سكريبت القرية الملعونة الفصل الثالث 3 الأخير بقلم بالميرا حصريه
سكريبت القرية الملعونة الفصل الثالث 3 الأخير بقلم بالميرا حصريه
رحنا عند خالد، اللي أول ما جبناله سيرة عم خليل أضايق كدا وقال:
-بصوا اللي أعرفه واللي اتقال قدامي أن عم خليل دا هو اللي راح لعمي وقاله أنه هيحرس البيت؛ علشان شاف كذا مرة شباب بليل بتدخله، ولأنه كان بواب قبل كدا، وألح على عمي كتير؛ لأنه مكنش لاقي شغل وكبر في السن، عمي وافق.
فبصيت لخالد وسألته بصدمة:
-يعني مش أنتوا اللي خليتوه يحرس البيت هو اللي جه لعمك وألح عليه؟!
فرد خالد:
-أيوة دا اللي حصل، بس هو فيه أيه؟!
بصلي شهاب وقالي:
-والله كان قلبي حاسس أن الراجل ده وراه حاجة.
فقلتله:
-أيوة السؤال هنا بقا، ليه عم خليل يلح بالشكل ده على حراسة بيت زي ده؟! ومين عم خليل دا أصلًا؟!
بصلنا خالد أحنا الاتنين وقال:
-يا جماعة ما تفهموني فيه أيه يمكن أقدر أساعدكم بحاجة.
حكيناله كل اللي حصل؛ففكر شوية وبعدين قالنا:
-عرفت مين ممكن يساعدنا نعرف عن عم خليل أكتر، جدة ولاد عمي الخالة حكمت ، حجة كبيرة في السن، وعارفة البلد كلها، إن شاء الله تساعدنا.
رحنا للحجة حكمت اللي حكتلي تاريخ أمي وأبويا كله في لحظة، ما شاء الله، فعلًا عارفة القرية كلها، ولأن مكنش ينفع أول ما نشوفها نسألها عن عم خليل استنينا شوية وبعدين خالد قلها:
-بقلك يا حجة حكمت فاكرة عم خليل اللي بيحرس البيت المهجور بتاعنا؟
فردت وقالته:
-خليل المسكين؟! ماله؟! حصله أيه تاني؟!
فسألتها باستغراب:
-خليل المسكين؟! هو حضرتك ليه قلتي عليه مسكين؟! وبعدين هو حصله أيه أولاني؟!
أتنهدت بحزن وقالتلي:
-خليل دا يا بني خسر كل حاجة فجأة كدا، الأول خسر بنته الكبيرة لما البيت المهجور ناداها بليل والصبح لقوا جثتها قدامه، كان هيتجنن، بعدين بناته الاتنين ومراته جالهم مرض غريب واتعزلوا في البيت وبعدين ماتوا التلاتة ، بعدها اعتزل الناس وطلب أنه يحرس البيت؛فوافقنا علشان مكنش فيه حاجة ياكل منها عيش، وحاله كان صعب بعد ما عيلته كلها ماتت، الله يرحمهم بقا؛ فعلشان كدا بنقول عليه مسكين، بس هو أنتوا بتسألوا عنه ليه هو حصله حاجة؟!
فقالها خالد:
-لا يا حجة محصلهوش حاجة، بس كنا بنسأل عنه لما عرفنا أنه بيحرس البيت يعني.
استأذنا من الحجة حكمت ومشينا، وكل واحد فينا، دماغه فيها مليون سؤال وسؤال، ليه كل ما نيجي نحل لغز عم خليل يتعقد أكتر؟! يعني أيه واحد البيت ق تل بنته يقرر يحرسه؟! وأيه حكاية مرض بناته ومراته ده؟! أيه حكاية الراجل دا بجد؟!
شهاب كان مصر يروح النهاردة بليل البيت المهجور، بس أنا وخالد فضلنا نحاول نقنعه أننا ما ينفعش نروح؛ لأن أيًا كان اللي مسؤول عن اللي بيحصل ده هيكون مستنينا ومتربص لينا، ومخطط للقاء دا كويس أوي، ومستعد ليه، بس أحنا عايزين نروح في وقت ما يتوقعش فيه وجودنا ومن مكان يفاجئه.
مر شهر كامل، محدش فينا قرب من ناحية البيت نهائيًا؛ حتى لما كنا بنتقابل، كنا بنتقابل في السر؛ علشان نوهم اللي ورا اللي بيحصل ده إننا خفنا من تهديد عم خليل، ورجع كل واحد فينا يعيش حياته بشكل طبيعي، وإننا مش بنفكر في دخول البيت مرة تانية.
