رواية احببت نصابا الفصل الأول والثاني بقلم نسرين بلعجيلي حصريه في مدونة قصر الروايات
رواية احببت نصابا الفصل الأول والثاني بقلم نسرين بلعجيلي حصريه في مدونة قصر الروايات
الحلقة 1...
وقت الغروب، كانت نور تجلس في مقهى على ضفاف النيل، تتأمل لوحة السماء وهي تتزين بألوان المغيب، وتسرح في جمال خلق الله بين السماء والأرض، ولسانها يلهج بالإستغفار.
حتى جاءت صديقتها فيروز...
فيروز : حبيبة قلبي، وحشتيني جدًا جدًا.
قامت نور واحتضنتها بكل لهفة وشوق.
نور : إنتِ كمان وحشتيني جدًا جدًا.
وبعدما قعدوا مع بعض، طلبوا عصير فراولة وليمون بالنعناع. الجو كان هادي، نسمة الهوا جايّة من فوق النيل، وصوت المراكب بيعدي ببطء.
فيروز : عاملة إيه يا نور؟ شكلك متغيّرة شوية.
إبتسمت نور إبتسامة فيها حزن خفيف، وغمست نظرها في الكوب قدامها.
نور : ماعرفش يا فيروز، يمكن الدنيا تقلت عليّا شوية. ساعات بحس إني تعبت من كتر التفكير.
فيروز : (مسكت إيدها) يا بنتي إنتِ أقوى من كده بكتير. فاكرة زمان لما كنتي دايمًا بتقوليلي: "مفيش حاجة تكسر البني آدم طول ما هو قريب من ربنا"؟
اتسعت عيون نور شوية والدمعة لمعت فيها.
نور : فعلاً، هو ده اللي مخليني واقفة. لو مش بإيماني، كان زماني وقعت من بدري.
سكتوا لحظة، والهدوء غلّف المكان غير صوت الميّه وهي بتخبط في حافة الكورنيش.
فيروز : طب قوليلي، إيه اللي مضايقك بالظبط؟ يمكن لو حكيتِ تفضفضي ترتاحي.
تنهدت نور ورفعت راسها للسماء.
نور : حكاية طويلة يا فيروز، يمكن تكون بداية جديدة أو يمكن تكون مجرد امتحان تاني من ربنا. قوليلي بقا إنت حكايتك إيه؟ أنا بعد ما سافرت قفلت على العالم كله.
جلست فيروز وقد ظهر على ملامحها خليط من الحزن والتعب، أخذت نفسًا عميقًا، ثم بدأت تحكي.
فيروز : عارفة يا نور، أنا كنت زيك بالظبط يوم من الأيام، اتعلقت بواحد إفتكرته هيبقى سندي وضهري. كنت باصدّق كل كلمة بيقولها، كل حلم بيرسمه قدامي. لدرجة إني ما كنتش بشوف غير الصورة اللي هو عايزني أشوفها.
نور : (بحنان) وبعدين يا فيروز؟
فيروز : في الآخر اكتشفت إنه نصاب. كان بيستغلني، ياخذ مني فلوس بحجج واهية، مرّة يقول شغل، ومرّة يقول عليه ديون، ومرّة ظروف طارئة. وأنا، بقلبي الطيب، كنت مصدّقة. كنت فاكرة إني باسنده، وإنه هيقف على رجليه ويرجعلي كل حاجة.
سكتت لحظة ومسحت دمعة نزلت على خدها.
فيروز : بس الحقيقة كانت صدمة. إكتشفت إن النصب مش بس في الفلوس، النصب الحقيقي كان في المشاعر، في الثقة اللي اديتها له، وفي العمر اللي راح على أوهام.
نور : (تشد على إيدها) يا حبيبتي، إنتِ قوية، واللي حصل ده ما يقللش منك أبداً.
فيروز : عارفة يا نور، الوجع مش إني خسرت فلوس. الوجع الحقيقي إني حسيت نفسي مغفّلة، إني صدّقت الكذب، لكن اتعلمت. ربنا نجّاني في الوقت المناسب، يمكن علشان أفتح عيني وأعرف إن مش أي حد يستاهل يدخل حياتي أو ياخذ ثقتي.
نور : بصّي يا فيروز، اللي حصل ليا يمكن يكون أكتر منك. اللي حصل ليا قلب كياني وحياتي، وخلّاني أكره نفسي. ما إنتِ عشتِ شوية معايا، إيه اللي خلاكِ توقعي الوقعة السودة دي؟
فيروز : لا لا… إنتِ كنتِ وسط مافيا، ده ربنا نجّاكي بأعجوبة.
