رواية بعد فوات الأوان الفصل الاول والثاني بقلم محمد منصور
رواية بعد فوات الأوان الفصل الاول والثاني بقلم محمد منصور
ح(1)
لو كنت اعرف ان كل دة هيحصلي انا وولادي الاثنين ما كنتش عملت اللي انا عملته دة. عايزين تعرفو انا عملت اية تعالو في الاول اقول لكم انا مين.
انا سميحة عبد القوي من الصعيد الجواني اتجوزت من جمعه ابن عمي ونزلنا مصر واشتغل جمعه في مصر كل حاجة ممكن تتخيلوها ولما زهق من التنطيط قرر يجيب عربية كارو بحمار ودة كان في التسعينات ويبقي بتاع روبابكيا. اي حاجة قديمة للبيع. واتعرف في المنطقة كلها والناس كانت بتحبه ومين بس ما يحبش جمعه جوزي والدنيا فضلت ماشية زي الفل. واهي العربية كانت بتكفينا انا وهو وعيالنا الاثنين اكل وشرب بالعافية لكنها مستورة. لكن دوام الحال من المحال. اصل جمعه جوزي مات. و سابني في الدنيا انا وعيالي الاثنين منصور و طارق اللي كانو لسة في ثانوي وما بقتش عارفة اعمل اية اكلهم منين واشربهم ازاي وما بقاش قدام مني غير العربية الكارو واكمل اللي بداو جمعه وابقي اول ست في المنطقة او تقريبا في مصر كلها تشتغل في الروبابكيا. اصل الروبابكيا دي عايزا صحة علشان الشيل والحط. لكن ولاد الحلال ما كنوش بيسبوني اشيل لوحدي. وبقيت الف وادور علي اي حاجة قديمة للبيع لغاية ما جه اليوم اللي بعته حياتي كلها هتتغير انا وعيالي،،،،،،،
بعد فوات الاوان
اقتباس جديد من احلي المسلسلات. بتاعت زمان. لكن انتو عارفني ما بسبش قصة علي حالها وحطيت مناخيري وغيرت شوية في الاحداث. يارب تعجبكم
بدور احداث القصة دي سنة 1990
مواعيد عرض القصة كل يوم الساعة 9. ص علي صفحة الحكاية مع منص
كتابة واقتباس
محمد منصور **منص**
وقبل ما نبدأ نوحد الله ونصلي علي خير خلق الله سيدنا محمد.
اللهم صل وسلم علي محمد صلاة تحل بيها العقد وتفك بيها الكرب
هبدا لكم حكايتي لما كنت طالعه الدور الثالث في بيت قديم مبني من الخشب. ورايحة لست غلبانه اسمها محروسة. و طلعت مفتاح شقتها من كيس اسود معلقه حوالين رقبتي بحط في الفلوس وبطاقتي وفتحت باب الشقة ودخلت للست محروسة اللي كانت واقفة بصعوبه بتهرس بطاطس علشان تاكل فروحت ناحيتها وقولت
خلي عنك يا ست محروسة
محروسة سابت لي الطبق اكمل انا هرس بطاطس وراحت قعدت علي الارض وقالت
يخليكي ليا يا بنت الحلال ديما واخدي بحسي وانا في اخر ايامي
سميحة
اخر ايامك اية بس دة انتي لسة في الخمسين
كانت فعلا محروسة عندها 53 سنة لكنها سابت نفسها للحزن والمرض ودة خلاها تبان انها عندها 70 سنه. لكن محروسة رديت عليه وقالت
من وقت المرحوم ما مات وانا ما سمعتش كلام حلو زي دة. لكن هانت كلها كام يوم واحصله
خلصت هرس البطاطس وروحت لها بالطبق علي صنية ومع رغيفين عيش وبصيت للسفرة اللي هي اخر حتة عفش موجودة في الشقة وقولت
قاعدة علي الارض لية ما تقومي تقعدي علي السفرة
خدت الصنية من ايدي وقالت
السفرة خلاص ما بقتش بتاعتي. لان عايزاكي تشتريها
