رواية ليالي الغول اقتباس من الفصل الأخير بقلم لوجي احمد

 

سكريبت البدروم الملعون كامله بقلم حور حمدان 

سكريبت البدروم الملعون كامله بقلم حور حمدان 

كنت حاسة إن في حاجة مش طبيعية وبصيت للكمبيوتر من جديد قلبي وقع الصورة مش عادية في واحدة تعبانة جدًا تحت بيتي والمصيبة إني أصلًا مكانش عندي فكرة إن في بدروم واضح إن في حد ضحك عليا جامد جامد قوي كمان

وأنا تايهة ومش فاهمة حاجة بعت له الصورة اللي ظهرت قدامي وكتبت له بخوف

هو في بدروم تحت البيت

والأهم مين اللي فيه دي

رد علي في ثواني مع إنه بقاله كذا يوم ما بيكلمنيش بعد ما اتخانقنا وسابني ومشفتوش بقاله أربع أيام

كتبلي

انتي نزلتي يا حور ولا فتحتي الكمبيوتر بتاعي

كتبت له وأنا مش فاهمة ولا مستوعة اللي بيحصل

فتحت الكمبيوتر بس لسه مش فاهمة المنظر دا

بس الرعب الحقيقي كان في رده اللي جه بعدها

اياكي تنزلي تحت أنا بقول لك اهو لو نزلتي تبقي طالق بالتلاتة

أول ما قريت الرسالة قلبي اتقبض واضح إنه مخبي حاجة وكبيرة كمان ساعتها خدت قراري ولو حتى بيتي هيتخرب لازم أعرف الحقيقة

نزلت السلالم خطوة خطوة وكل جسمي بيرتجف نزلت لحد ما وصلت عند باب البدروم الباب كان مقفول بس مش مقفول كويس كان ميل شوية كإن حد دخل منه بسرعة ونسى يقفله قربت بإيديا اللي كانت بتترجف ودفعت الباب بالراحة أول ما فتح طلع لي ريحة رطوبة خانقة ريحة قديمة وريحة حاجة تانية مش عارفة أحددها بس ريحت قلبي بالسالب

نزلت السلم الصغير اللي بينزل جوه ومع كل درجة كنت سامعة صوت نفسي بيعلى مش عارفة ده صوتي ولا صوت حد تاني بس في صوت خفيف زي شهقة مكتومة قلبي وقع في الأرض كملت وعيوني بتتعود على الضلمة لحد ما وصلت للأرض

البدروم كان واسع أوسع بكتير مما توقعت الأرض تراب والحيطان باين عليها إنها قديمة ومتشققة نور ضعيف كان جاي من لمبة صفرا معلقة في السقف بتنور لحظة وتطفي لحظة وكل مرة بتطفي فيها بحس إن الضلمة بتقرب مني

بصيت يمين ولا حاجة بصيت شمال وساعتها شوفتها

واحدة ست قاعدة على الأرض ضهرها للحائط شعرها منكوش هدومها مقطعة ورجليها معلمة كانت بتتنفس بصعوبة راسها نازلة لقدام ووشها باين عليه إنها مرهقة مرهقة لدرجة تخوف

قربت منها خطوة خطوة كمان قلبي بيقول لي ارجعي بس عقلي مش سايبني ساعتها الست رفعت راسها فجأة وبصتلي

كان عندها عينين واسعة مرعوبة كإنها مستنجدة وشها كان باين عليه ألم وفي لحظة حسيت إن في حاجة غلط أكتر من كل اللي شوفته

قبل ما أفتح بقي أو أعمل أي حاجة سمعت صوت من ورايا صوت باب البدروم وهو بيتقفل بقوة

اتجمدت

لفيت بسرعة لقيت الباب اتقفل لوحده بس وأنا بلف سمعت صوت خطوات خطوات تقيلة نازلة من فوق واحدة ورا التانية بتقرب وبتقرب وصوت نفس حد متنرفز حد غضبان

في اللحظة دي عرفت إن اللي نازل هو أدهم

ووقفت أنا والست بنبص للباب اللي بدأ مقبوض عليه كإنه هيقع

وكل جزء فيا قال إن اللي جاي مش سهل ومش متوقع ومش شبه أي حاجة اتخيلتها الخطوات كانت بتقرب وقلبي بيخبط في صدري بطريقة مخوفاني الست اللي كانت قاعدة على الأرض بصتلي بخوف شديد بس فجأة رفعت إيدها الضعيفة ومسكت طرف جلابية قديمة كانت لابساها وعينيها بتقول لي حاجة بتترجاني أفهم