نور : علشان نيّتي كانت كويسة وربنا عالم ما في القلوب. مين ده؟ وإمتى حصل ده؟
رجعت فيروز بظهرها على الكرسي وقالت : إنتِ ما تعرفهوش. بعد ما سافرتي والبنات كل واحدة انشغلت بحياتها، وأصلًا، الله ياخذه، كان السبب إن شلتنا تتفشكل، وقعت الوقعة دي.
إتنهدت فيروز، وبصّت في الكوباية اللي قدامها من غير ما تشرب.
فيروز : جه في وقت كنت ضعيفة فيه. كنت محتاجة كلمة حلوة، حضن أمان، أي حاجة تطبطب على روحي. إستغل ده… دخل حياتي بالهداوة، بالكلام المعسول. خلاني أصدّق إني لقيت الراجل الصح.
نور (متحمسة تعرف) : وبعدين؟
فيروز : بدأ يطلب حاجات صغيرة: "سلفيني لحد آخر الشهر"، "ظرف طارئ"، "شغل واقف". وأنا يا بنتي كنت بقول لنفسي: عادي، الحبايب بيشيلوا عن بعض. لحد ما لقيت نفسي غرقانة، فلوسي راحت، وقلبي إنكسر.
نور (بصوت كله حزن) : يا حبيبتي، إنتِ زيي بالظبط. نفس الأسلوب، نفس الكذب، نفس الوجع.
فيروز : الفرق الوحيد يا نور إن أنا لسه بقاوم أثاره لحد النهارده. إنتِ قوية أكتر. شُفتِ الكابوس من أوله، وربنا كشفه قدامك.
سكتت نور لحظة، وبصّت في عيونها بثبات.
نور : عارفة يا فيروز، إحنا مش ضحايا. إحنا ناجيات. اللي اتاخذ مننا مش خسارة، ده درس. واللي يوجعنا النهارده، هيبقى سلاحنا بكرة.
فيروز (ابتسمت والدموع في عينيها) : عندك حق. يمكن ربنا كتب لينا الطريق ده علشان نعرف نِقيم اللي يستاهل.
مدّت نور إيدها، ومسكت إيد صاحبتها بقوة.
نور : وإحنا مع بعض مش هنسمح لحد يكسّرنا تاني.
نور : بس لسه مش عارفة إزاي حصل فيك كده وإنتِ أكثر واحدة فينا كنتِ واعية.
فيروز : ما أنا قولتلك، كنت في وقت ضعيفة فيه. إتخطبت له، كله كان صالونات. في الأول كان كويس معايا، وكنا بنجهّز الشقة، وهنا ابتدت الحكاية.
– "حاسبي إنتِ العمّال، إدّفعي لحد ما أديكي."
وفي خلال ست شهور الشقة جهزت كلها من فلوس الورث اللي سابه بابا. وبعدها بدأ يتلكّك، كل شوية خناقة، كل شوية مشكلة، بس علشان يطفّشني. وأنا كنت مستحمّلة، ما أنا اللي دافعة فلوسي. في الأول كنت بقول يمكن ضغوط، يمكن مشاكل عادية بتحصل بين أي إثنين مخطوبين. كنت بابلع وأعدّي عشان ما يبانش إني فشلت أو إني مستعجلة. بس الصدمة جات لما عرفت إنه أصلاً كان مخطوب قبل كده، وعايش نفس الدور مع البنت اللي قبلي، نفس السيناريو. ياخذ فلوس، يجهّز الشقة، وبعدين يقلب ويعمل مشاكل لحد ما يطفّشها.
نور : (مصدومة) يعني الموضوع كان متخطط له؟
فيروز : أيوه يا نور. إتضح إنه واخذها مهنة. نصّاب بوش راجل محترم. وأنا كنت عايشة الوهم، فاكرة نفسي بحقق حلمي. وفي الآخر… فلوس بابا ضاعت، وكرامتي اتجرحت، وقلبي اتكسَر.
سكتت شوية ومسحت دموعها...
فيروز : أكثر حاجة وجعتني مش الفلوس، اللي وجعني إني كنت فاكرة نفسي ذكية وواعية. بس اتضح إني في لحظة ضعف، سلمت قلبي وعقلي لشخص ما يستاهلش.
شدّت نور على يد صديقتها بقوة، ونظرت في عينيها بثبات، ثم قالت.
نور : بصّي يا فيروز، إنتِ ما تتعبيش نفسك باللوم. كلنا في لحظة ضعف ممكن نغلط. بس عارفة الفرق؟ إنك قمتي على رجليك تاني. إنتِ ما استسلمتيش.
