواجيز وفلوسي حرام وهو بيضحك لها! تفتكري لسه يستاهل مليم من شقاي؟
وش أمي اتغير.. مش ندم، لا، ده قلب لوش اللوم اللي حافظاه
يا بنتي كبري عقلك، هي لسانها طويل شوية، خليكي إنتي الكبيرة.
أبقى الكبيرة وهي بتقول عليا بنت ؟
ما هو بصراحة يا نورا، لبسك ومكياجك يخلي اللي ميعرفش يظن.. فمتلوميش غير نفسك!
وقفت مذهولة إنتي بتقولي إيه يا أمي؟ إنتي عارفة الكلام ده معناه إيه؟
بقول مصلحة أخوكي! محمود صدق لقى لقطة موظفة حكومة ترفعه لفوق، وإنتي بجهلك ده عايزة تبوظي الجوازة عشان كلمة اتقالت في ساعة غضب؟تابعوا صفحة محمد السبكي للقصص والروايات الحصريه
تتحرق الجوازة على اللي فيها.
ده أخوكي! أبوكي مات وسابه لحمنا، لو إنتي مشلتهوش مين هيشيله؟
أمي بدأت تعيط.. السلاح الفتاك اللي بتستخدمه من وإنا عيلة صغيرة.
افتكرت لما قالت لي وإنا في ثانوي يا نورا إنتي بنت، قعدتك في البيت أحسن، انزلي اشتغلي وجهزي أخوكي.
وفعلاً، 10 سنين من عمري ضاعوا.. مصاريف جامعته، وتمن عربيته، وإيجار شقته، كله كان من عرق جبيني.
وفي الآخر آخد إيه؟ مع عواجيز من خطيبته، ولبسك هو السبب من أمي.
في اللحظة دي محمود وشيري وصلوا عندنا.
محمود كشر وقال برضه يا نورا بتزعلي أمي وتخليها تعيط؟
شيري وقفت وراه وقالت ببرود خلاص يا حودة، متلومهاش، اللي معاهم دبلوم دول بيبقوا بيئة وميعرفوش في الأصول أوي.
تاني يوم الصبح، تليفوني ميسكتش.
أول مكالمة من عمتي نورا يا بنتي.. هي شيري بتقول إيه؟ بتقول إن فلوسك مش تمام؟
وإنتي مصدقة يا عمتي؟
أنا مش عايزة أصدق، بس بتقول معاها صور ليكي في فنادق وطائرات ومعاكي رجالة غريبة.. يا بنتي قوليلي الحقيقة، بتشتغلي إيه؟
قفلت السكة، ودقيقتين وعمي كلمني يا نورا، إحنا عيلة محافظة، وأخوكي عريس لقطة لموظفة محترمة، مش عايزين فضايح.. لو السكة اللي ماشية فيها دي هتجرسنا، ابعدي عننا أحسن.
المكالمة الرابعة كانت من محمود نورا، امسحي الصور اللي على صفحتك فوراً.
صور إيه؟
صور الفنادق والفساتين ال سواريه دي.. شيري بتقول العيلة بدأت تتكلم.
ضحكت بصوت عالي يعني الهانم شيري هي اللي لفت على صوري وبعتتها للعيلة كلها وقعدت تألف قصص؟
محمود سكت شوية هي عملت كده بحسن نية، خايفة على سمعتنا.
حسن نية؟ بتشهر بيا وبتقول عليا شمال وبتشيش العيلة عليا وتقولي حسن نية؟
يا نورا اهدي، هي بس بتقول لو بتشتغلي شغلانة شريفة قولي هي إيه وريحينا!
شيري خدت منه السماعة وقالت بصي يا
حبيبتي، أنا موظفة وليا وضعي، ومش هسمح لسمعة أخت جوزي تبوظ برستيجي.. لو عندك شغلانة محترمة وضحيها في جروب العيلة عشان نصدق، لو مفيش.. يبقى السكوت أحسن ليكي ولينا.
قفلت السكة في وشها من غير ولا كلمة.
فتحت الموبايل، وعملت خروج من جروب العيلة بتاع آل التهامي واللي عملته بعدها صدمهم كلهم
فتحت الموبايل، وبأيد ثابتة عملت خروج من جروب العيلة.. الجروب اللي كان فيه أشباه رجال وستات ملهومش لازمة غير القيل والقال. بصيت لنفسي في المراية، مسحت دموعي، وقلت خلاص يا نورا، وقت الطيبة والتضحية خلص، جه وقت الوجع الحقيقي.