قعد قصاد منها وقولت
بس السفرة دي غالية عليكي دة انا اشتريت كل العفش وانتي رفضي تبيعي السفرة دي. وقولتي ان دي هدية امك ليكي
حطيت محروسة لقمة بطاطس في بوقها واختلط المر في العيشة بطعم البطاطس وقالت
محتاجة اكل علشان اعيش ومابقاش حلتي الا هي. والسرير اللي بنام عليه
وبدات البطاطس تتملح بدموع عيونها. قلبي اتقطع وحطيت ايدي في صدري طلعت الكيس اللي معلقه حوالين رقبتي وبصيت في الكيس ما كنش في الا 3 جنية. دة كل اللي حيلتي طلعت جنية من التلاته
و اديته للست محروسة اللي بصت للجنية وقالت
السفرة دي خشب زان يعني تساوي، ،،،،،
حطيت الفلوس في ايدها وقولت
دة مش حق السفرة
زقت ايدية بعيد عنها وقالت
تعرفيني بقالك كام سنة شوفتيني قبل كدة بمد ايدي علشان اخد صدقة من حد
سميحة
دي مش صدقة د،،،،
مخلتنيش اكمل كلامي وقالت
ثمني السفرة بما يرضي الله واديني ثمنها
رجعت الجنية تاني للكيس وقولت
طيب بقول لك. ما تخليني اخد لوحة من لوحات جوزك اللي جوة ومقفول عليها من سنين في الاوضة دي
وشاورت علي الاوضة فقالت محروسة
بعدين جوزي فؤاد يزعل دة موصيني ما افتحش الاوضة دي ابدا
سميحة
جوزك الله يرحمو مات وشبع موت وما افتكرش ان هيزعل لما تفكي زنقة بلوحة ولا اثنين
محروسة
وهي اللوح دي ليها سعر
سميحة
انا اعرف واحد في خان الخليلي كان صاحب جوزي هودي له لوحة واشوف يثمنها بكام هو اي نعم بخيل شوية لكن انا ناصحة وهجيب لك فيها سعر حلو ،،،،،،،،
وفعلا خد اللوحة وروحت للراجل دة اللي اسمه يسري والغريبة ان يسري اول ما مسك اللوحة بص لها بصة اعجاب شديد وقال وهو عمال يفلي في اللوحة
انتي جبتي اللوحة دي منين
سميحة
من امتي بيفرق معاك البضاعة اللي جاية ليك جاية منين
ماردتش عليه وطلع عدسة مكبرة وبدا يبص لتفاصيل اللوحة من خلال العدسة وقال بصوت واطي لكن انا سمعته
دا فاينشي
ما فهمتش هو يقصد اية لكن انا بياعة شاطرة و كار الروبابكيا دة اتعلمته من جوزي اللي قال لي في مرة
عيون الزبون ولهفته علي البضاعة اللي معاكي. هي اللي تخليكي تحطي السعر اللي انتي عايزا
وهنا قولت ل يسري
ما سمعتنيش سعرك
بص لي يسري وساب العدسة وقال
هاخد اللوحة دي ب 10 ج. ولو في لوحات تانية عند الناس دي هاخدها كلها
سحبت اللوحة من قدامة وقولت
بس صاحبة اللوحة عايزا فيها 100 ج.
كنت بقول رقم 100 دة وانا عارفة انه كتير لكني شوفت في عيونه ان اللوحة دي تساوي اكتر من ال 10 ج اللي هو قالها. وافتكرت انه هيقولي خدي اللوحة دي وامشي لكني استغربت لما لقيته حط ايدة في جيبة وطلع ال 100 ج. مسكت الفلوس وهنا اتاكد ان في حاجة مش مظبوطة فسبت له الفلوس علي المكتب وخد اللوحة وقولت
هرجع ل صاحبة اللوحة واللي هتقول عليه يمشي
وخرجت من المحل وهو قام جري وراء مني وكان بينادي عليه وبيقول
استني يا سميحة الكلام اخد وعطاء
كنت بركب العربية الكارو بتاعتي وانا بقول
هرجع لك تاني
وقولت للحمار
شي.