أطرقت فيروز برأسها، وقالت بصوت مكسور.
فيروز : بس خسرت كثير يا نور.
ابتسمت نور بحنان، وأجابت بهدوء.
نور : الخسارة الحقيقية مش في الفلوس، الخسارة إننا نسمح للي أذانا يخلينا نعيش مكسورين. إنتِ دلوقتي عندك درس، عندك وعي، وعندك قوة. اللي راح، ربنا يعوّضك عنه أضعاف.
ارتسمت ابتسامة خفيفة على وجه فيروز، رغم أن الدموع ما زالت تلمع في عينيها.
فيروز : كلامك بيهون عليّا كثير.
فربّتت نور على يدها، وأكملت بنبرة واثقة..
نور : خلي التجربة دي علامة في حياتك، مش جرح. كل مرة تبصي وراكِ، إفتكري إنك مشيتِ وسط النار، وربنا طلّعك منها واقفة على رجلك. ومحدش بعد كده هيعرف يضحك عليكِ.
زفرت فيروز تنهيدة ارتياح، كأنها تخلّصت من حمل ثقيل كان يثقل صدرها، ثم قالت.
فيروز : عندك حق يا نور، يمكن التجربة دي كانت علشان أتعلم أقيّم نفسي أكثر، وأعرف إن أنا أستاهل أحسن بكثير.
وبينما كان الغروب يزداد جمالًا، تلونت السماء بدرجات برتقالية وأرجوانية تنعكس على صفحة النيل الهادئة. مدت نور يدها من جديد، فأمسكت فيروز بها بقوة أكبر هذه المرة. تبادلتا نظرات صافية مليئة بالعزم، كأنهما تعاهدتا في صمت ألا يسمحا لأحد بعد اليوم أن يكسرهما.
وقفَتا معًا أمام النهر، والهواء العليل يلفح وجهيهما، كأن الطبيعة كلها تشهد على بداية صفحة جديدة في حياتهما. إبتسمت نور إبتسامة واثقة، وهمست...
نور : من النهارده مافيش رجوع لورا.
إبتسمت فيروز بدورها، وردّت بصوت ثابت..
فيروز : ومن النهارده مافيش حد يقدر يضحك علينا تاني.
وبين ضحكة امتزجت بالدموع، عانقتهما لحظة الغروب كأنها تمنحهما قوة إضافية، ليبدآ معًا فصلًا جديدًا من حياتهما، أكثر وعيًا، وأكثر صلابة.
عادت نور إلى بيتها القديم، أضاءت المصباح، وبغير إرادتها بدأت الذكريات تتدفّق إليها، حتى سالت دمعة من عينيها من غير أن تشعر.
جلست على الأريكة، وأخذتها ذاكرتها إلى الوراء، خمس سنوات مضت… إلى اللحظة التي بدأت فيها قصتها مع رياض.
**فلاش باك…**
كانت نور يومها في إحدى الأمسيات الصيفية، تجلس مع صديقتها في مقهى صغير على كورنيش النيل. الجو كان مليئًا بالحياة، والهواء يحمل نسمات خفيفة.
وبين ضحكات الجالسين وحديثهم، لفت نظرها شاب أنيق دخل المقهى بخطوات واثقة. تبادل النظرات مع نور للحظة قصيرة، ثم ابتسم إبتسامة هادئة قبل أن يتوجّه إلى الطاولة المجاورة.
إقترب بعد قليل، وقال بصوت منخفض فيه ودّ.
رياض : مساء الخير، ينفع أقعد هنا ولا الكرسي محجوز؟
رفعت نور عينيها بتردد، ثم ابتسمت بخجل..
نور : لأ، اتفضل، الكرسي فاضي.
جلس رياض، وأخذ الحوار بينهما يتدرّج بخفة، من جملة عابرة إلى حديث أطول. ومع كل كلمة، كانت تشعر أن القدر يفتح أمامها بابًا جديدًا لم تكن تتوقعه.
رياض (مبتسما) : واضح إنكِ بتحبي الهدوء، طول الوقت مركّزة في البحر ومش واخدة بالك من الدنيا حواليك.
نور (ابتسمت بخجل) : أيوه، البحر بالنسبة لي أمان، بيخليني أرتاح.
رياض : عندك حق، البحر عمره ما بيكذب، بيكشف كل حاجة، حتى الموجة لو صغيرة بتبان. يمكن عشان كده أنا بحبه زيك.