بس الحقيقة أننا كنا بنخطط أحنا التلاتة في كل مرة بنتقابل فيها ونشوف هندخل إزاي البيت؟! وأمتى؟! وهنعمل إيه؟! وممكن نواجه أيه جواه؟!
وفي اليوم اللي اتفقنا عليه، بعد ما صلينا العشاء، أتحرك خالد وأخوه وراحوا دخلوا البيت من الشباك اللي دخلنا منه أنا وشهاب قبل كده؛ علشان يشغلوا عم خليل لو شافهم ويطلعوا بأي حجة تعطله.
أما أنا وشهاب فرحنا لبيت قديم جنب البيت المهجور بس من الجهة التانية ودخلنا البيت القديم ونزلنا منه على سطوح البيت المهجور.
البيت كان ضلمة أوي من فوق؛ فشغلنا الكشافات ولقينا مكان السلم؛ فنزلنا براحة وبحذر، كان الدور التاني من البيت مهجور زي الدور الأول بالظبط، عفش قديم، وتراب في كل مكان، ودم قديم ولبس مقطع عليه دم؛ فبعد ما دورنا كويس في الدور التاني ومش لاقيين حاجة تفهمنا أيه اللي بيحصل بالظبط، نزلنا للدور الأول ورجعنا نفتش في الأوض يمكن نفهم حاجة، أو نلاقي حاجة تدلنا، أو أي حاجة تدل على كل الأساطير اللي اتقالت أن البيت فيه جن وملعون وكلام كتير كان مستبعد تمامًا بالنسبالي.
مكنش فيه صوت لا لخالد ولا لأخوه وده قلقنا جدًا، بس كنا مضطرين نكمل بحث، يمكن نلاقي حاجة، فجأة سمعت صوت حركة باب، صوت بسيط، وكأن الباب مفتوح والهواء حركه، فضلنا ندور يمين وشمال على الصوت جاي منين، لحد ما نور الكشاف جه على لوحة كبيرة أوي على الحيطة، بطول الحيطة، ولولا أن حرف اللوحة كان متحرك شوية عمري ما كنت هشك في أنها السبب في الصوت ده، رحت ناحية اللوحة ومسكت حرفها وحركته براحة، واتصدمت لما لقيت ورا اللوحة باب.
بصيت لشهاب وعلى قد ما فرحنا على قد ما كنا مرعوبين من اللي ورا الباب.
وجهت الكشاف بتاعي لجوا الباب؛ فلقيت سلم نازل لتحت؛ فنزلنا وأحنا نازلين شهاب غصب عنه لمس الحيطة فالمكان كله نور؛ فطلع أنه داس بالغلط على مفتاح النور اللي خلى المكان كله منور أوي، نزلنا ووأنا نازل لاحظت أن السلالم نضيفة أوي، مفيش عليها تراب، ولسه هبدأ أفسر الوضع، لقيت بعد ما نزلنا السلم كأننا في شقة مفروشة، شقة جديدة وجميلة ونضيفة، بصينا أنا وشهاب لبعض ومكناش فاهمين حاجة خالص، بس لقينا صور محطوطة على تربيزة كبيرة
كدا؛ فرحنا كل واحد فينا مسك صورة، الصورة اللي مسكتها كان فيها عم خليل، وجنبه بنت لابسة فستان فرح، عروسة يعني وجنبها العريس وواحدة تانية واقفة جنبهم، كانت كأنها صورة عائلية مكونة من أب وأم وفي وسطهم عريس وعروسة، والصورة اللي كان ماسكها شهاب كان فيها ست تانية خالص نظراتها غريبة وشايلة طفلة تقريبًا أربع خمس سنين، وجنبها واقف راجل أول مرة أشوفه، لسه هبص لشهاب ونحاول نفسر الصور، لقينا النور اتقطع والدنيا ضلمت وحد خبطني على راسي فوقعت على الأرض واغمى عليا.
فتحت عنيا لقيت نفسي مربوط في كرسي أنا وشهاب وخالد وأخوه، وعم خليل عمال يرش ميه على وش الشباب علشان يفوقهم، بعد ما الكل فاق، وقف عم خليل في وسطنا وقالي أنا وشهاب:
-نبهتكم وحذرتكم وبرضو مفيش فايدة، حاولت أنقذكم من الموت ما سمعتوش الكلام، دلوقتي بعد اللي شفتوه لازم تموتوا.
فقاله شهاب:
-بما أننا هنم وت يا عم خليل وسرك مش هيخرج برا؛ ففهمنا أيه حكاية الصور دي؟! وليه أنت هنا؟! وأيه حكاية البيت ده؟!