قربت منها شوية وحطيت إيدي على كتفها

انتي مين حد عمل فيكي كده

بس قبل ما تلحق ترد صوت أدهم قرب وصوته كان واضح إنه متعصب متوتر وبيتنفس بسرعة وفي اللحظة دي الست تنفست بصعوبة وقالت بصوت مبحوح جدا صوت شبه بيموت

أنا أنا أمه

الكلمة وقعت عليا زي طوبة اتجمدت مش مصدقة وداني أمه أمه اللي قال لي إنها ماتت أمه اللي كان دايما يحكي لي قصص عنها أمه اللي عندها شهادة وفاة أمه اللي هو حابسها هنا

قبل ما ألحق أفهم أو أستوعب الست مسكت إيدي بقوة غريبة على واحدة في حالتها وقالت وهي بتنهج

عاوز يخلص عليا بياخد فلوسي قال للناس إني مت

الكلام وقع على دماغي كأنه رصاص هو مجنون ولا أنا اللي اتجننت

ولحظة ما قالت الكلمة الأخيرة سمعت صوته أدهم كان عند باب البدروم وأول ما شافني واقفة جنب أمه وشاف الست رفعت راسها وشه اتغير تماما

صرخ بصوت عالي

حور انتي بتعملي ايه هنا

وقبل ما يكمل لقيته بيطلع من ضهره السكينة

الست صرخت صرخة مكتومة

هيقتلنا

ساعتها جسمي اتجمد بس عقلي اشتغل ما أنا ما نزلتش قبل ما أخويا يوصل من أول ما قال لي تبقي طالق بالتلاتة وأنا شميت ريحة المصايب فرحت بلغت أخويا حسام وهو ظابط من اللي مخه ناشف وما بيهزرش بلغت له كل حاجة الصورة البدروم خوف أدهم

وهما في الطريق

وأول ما أدهم كان هيهجم علينا سمعنا صوت فوق صوت باب الشقة بيتفتح بحدة وصوت خطوات كتير نازلة بسرعة وصوت حد بيزعق من فوق

أدهم وقف مكانك

أخويا كان نازل السلم زي العاصفة وراه ضباط تانية وصوت الأسلحة اتسمع بوضوح أدهم لف ناحية الدرج ووشه اتصدم لما شاف أخويا

صرخ حسام بصوت هز البدروم

انزل السكينة يا أدهم انزلها دلوقتي

وأدهم كان واقف في النص بينه وبيني وبين أمه وبين الشرطة وشه متلخبط مرعوب مجنون

وفي ثواني رفع السكين مش علشان يسلم علشان يخلص علينا

وساعتها بس اللي حصل قلب كل حاجة

أدهم اندفع ناحية أمه وأنا صرخت

حسام

الطلقة خرجت أدهم وقع على ركبته الأول السكينة وقعت وبعدين هو وقع

أخويا شدني لورا والضباط مسكوه وهو بيصرخ ويتخبط زي المجنون

أمه كانت بتعيط ساكتة عينها على ابنها وهي مش مستوعبة اللي قدامها

الإسعاف وصلت وخدتها وأنا واقفة مش قادرة أحرك رجلي ولا أسمع صوتي

حسام قرب مني وقال

لو كنتي نزلتي قبل ما أكلمك النهارده كنا بنلميكي انتي كمان

خرجوني للبراح الهواء كان برد بس أريح من الضلمة اللي كانت هتموتني

أدهم اتقبض عليه واتكشف كل حاجة شهادة وفاة مزورة فلوس محولة ليه محاولات قتل من أمه

أمه اتعالجت وحكت كل اللي حصل

وأنا مقدرتش أرجع البيت وقعدت مع أهلي فترة عقلي كان مرعوب من فكرة إن حياتي كانت مع حد بالشكل ده

وفي يوم وصل جواب المحكمة الطلاق اتسجل رسمي وأنا بقيت حرة

وقفت عند الشباك وبصيت للشارع وأنا عارفة إن ربنا نجاني قبل لحظة من الهلاك وإن الصورة اللي شفتها كانت بداية إنقاذي

ولحد النهارده كل ما أفتكر ضلمة البدروم وصوت باب الشقة وهو بيقفل ونَفَس الست اللي طلعت إنها أمه بحمد ربنا إني خرجت من هناك بروحي وربنا بعت لي أخويا في آخر ثانية

لككك وحشتوووووونييييييييي اووووووووي بجددددد، وحشتوني مووووت، بحبكم اوي اوي اووووووي بتمنى من كل كل قلبي تسيبولي رايكم في الكومنت لو الاسكربت عجبكم ولو مش عجبكم بلاش تكتبولي كومنت سلبي ولكن قدمو النصيحة بشكل لطيف، بحبكم 

#تمت

#البدروم_الملعون

#حكاوي_كاتبة

#حور_حمدان