نظرت إليه نور بدهشة؛ لم تتوقع أن تجد في كلماته صدى لمشاعرها. ومع مرور الدقائق، أخذ الحديث بينهما يمتد: عن الدراسة، عن أحلامها الصغيرة، وعن شغفها بالكتابة.
كان رياض يستمع باهتمام شديد، يعلّق على كل كلمة بعبارات تشجيع، حتى جعلها تشعر أنها مميّزة.
رياض : بصراحة، مش أي بنت تكلّمني كده وتشدني. إنتِ مختلفة يا نور، فيكِ حاجة بتخلي الواحد يصدق إن الدنيا لسه فيها نقاء.
تورد وجه نور، وشعرت لأول مرة منذ زمن بعيد أن أحدًا يرى داخلها بصدق.
ومن تلك اللحظة، بدأت الثقة تُزرع بينهما، بذرة صغيرة، لكنها كانت كافية لتفتح أبواب قصة لم تتوقعها.
في اليوم التالي، وبينما كانت نور تسير على الكورنيش متجهة إلى نفس المقهى، فوجئت بصوت مألوف يناديها من بعيد.
رياض (مبتسم وهو يلوّح) : هو ده حظ ولا صدفة جميلة؟!
إبتسمت بخجل...
نور : شكلك بتحب المكان زيي.
جلسا سويًا من جديد، وابتدأ الحديث هذه المرة أكثر قربًا. تكلّما عن العمل، وعن تفاصيل الحياة اليومية. كان رياض يطرح أسئلته بذكاء، كأنه يحاول التعرّف على أعماقها أكثر.
وبعد لحظة صمت قصيرة، نظرت نور إلى فنجان القهوة أمامها، ثم قالت بصوت خافت..
نور : لازم أكون صريحة معاك من البداية يا رياض، أنا أرملة.
إرتجف قلبها وهي تنطق الكلمة، وكأنها تعيد فتح جرح قديم. حاولت أن تبدو ثابتة، لكن الخوف من ردة فعله كان ينهش صدرها.
توقف رياض عن الكلام للحظة، ثم رفع حاجبيه بدهشة خفيفة..
رياض : أرملة؟!
نور (أومأت برأسها، والدمعة تلمع في عينها) : أيوه، وجوزي الله يرحمه مات من خمس سنين، وعندي بنت صغيرة هي كل حياتي.
ساد صمت قصير، قلب نور يخفق بقوة، ثم قطع رياض السكون بابتسامة فيها دفء مصطنع
رياض : بالعكس يا نور، ده يخليني أحترمك أكتر. تخيلي قد إيه إنتِ قوية علشان تكملي حياتك وتربي بنتك. مش أي حد يقدر يعمل كده.
شعرت نور أن كلمات رياض تنزل على قلبها كبلسم، وكأنها أخيرًا وجدت من يسمعها بلا حكم أو شفقة.
شعرت نور بدمعة تحرق مقلتيها، لكنها أخفتها سريعًا. لم تكن متأكدة إن كان عليها أن تصدّق حنانه، لكن في تلك اللحظة، كان قلبها في أمسّ الحاجة إلى كلمة طيبة، حتى لو كانت وهمًا.
**احببت نصابا**
بقلم نسرين بلعجيلي
الحلقه 2
عادت نور إلى بيتها تلك الليلة، وخطواتها متثاقلة كأنها تحمل ثِقَل ما دار من حديث. أغلقت الباب خلفها، وأسندت ظهرها إليه، ثم أطلقت زفرة طويلة خرجت من أعماقها.
تقدمت ببطء نحو غرفة المعيشة، وجلست على الأريكة، تضع يدها على صدرها محاولة تهدئة خفقات قلبها.
نور (تهمس لنفسها) : يا ترى كلامه حقيقي؟ ولا أنا عشان محتاجة كلمة حلوة صدقت أي حاجة؟
أمسكت هاتفها تتردّد بين أن تنتظر رسالة منه أو تتجاهل الأمر. وفي أعماقها كان هناك صوتان يتصارعان، أحدهما يخبرها أنها وجدت رجلًا قدّر ظروفها، والآخر يحذرها من أن يكون مجرد سراب جديد.
رفعت رأسها إلى صورة صغيرة لابنتها على الحائط، وعيناها تلمعان بالدموع..
نور : يا رب… أنا مش عايزة غير الأمان. مش عايزة أرجع أوجع نفسي تاني، ولا أوجعها.
وبين الحنين والوجل، غفت عيناها وهي لا تدري إن كانت بداية طريق جديد أم بداية جرح آخر ينتظرها.