واتحرك الحمار ومشيت من قدام منه وانا ناوية اعرف اية حكاية اللوحة دي. بس هعرف ازاي. كنت عايزا اقول لكم النهاردة. لكن الحلقة خلصت. ف بكرة باذن الله نكمل. ويلا سلام وباي ،،،،،،،
ح(2)
رجعت باللوحة ل بيت الست محروسة لقتها نايمة استحرمت اصحيها ونزلت من عندها وركبت العربية بتاعتي. وبصيت للوحة وقولت لنفسي
طيب وبعدين دة انا قولت
ما حدش هيعرفني سر اللوحة دي اللي الست محروسة. وليه سعرها وصل ل 100 ج. واللي هيدفع الرقم راجل بخيل زيي يسري
طيب وبعدين.
الفضول كان هيموتني ما اصلا انا لما احط حكاية في دماغي لازم اوصل ل اصل الحكاية علشان ارتاح. بصراحة ما قدرتش استني
ل بكرة وطلعت تاني للست محروسة ما بدري اوي علي نومها دة المغرب لسة الرجاله في الجامع بيصلوها. وطلعت لها تاني وحاولت اصحيها لكنها ما كانتش بتصحي. خوفت يكون حصل لها حاجة فضلت اهز فيها اوي وبرضو ما بتصحاش شيلتها ونزلت بيها جري علي السلم وشوفت واحد معرفه من اللي ساكنين معايا في المنطقة اسمه شلبي وشافني وانا شايلة الست محروسة فقالي
مالها الست محروسة يا خاله سميحة
سميحة
طلعت لقيتها قاطعة النفس.
شلبي
طيب خليني اساعدك في شيلها
سميحة
جسمها لي حرمة وانت مش من محارمها علشان تلمسها وهي مش ثقيلة. وقف لي تاكسي وروح العربية الكارو وانا هروح بيها اقرب مستشفي. وقول ل عيالي يحطو اكل للحمار ويفكو من العربية
فعلا شلبي عمل اللي قولت له عليه وروحت بيها المستشفي وبعد ما دخلت بيها الطوارئ والدكتور كشف عليها قال
دي لازم تتحجز في الرعاية بسرعة والا قلبها هيقف
اتخضيت وقولت
هي حصل لها اية
الدكتور
حاله تسمم.
ضربت صدري بايدي من الخضة وقولت
تسمم.،،،،،،،،،
بعد فوات الاوان
كتابة واقتباس
محمد منصور **منص**
وقبل ما نبدأ نوحد الله ونصلي علي خير خلق الله سيدنا محمد.
اللهم صل وسلم علي محمد صلاة تحل بيها العقد وتفك بيها الكرب
ويتغير المشهد وقت ما شلبي دخل علي عيالي منصور وطارق بالعربية الكارو وقال شلبي ليهم
امكم مع الست محروسة في المستشفي وبتقول لكم فكو الحمار وحطو له اكل
طارق اتعصب وقال
يادي الست محروسة اللي طالعنا في البخت هي الحكاية ناقصها
منصور كان بيفك الحمار وبيحط له اكل وقت ما كان بيقول
اة لو امك سمعتك بتتكلم كدة عن الست محروسة
طارق
والله امي دي غاوية وجع قلب ومحروسة دي ما فيش من وراها الا الصداع
منصور
ست غلبانه وملهاش حد وامك بتعتبرها زي اختها دي حتي قالت لها لما الموت خدي الشقة ليكي انتي وعيالك وسايب لها المفتاح من قبل ما تموت
طارق
شقة قديمة في بيت من الخشب مع اي شوية هواء بيرقص ولا اجدعها رقاصة
منصور كان بيحط للحمار شوية برسيم في بوقة وبيقول
طيب ممكن تبطل رغي بقي وتدخل العربية جوة حوش البيت
طارق راح ناحية العربية وهو قرفان وبيقول
انا زهقت من العربية دي. كل يوم والت،،،،،،،،،
لكنه شاف اللوحة واستغرب ومسكها وقال
معقوله تكون دي لوحة
دا فاينشي
منصور بص للوحة وراح وقف جنب طارق وقال
مش دا فاينشي دة اللي انت عايز تبقي رسام مشهور زية
طارق كان باصص للوحة باعجاب شديد وقال
هو. بس من امتي امنا بتشتري لوح. وهي ما تفهمش الا في العفش
منصور
ممكن فيها فلوس اكتر من العفش
طارق رمي اللوحة وقال
فلوس دي لو اللوحة اصلية لكن اكيد دي لوحة مضروبة بتتباع في المعارض اللي تحت السلم ب 50 ج اللوحة
منصور
هي اللوحة الاصلية توصل
ل كام يعني
طارق وهو بيزق العربية
مش اقل من 10000 ج.