فجأة خرجت ست كبيرة عنيها مرعبة ونظراتها غريبة جدًا، بعد ما ركزت في ملامحها كويس افتكرت أنها الست اللي في الصورة اللي كانت شايلة طفلة وفيه راجل واقف جنبها، بس كبرت أوي دلوقتي، وبقا شكلها مرعب جدًا، وقالت بصوت مخيف:
-خلوني أنا أحكيلكم حكاية البيت لأني أنا اللي عملتها، وأنتوا صدقتوها، أنا اللي كل القرية قالت عني مجنونة، وكانوا بيخافوا مني ويبعدوا عني ويخلوا ولادهم يقولولي يا عزيزة المجنونة في الشارع، بس كل ده ما أثرش فيا، قد ما اتدمرت بجد لما خدوا مني بنتي وقالوا أني هموتها وأنا كنت برعاها وباخد بالي منها علشان كانت تعبانة أوي، خدوها مني وطردوني برا القرية، وودوها مستشفى وماتت بعد يومين، هم اللي قتلوها، هم اللي بعدوها عني، هم اللي اتهموني بالجنون علشان مش راضية أوديها للمستشفى وهم أول ما ودوها ماتت هناك؛ علشان كده من عشرين سنة وأنا بموت بناتهم واحدة واحدة، بخطفها واقتلها وارمي جثتها قدام باب البيت، اللي خليت خليل يقول عنه قصص كتير منها أنه بيستدعي البنات بليل ويقتلهم ويرمي جثتهم برا، أما خليل فبعد ما قتلت بنته الكبيرة جه البيت زي المجنون وكنت هقتله زي ما قتلت كل اللي حاول يكشفني ودفنته جوا البيت، بس هو وعدني بأنه هيساعدني في كل اللي بعمله بشرط أني ما أقتلش بناته الاتنين الباقيين؛ فوافقت، وكان لازم يفكر يبعدهم إزاي عن القرية؛ فاخترع قصة مرضهم وموتهم هم وأمهم، والبنتين اتجوزوا وعايشين برا القرية ومحدش يعرف عنهم حاجة، أما خليل ومراته فعايشين معايا هنا في المكان اللي شفتوه بيخدموني وبيشاركوني في كل حاجة بعملها.
بصيت لعم خليل اللي واقف باصص في الأرض بحزن وكأن فتح الماضي خلاه يفتكر بنته واللي حصلها وسألته:
-طب قلنا أنك خفت من تهديدها بأنها هتقتلك وساعدتها، إنما إزاي أقنعت أهل القرية بموت مراتك وبناتك ومرضهم إزاي؟!
فبصلي وقالي:
-أنا كل حاجة عملتها كان علشان أحميهم؛ فجبتلهم دوا خلاهم يسخنوا ويتعبوا، والدكاترة كانت بتقولي مش عارفين مالهم، وبعدين لما قررت خلاص أننا هننقل هنا في البيت، جهزت تلت أكفان وحطيت فيهم لبس وربطتهم على هيئة بني آدمين وغطيتهم كويس وناديت الجيران وقلتلهم أن البنتين ماتوا في الفجر وأمهم لحقت بيهم الصبح وأني كفنتهم علشان ما حدش يتعدي من المرض اللي كان عندهم ورحنا دفناهم، ونقلنا لهنا، بس البنتين مكنش ينفع يفضلوا هنا علشان اللي بيحصل؛ فودناهم عند جدتهم في بلد بعيدة واتجوزوا وعايشين هناك.
قربت مننا الست عزيزة وقالت لخليل ومراته اللي جت وكانت واقفة جنب جوزها مستنيه الأمر من الست عزيزة:
-روحوا احفروا أربع أماكن وأنا هتصرف هنا.
لسه خليل ومراته هيتحركوا؛ فجأة وفي الوقت المناسب بالظبط نادر بيه الظابط اللي بيكون صاحب أخو خالد، جه هو والفريق بتاعه، وطبعًا كنا متفقين معاهم من قبل ما نقرر نيجي البيت، واللي سمعوا كل حاجة حصلت واتقالت؛ لأني كنت حاطط في جيبي جهاز، خلاهم يسمعوا كل اللي حصل ويسجله كمان، والحمد لله، أتقبض على عزيزة وعم خليل ومراته وفتشوا كل البيت، وفعلًا لقوا جثث كتير مدفونة جواه، منهم ظباط حاولوا يكشفوا سر البيت فتق تلوا، وحاليًا
وبعد سنتين أتهد البيت المهجور وانتهت الأسطورة بتاعته للأبد.
**************
🔥تم بحمد الله وفضله.
لمتابعة الرواية الجديدة زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كاملةمن هناااااااااا
مجمع الروايات الكامله 1اضغط هناااااااا
مجمع الروايات الكاملة 2 اضغط هناااااا
تعليقات
إرسال تعليق