في صباح اليوم التالي، وبينما كانت نور تحضّر فطورها على عجل قبل أن توقظ إبنتها للمدرسة، رنّ هاتفها. نظرت إلى الشاشة فوجدت رقمًا غير مسجَّل. ترددت لحظة، ثم أجابت.
جاءها صوته هادئًا، مألوفًا رغم قِصر معرفتها به.
رياض : صباح الخير يا نور، أنا رياض. معلش لو صحّيتك.
إبتسمت بلا وعي، لكن قلبها انقبض في الوقت نفسه.
نور : لأ لأ، أنا صحيت بدري. إزيك؟
رياض : الحمد لله، بس حبيت أطمن عليكِ. بصراحة من امبارح وأنا حاسس إني عايز أكلمك تاني.
صمتت نور للحظة، تتأمل وقع كلماته على قلبها. كان فيها صدق يشدّها، وفيها أيضًا ما يثير الخوف بداخلها.
نور : (بتردد) شكراً يا رياض، بس هو مش بدري شوية على المكالمات دي؟
ضحك بخفة...
رياض : يمكن، بس أنا حاسس إننا مش غرب عن بعض. وأهو، لو مضايقاكِ مش هاتصل تاني.
شعرت نور بخيط رفيع من الطمأنينة، وكأنها تملك القرار، لكنها لم تستطع إنكار ارتياحها لصوته.
نور : لأ مش مضايقاني، بالعكس.
رياض : طب حلو، يبقى نتقابل قريب تاني. أنا عندي كلام كثير نفسي أشاركك فيه.
أغلقت نور الهاتف بعد دقائق، وظلّت تحدّق في الشاشة المظلمة، تتساءل بصوتها الداخلي :
"هو فعلاً مهتم؟ ولا دي مجرد بداية لعبة جديدة؟"
بعد يومين فقط، جلست نور في نفس المقهى على كورنيش النيل، تتأمل صفحة الماء، حين لمحَت رياض يقترب بخطواته الواثقة. إبتسم وهو يجلس أمامها من دون أن ينتظر دعوة.
رياض : وحشتيني يا نور، حاسس إن يومين كانوا سنة.
إبتسمت إبتسامة خجولة، لكنها أخفت ارتباكًا داخليًا..
نور : مش للدرجة دي يا رياض.
ظل صامتًا لحظة، يحدّق في فنجان القهوة أمامه، ثم أطلق تنهيدة ثقيلة.
نور : مالك؟ شكلك مش طبيعي النهارده.
رياض (هز رأسه ببطء) : يمكن علشان أنا تعبت، تعبت من الناس اللي بتستغل طيبتي. إشتغلت سنين في مشروع كبير، حطيت فيه عمري كله، وفي الآخر إتسرق مني. حتى أقرب الناس ليا ما وقفوش جنبي.
نظرت إليه نور بعطف، وقلبها انقبض من الحزن في صوته..
نور : طب ليه ما حكِتش لحد؟ يمكن كنت تلاقي اللي يقف معاك.
رياض : جربت بس كل ما أدي ثقة لحد يخون. بقيت وحيد. لولا إني شُفتك في اليوم ده، كنت هافتكر إن الدنيا كلها كذب.
شعرت نور بارتعاشة في قلبها. كانت تعلم أن الحذر واجب، لكن كلمات رياض اخترقت جدارها الداخلي.
نور : ما تقولش كده، يمكن ربنا بعثلك اللي يسمعك.
رفع عينيه إليها، نظرته مزيج بين امتنان ودهاء، ثم ابتسم إبتسامة باهتة.
رياض : وجودك بيفرق معايا أكتر مما تتخيلي.
جلست نور صامتة، تنصت لقلبها الذي يخفق بين الرغبة في التصديق، والخوف من أن يكون هذا مجرّد فخ جديد.
في إحدى الليالي، جلسا معًا على الكورنيش، والأمواج تتكسّر بهدوء تحت أقدام المراكب المارة. كانت نور صامتة على غير عادتها، شاردة الفكر، تعصر يديها بتوتر.
لاحظ رياض ذلك، فمال قليلًا نحوها وقال بصوت مهتم.
رياض : مالك يا نور؟ حاسس إن فيه حاجة مضايقاكِ.
تنهدت بعمق، ثم قالت وهي تنظر بعيدًا.
نور : موضوع الورث بتاع جوزي الله يرحمه، من يوم ما مات وأنا في مشاكل مع أهله. عايزين ياخذوا حقي وحَق بنتي. كل شوية قضايا وخناقات. بقيت حاسة إني لوحدي في حرب مش بتنتهي.
إنكسرت نبرتها قليلًا، واغرورقت عيناها بالدموع..
