سكريبت غدر البشر كامله بقلم حور حمدان
سكريبت غدر البشر كامله بقلم حور حمدان
عدّى على اليوم ده سنتين ونُص
اليوم اللي كنت فيه ماسكة الموبايل، وببص على الواتساب، ومش شايفة غير حاجة واحدة
قطتي الجديدة
قمرين… حرفيًا قمرين
كنت لسه باعتلها صورة وكتبتلها بفرحة طفلة
شايفة قطتي الجديدة قمرين ازاي.!
ردت بسرعة
نعم يختي اي دا..؟!! انتي بجد جبتي الكائن دا، دا مش قط يا روح دا نمر ياحبيبتي نمر صغير
ضحكت
وقتها ضحكتي كانت طالعة من قلبي
مسكت الموبايل ورديت عليها وأنا بضحك
نمر؟ اي كان بقا نمر اسد اي حاجة المهم ان عيونه جمال اوووي وشكله سُكر بجد.! هربية عندي كدا كدا ادهم مش هيرفض
كنت واثقة
مطمّنة
مش شايفة أي خبث
ولا سامعة أي نبرة غريبة
بس هي…
مكانتش بتهزر
ردها جه بعدها بثواني
وماله خلي عندك لحد ما ياكلك كدا وتبقي الذ وجبه اتقدمت ليه، المهم هو ادهم دا جايبلك عربية احدث موديل في عيد ميلادك يابختك بجد
ساعتها ضحكت تاني
ضحكة عادية
ضحكة واحدة مش شايفة اللي ورا السطر
قفلت الشات
وقلت
يا بنتي دي بتهزر
بس الحقيقة؟
إن الرسالة دي كانت أول مسمار
وأنا اللي كنت بدقّه بإيدي
في السنتين ونُص اللي عدّوا
اكتشفت إن مفيش خبث أوضح من اللي ييجي في صورة هزار
ولا أقسى من كلمة تتقال وتعدّي
بس تفضل عالقة جواك
من بعد اليوم ده وأنا فاكرة إن الموضوع خلص على ضحكة
بس الحقيقة إن الضحكة دي فضلت ترن في وداني
بدأت ألاحظ إن في حاجة بتتغير
مش مرة واحدة
تغيير هادي يخوّف
أدهم بقى يتأخر في الرد
وكل مرة أقول أكيد شغل
معلش يا روح كنت مشغول
كنت بصدّق
أو يمكن كنت محتاجة أصدّق
صوته بقى أبرد
وكلامه أقل
ووجوده أخف
هو ليه مبقاش يسأل زي الأول
ليه مبقاش يخاف عليا
أحاول أفتح كلام
أهزر
أفتكر أيامنا
انتي مكبرة الموضوع
الجملة دي كانت أول صفعة
مش على وشي
على قلبي
بدأت أحس إني تقيلة
إني زيادة
إني بحاول أتمسك بحاجة بتفلت
هو لو بيحبني كان حس
ولا أنا اللي اتغيرت
في مرة سألته وأنا خايفة من الإجابة
هو انت متغير ليه
سكت
السكتة كانت أطول من الكلام
مش متغير ولا حاجة بس كل شي قسمة ونصيب
الجملة نزلت عليا زي الميه الساقعة
قسمة ونصيب ليه دلوقتي
يعني ايه
هرب بعينه
يمكن مش نصيب
سابني معلقة
لا معاه
ولا من غيره
الأيام عدّت تقيلة
وأنا بحاول أقنع نفسي إن اللي حصل عادي
يمكن ربنا شايل خير
يمكن أنا اللي فاهمة غلط
لحد ما الصدفة جت
صدفة حقيرة
مش بتستأذن
اكونت اخت نرمين كانت منزلالها استوري وكانت نرمين بفستان خطوبة وجمبها ادهم
قلبي وقع
هي اتخطبت لية معقول! عشان كدا عملتلي بلوك
دخلت أقلب
أربط
أفهم
والمفاجأة اللي كسرتني
إنهم كانوا على علاقة
قبل ما يمشي
قبل ما يقول قسمة ونصيب
يعني وهو بيهرب مني
كان بيقرب منها
يعني وأنا بحاول أصلّح
كان هو بيبني حكاية تانية
ساعتها افتكرت الرسالة
والضحك
والهزار
هي مكانتش بتهزر
كانت عارفة
وأنا؟
كنت مطمّنة
وواثقة
وعميانة
فهمت إن في ناس بتدخل حياتك تضحك
وتسيبك مكسورة
وإن أول مسمار
مكانش كلمة
كان ثقة
مواجهة
ولا رحت سألت
ولا حتى حاولت أسمع تبرير
سيبت الموضوع يعدّي
مش قوة
تعب
قعدت أفكر في كلمة نمر
وفي الضحكة اللي خدتها على إنها هزار
اكتشفت إني كنت خايفة من حاجة عمرها ما آذتني
وقريبة من ناس هما اللي أذوني
القط اللي قالوا عليه مفترس
عمره ما غدر
ولا خبّط من ورا
ولا لعب على وتر
اللي غدر كان بني آدم
ضحك
وقال هزار
وكان عارف هو بيعمل ايه
ساعتها فهمت
إن الغدر مش شرط ييجي من الوحش
أوقات بييجي من إنسان عادي
قريب
ومأمون
ومن غير ما أتكلم
قررت حاجة واحدة
إني بعد كده أخاف أقل
وأثق أبطأ
مش كل اللي بيضحك آمن
ولا كل اللي أليف حنين
ودي كانت النهاية بالنسبة لي
مش قصة حب خلصت
دي قناعة اتولدت.
#تمتت
#غدر_البشر
#حكاوي_كاتبة
#حور_حمدان
تعليقات
إرسال تعليق