دخلت الأوضة عليهم، كان محمود قاعد حاطط رجل على رجل وشيري بتوزع ابتسامات النصر، وأمي بتبص لي برجاء إني أسكت.
وقفت في نص الصالة وقلت بصوت هادي ومرعب
محمود، المظروف اللي في إيد خطيبتك ده فيه 50 ألف جنيه، ده نقوط مني ليها.. هاته حالا.
شيري ضحكت باستفزاز جرى إيه يا نورا؟ الكلمتين بتوع امبارح وجعوكِ؟ إحنا مش شحاتين يا حبيبتي، بس ده حق أخوكي.
بصيت لها من فوق لتحت وقلت الحق هو اللي هتاخديه دلوقتي. طلعت موبايلي وفتحت صفحتي الموثقة روايات نورا.. الصفحة اللي عليها 100 ألف متابع وعلامة
زرقاء، ووريتها لمحمود.
شايف يا محمود؟ دي الصفحة اللي بتجيب لي في الشهر أضعاف مرتبك ومرتب الست الموظفة بتاعتك لسنين قدام.. دي السكة الشمال اللي بتكتب قصص واقعية عن ناس واطية زيك وزيها.
محمود اتصدم، وتنح وهو بيقرأ اسمي والتوثيق، شيري وشها جاب ألوان وحاولت تتكلم بس قطعتها
الصور اللي بعتيها لعمتي وعمي، دي صور تكريمي في دبي وفي المعرض الدولي للكتاب.. الرجالة اللي واقفة جنبي دول أكبر ناشرين في الوطن العربي، مش عواجيز يا أم كادر وظيفي!
لفيت لمحمود اللي كان لسه مصدوم
أستاذ سيد السمسار كلمني تاني.. الشقة اللي كان المفروض تكون عشك، أنا اشتريتها فعلاً، بس باسمي أنا.. وهنقل فيها أمي النهاردة. أما إنت يا حودة، فليك عندي مفاجأة.
طلعت ورقة من شنطتي ورميتها في وشه دي قائمة بكل مليم صرفته عليك من يوم ما سيبت تعليمي.. مصاريف جامعتك، قسط عربيتك، حتى بدلة الخطوبة اللي إنت لابسها دي من شقايا. قدامك 24 ساعة ترجع لي كل المبالغ دي، وإلا الوصلات اللي معايا هتروح للنيابة.. ومظنش المصلحة الحكومية هتقبل بموظف عليه أحكام تبديد.
شيري بدأت تصرخ إنتي بتهددينا؟ إحنا بتوع حكومة!
ضحكت ببرود إنتي بالذات يا
شيري، البوست اللي نزل دلوقتي على صفحتي فيه سكرين شوت لكلامك وتسجيلات صوتك وإنتي بتنهشي في عرضي.. ال 100 ألف متابع بتوعي هيقوموا بالواجب مع سمعتك في منطقتك وفي شغلك، عشان الكل يعرف الأصول اللي بتنادي بيها.تابعوا صفحة محمد السبكي للقصص والروايات الحصريه
أمي بدأت تصوت يا بنتي حرام عليكي، هتخربي بيت أخوكي!
بصيت لأمي بوجع وقلت بيته اتخرب يوم ما سكت وأنا بتشتم قدامه.. يوم ما قولتِ لي استحملي عشان هو لقى لقطة. أنا اللقطة يا أمي، أنا اللي كنت شايلة البيت ده على كتافي، والنهاردة الشيلة دي هتقع على دماغ اللي ميقدرهاش.
محمود حاول يمسك إيدي وهو بيترعش نورا، أنا أسف.. والله مكنت أقصد، شيري هي اللي...
نفضت إيده بقرف شيري هي اختيارك، اشبع بيها في الشارع.. الشقة دي إيجارها هيخلص بكرة، وأنا مش هجدد.. وروني بقى الميري هيسكنكم فين.
أخدت شنطتي وطلعت، ركبت عربيتي وأنا حاسة إني اتولدت من جديد. قفلت تليفوني في وش محايلات عمتي وعمي اللي بدأوا يفهموا إن بنت الليل اللي اتهموها، هي الوحيدة اللي كانت فاتحة بيوتهم بصداقاتها ومعوناتها.
سيبتهم كلهم في الصدمة، ورحت الفندق بتاعي.. حجزت جناح ملكي، وفتحت اللابتوب وبدأت أكتب أول سطر في روايتي الجديدة جحود الدم.. حينما تبيعك عائلتك بسعر موظفة
تعليقات
إرسال تعليق