نور : تعبت يا رياض، مش عارفة أعيش ولا أرتاح. كل يوم خوف وقلق، خايفة على بنتي، وخايفة على مستقبلي.
أمسك رياض يدها بحنان مصطنع، وحدّق في عينيها بثبات.
رياض : لأ يا نور، إنتِ مش لوحدك. طول ما أنا موجود محدش هيقدر يضغط عليكِ ولا ياخذ منك حاجة.
مسحت دموعها بسرعة، وقالت بارتباك..
نور: إزاي بس؟ دي محاكم وناس ثقيلة، وأنا ضعيفة قدامهم.
إبتسم رياض بثقة، وأخرج من جيبه بطاقة صغيرة، يمدّها لها.
رياض: شوفي، ده رقم محامي صاحبي. من أكفأ الناس، وهيقف معاكِ لآخر لحظة. وأنا كمان معاكِ، أي جلسة، أي ورق، أنا هكون جنبك.
رفعت نور عينيها نحوه بامتنان، لكن قلبها كان يرتجف بين الراحة والخوف.
نور (بصوت مبحوح) : مش عارفة أشكرك إزاي يا رياض، أنا من كثر الوحدة نسيت يعني إيه حد يقف معايا.
شدّ على يدها بقوة أكبر وقال بنبرة محسوبة.
رياض : من النهارده، أنا ضهرك. ومش هسيبك تواجهِي الدنيا دي لوحدك.
في تلك اللحظة، شعرت نور أن جدار الوحدة المحيط بها بدأ يتصدّع، لكنها لم تعلم أن فتح هذا الباب قد يحمل لها خلاصًا، أو فخًا أعمق مما تتخيل.
بعد أيام قليلة، وجدت نور نفسها مضطرة للذهاب إلى جلسة في المحكمة تخص قضية الميراث. وبينما كانت تتردّد في الدخول، فوجئت بـرياض يقف إلى جوارها. كان أنيقًا كعادته، لكن هذه المرة بدا جادًا وحازمًا.
نور (مندهشة) : إيه اللي جابك؟ أنا ما كنتش عايزاك تتعب نفسك.
إبتسم بثقة، ووضع يده على كتفها في حركة طمأنة.
رياض : قلتلك مش هسيبك لوحدك. الجلسة دي مهمة، ولازم تكوني مطمنة.
دخلت نور القاعة، وجلست بجواره وهي تحاول أن تخفي ارتباكها. طوال الوقت كان يهمس لها بكلمات مشجعة، يشرح بعض التفاصيل، ويطمئنها أن المحامي يتولى الأمر. وعندما خرجا، كانت تشعر كأن حملًا ثقيلًا قد انزاح عن صدرها.
في طريق العودة، إلتفتت إليه بعينين ممتلئتين امتنانًا.
نور : أنا مش عارفة أشكرك إزاي. حسيت إني مش لوحدي، دي أول مرة من سنين أحس إن فيه حد واقف في ضهري.
أمسك رياض بكفها وهو يقود السيارة، وصوته مليء بالدفء..
رياض : يا نور، من النهارده إعتبري إن مشاكلك مش بتاعتك لوحدك. إحنا سوا.
شعرت نور أن قلبها يلين أكثر، والحاجز الذي صنعته حول مشاعرها بدأ يتصدّع. كانت تعرف أن الحذر واجب، لكن وجوده بجوارها وقت ضعفها جعلها تتشبث به أكثر مما توقعت.
وبينما كانت تحدّث نفسها أن هذا الرجل ربما يكون هو التعويض الذي طالما دعت الله به، كان رياض يبتسم لنفسه ابتسامة خفية، يدرك تمامًا أن خيوطه بدأت تُحكم حولها.
في مساء يوم ثقيل، عادت نور من السوق محمّلة بالأكياس، ووجهها شاحب من الإرهاق. كانت إبنتها مريضة بنزلة برد، والبيت في فوضى بسبب انشغالها بين العمل والجلسات والمحامين.
وبينما هي تحاول فتح الباب بيد مرتجفة، جاءها صوت مألوف من خلفها...
رياض (بابتسامة قلقة) : يا ساتر يا نور! إيه كل الشيلة دي؟ إنتِ شكلك هتقعي من التعب.
إلتفتت نحوه بتفاجؤ، وفي داخلها خليط من الراحة والخوف.
نور : رياض! إنت بتعمل إيه هنا؟
رياض : قلت أطمن عليكِ بعد اليوم الطويل ده. ما أنا عارف إن جلسة المحكمة خذت مجهود كبير منك.