منصور اتصدم وقال
10000 ج. يا دين النبي هو في رقم كدة اصلا
طارق
دة لو ماكنش سعرها دلوقتي يعدي اصل اللوح دي بتتباع في المزادات
منصور
وكتاب الله ابقي راجل خايب لو معايا فلوس واروح ادفع الرقم دة في رسمة اعلقها علي الحيطة
طارق
ما انت علشان حمار عمرك ما تقدر قيمة لوحة مرسومة سنة 1500 تقريبا،،،،،،،،
في نفس الوقت كان في حوار داير بين يسري وواحد قاعد مع في المعرض بتاعه ودة اسمة رمضان وكان رمضان بيقول
انت متاكد يا يسري ان دي لوحة دا فاينشي المسروقة ليدا والبجعه
يسري
اية يا رمضان هو انا جديد في الكار دة. دة انا وراث الشغلانه ابا عن جدا. هي لوحة ليدا والبجعه
رمضان
انتي عارف دي لو معانا هتتباع بكام
يسري
عارف
رمضان
طيب ناوي علي اية مع الست دي
يسري
هستني بكرة ولو ما جتش انا هروح لها
رمضان
وهتعمل اية لما تروح لها وهي بتلاوع وخدت اللوحة وهي بين ايدك ومشيت
يسري
لوع اية بس دي ست علي باب الله انا عارفها من زمان هي وجوزها
رمضان
اومال لية عملت كدة
يسري
اكيد اللي ادوها اللوحة طلبو منها سعر اكبر من اللي انا قولته لكنها هتروح لهم وهترجع
رمضان
ولو مرجعتش تروح لها انت وتاخد منها اللوحة غصب عنها ولو كسرت رقبتها
يسري
انت عبيط من امتي وانا بفتري علي حد. علشان يوم ما افتري افتري علي ست غلبانة بتجري علي يتامي
رمضان
خلاص سيبني انا اتعامل معاها
يسري بلهجة تحذير حادة
انت مش هتقرب منها وانا هعرف ازاي اجيب اللوحة دي، ،،،،
دة الحوار اللي دار بين يسري و رمضان وقت ما كنت انا لسة في المستشفي بتابع حالة الست محروسة اللي خدوها مني ودخلت الرعاية المركزة الحرجة. اصلي عرفت بعد كدة انها دخلت في غيبوبة كاملة. مش دي المشكلة المشكلة الحقيقية بجد ان لقيت ظابط واقف قصاد مني وبيقول ل عسكري مع
حط الكلبشات في ايدها
العسكري حط الكلبشات في ايدي وانا مش فاهمة في اية وطبيعي كنت اسال الظابط وسالته ورد عليه الظابط وقال
انت مقبوض عليكي. بتهمة الشروع في قتل الست محروسة.
برقت ومعاها الحلقة خلصت لكن ميعادنا بكرة باذن الله والحلقة الجديدة ويلا باي وسلام
تكملة الرواية من هناااااااا
لمتابعة باقى الرواية زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كاملةمن هناااااااااا
مجمع الروايات الكامله 1اضغط هناااااااا
مجمع الروايات الكاملة 2 اضغط هناااااا
 لو كنت اعرف …){kind=link}
تعليقات
إرسال تعليق