مدّ يده بسرعة وأخذ عنها بعض الأكياس الثقيلة..
رياض : إفتحي الباب وأنا هدخل أساعدك.
ترددت نور لحظة، قلبها يخفق من الحذر، لكنها لم تجد ما تقوله. فتحت الباب ببطء، ودعته يدخل.
دخل رياض البيت، نظر حوله وكأن المكان يروي له حكايات الماضي. لمح صورة زوجها الراحل معلقة على الجدار، فخفض رأسه باحترام مصطنع، ثم وضع الأكياس على الطاولة.
رياض : على فكرة البيت دافي، تحسي فيه روح طيبة. ربنا يباركلك فيه وفي بنتك.
جلست نور على الأريكة وهي تحاول إستجماع قواها، بينما هو بدأ يرتّب بعض الأغراض في المطبخ وكأنه واحد من أهل البيت.
نور (بصوت خافت) : مش عايزاك تتعب نفسك يا رياض، أنا هظبط كل حاجة.
إقترب منها وجلس قبالتها، نبرة صوته واثقة وحنونة..
رياض : إنتِ تعبتِ كفاية يا نور، سيبي عنك العناد. أنا موجود علشان أشاركك الحمل، مش أتفرج عليكِ وإنتِ شايلة لوحدك.
إرتعش قلبها بين الخوف من سرعة اقترابه، والإمتنان لوجود شخص يمد لها يد العون.
وفي تلك اللحظة، شعرت نور أن الباب الذي فتحته لم يكن مجرد باب بيتها، بل باب حياتها كلها.
بينما كان رياض جالسًا في غرفة المعيشة يتحدث مع نور، خرجت الصغيرة من غرفتها وهي تمسك بدميتها وتفرك عينيها من أثر النوم.
توقفت فجأة عند رؤية الغريب الجالس مع أمها، وتراجعت خطوة بخجل.
إبتسم رياض على الفور، وأحنَى جسده قليلًا ليكون في مستوى نظرها..
رياض (بهدوء ودفء) : إزيك يا أميرة؟ إسمك إيه؟
نظرت الطفلة إلى أمها مترددة، ثم أجابت بصوت منخفض..
الطفلة : إسمي مريم.
فتح رياض عينيه بدهشة مصطنعة وقال بابتسامة عريضة..
رياض : يا نهار أبيض! ده إسم جميل قوي. على فكرة أنا كنت أعرف واحدة إسمها مريم، كانت أذكى بنت في المدرسة. شكلك ذكية زيها.
ضحكت الصغيرة بخجل، وضمّت دميتها إلى صدرها.
نور (بابتسامة ممزوجة بالقلق) : دي بنتي يا رياض، حياتي كلها.
أومأ برأسه باحترام، ثم مد يده نحو جيبه وأخرج قطعة شوكولاتة صغيرة ملفوفة بورق لامع..
رياض : أنا عندي هدية صغيرة للأميرة. بس خلي بالك، مش هنديها لحد إلا لو وعدني إنه يسمع كلام ماما.
إتسعت عينا الطفلة فرحًا، وخطت خطوة للأمام لتأخذها. التفتت نور إليه بامتنان ممزوج بتوجس، وهي ترى كيف عرف الطريق لقلب ابنتها بسرعة.
،
جلس رياض مرة أخرى بجوار نور وقال بنبرة هادئة..
رياض : شوفي يا نور، حتى مريم بتحبني من أول مرة. إنتِ لسه خايفة مني ليه؟
تجنبت نور النظر مباشرة إلى عينيه، لكنها لم تستطع إنكار ذلك الشعور الذي بدأ يتسلل داخلها: خليط من الراحة والرهبة.
مرّت أسابيع قليلة، وصار رياض ضيفًا شبه دائم في بيت نور. لم يعد مجرد رجل يظهر أحيانًا، بل أصبح جزءًا من تفاصيل يومها.
كانت مريم أول من تأثر بوجوده؛ صارت تنتظره بشغف، تجلس بجانبه وهي ترسم، تضحك على نكاته الصغيرة، وتطلب منه أن يساعدها في واجباتها المدرسية. وفي كل مرة يغادر، كانت تركض وراءه عند الباب وتقول ببراءة.
مريم : ما تتأخرش علينا يا عمو رياض، ماما بتضحك أكتر لما إنت بتبقى هنا.
كان قلب نور ينقبض كلما سمعت كلمات إبنتها، بين فرحتها برؤية مريم سعيدة وخوفها من أن تتعلق بشخص قد يرحل يومًا.
أما رياض، فقد عرف كيف يدخل عقلها قبل قلبها. كان يجلس معها طويلًا بعد أن تنام مريم، يستمع لكل ما تقوله بصبر يشبه صبر الأطباء النفسيين.
نور (بصوت متردد) : ساعات بحس إني مش عارفة أكمّل، الحمل ثقيل، والناس حواليا بتزيدني وجع مش بيساعدوني.
كان رياض يميل برأسه قليلًا، ينظر إليها باهتمام كامل..
رياض : كمّلي يا نور، قولي كل اللي جواكِ. أنا سامعك.
تتنفس بعمق، وتبدأ في إخراج ما يثقل صدرها: مشاكلها مع أهل المرحوم، قلقها على مستقبل مريم، وحدتها الطويلة، حتى تفاصيل خوفها من النوم بمفردها في بعض الليالي.
كان رياض لا يقاطعها، يتركها تحكي، ثم يعلّق بهدوء..
رياض : إنتِ قوية أكثر مما تفتكري. واللي بتعمليه عشان بنتك بطولة حقيقية. أنا شُفت ناس كثير بيتكسّروا من أقل من كده، لكن إنتِ لسه واقفة.
مع مرور الوقت، صارت نور تجد في رياض المساحة التي لم تجدها من قبل: مساحة آمنة للكلام والفضفضة. كانت تخرج معه أكثر، تتمشى على الكورنيش، تزور أماكن لم تزرها منذ وفاة زوجها. بدأت تعود إليها بعض ملامح الحياة.
لكن في قلبها، ظل الخوف يهمس: "هل هو فعلاً السند اللي بدور عليه؟ ولا أنا اللي محتاجة أصدق إن في حد سامعني؟"
في إحدى الليالي الممطرة، جلست نور في غرفة المعيشة بينما مريم نائمة في غرفتها. كانت تمسك بعض الأوراق الخاصة بقضية الميراث، وكل كلمة فيها تثقل صدرها أكثر. لم تستطع الاحتمال، فوضعت الأوراق جانبًا ودفنت وجهها بين يديها، تنهال دموعها بلا توقف.
رنّ الهاتف، كان رياض. حاولت مسح دموعها سريعًا قبل أن تجيب، لكن صوتها المبحوح فضحها.
رياض (بقلق) : نور! مالك؟ صوتك مش طبيعي.
نور (باكية) : خلاص يا رياض، تعبت. أنا مش قادرة أشيل الحمل ده لوحدي، كل يوم بيزيد الضغط عليا، والناس حواليا مش بترحم.
لم ينتظر كثيرًا، وبعد دقائق كان أمام باب شقتها. فتحت له وهي تمسح دموعها في عجلة، لكنه رأى الانكسار في عينيها بوضوح.
دخل وجلس بجوارها، ثم قال بهدوء...
رياض : إبكي يا نور، ما تكمّليش التمثيل إنك قوية. أنا هنا، خرجي كل اللي جواكِ.
لم تستطع المقاومة أكثر، فاندفعت دموعها بغزارة. حكت له عن وجعها مع أهل زوجها، عن شعورها بالخذلان من الدنيا، عن خوفها من أن تظلم مريم بسبب ضعفها.
كان رياض يستمع دون مقاطعة، يهز رأسه بتفهّم، ويضع يده على كتفها كأنه يثبّت وجوده كسند.
رياض (بصوت دافئ) : إنتِ مش لوحدك تاني يا نور. إعتبري كل اللي عندك بقى عندي، مشاكلك مش مشكلتك لوحدك.
رفعت رأسها إليه، والدموع ما زالت تنساب على خدّيها..
نور: بس أنا خايفة، خايفة أتعشم فيك وتسيبني زي ما كل الناس سابوني.
شدّ على يدها أكثر، ونظر إليها بثبات..
رياض : أنا مش أي حد، ومش جاي أسيبك. أنا جاي أكون ضهرك وأثبتلك إنه لسه فيه ناس تستاهل ثقتك.
تتجوزيني؟!!!؟؟؟
شعرت نور للحظة أنها أخيرًا وجدت كتفًا تبكي عليه دون خوف من اللوم، لكنها في أعماقها سمعت صوتًا خافتًا يذكّرها : "هل ده فعلاً الأمان؟ ولا بداية التعلّق اللي هيكسرك أكتر؟"
تكملة الرواية من هناااااااا
لمتابعة باقى الرواية زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كاملةمن هناااااااااا
مجمع الروايات الكامله 1اضغط هناااااااا
مجمع الروايات الكاملة 2 اضغط هناااااا
تعليقات
إرسال تعليق