سكريبت مريم وأحمد كامل
سكريبت مريم وأحمد كامل
' بس انا جاي اتقدم ل مرام مش مريم يا عمي!
° أظن إن حصل سوء تفاهم ، احنا كنا فاكرينك جاي لمريم ف عشان كده هي الي جهزت و..
خرجت مرام من الاوضة ° أنا مش جاهزة للجواز دلوقتي ، أنا آسفة
العريس وأهله مشيوا ، فضلت متخشبة مكاني مش قادرة اتحرك ، كنت موضبة كل حاجة! ، فستان ، ميكب ، حتي النيلز والهيلز الي عمري ما لبستهم ، قال ل بابا أنا عاوز اتجوز بنتك ، بابا افتكر أنه أخيراً جالي عريس! ، أنا ومرام كنا توأم ، محدش يعرف يفرقنا عن بعض ، لكن عمرنا ما كنا شبه بعض لا من جوا ولا حتي في الصفات ، مكنش فينا أي حاجة مشتركة غير الشكل ، لكن ب استايلها عرفت تبقي اجمل واحدة في العيلة ، في الشارع ، في المنطقة كلها! ، كان بيتقدملها عرسان كتير جداً ، لكن أنا ؟ مكنتش مستنية حاجة ، غير إن واحد يكون عاوزني ، أي حد! ، دخلت اوضتي ولبست تيشيرت والكاب بتاعي ، مسحت الميكب ، مكنتش محتاجة makeup remover كان عياطي مسح الميكب لوحده .
° مريم متزعليش ، هو عشان مش عارفك ، لو عارفنا كان هيكون عاوزك انتي
زعقت _ مش عاوزة اسمع حاجة ، كان المفروض اعرف أنه جاي يتقدملك انتي
قربت مني وحاوطتني ب أيدها ° متقوليش كده يا مريم ، انتي اشطر واحدة في العيلة وجميلة اوي وكمان..
_ بس كلهم بيحبوكي انتي! ، انتي مجرد ما تعملي أي حاجة حتي لو بسيطة بيشوفوها ، أنا مش عاوزة ابقي زيك
يمكن مكنش ليها ذنب في خلافي معاها ؟ بس انا بردو مليش ذنب اني مش عارفة اكون زيها! اني بتقارن بيها دايمًا ، اني مش عاوزة ابقي هي ،
نزلت اشم هوا ، بابا أصر مرام تيجي معايا عشان مبقاش لوحدي ، فضلنا ماشيين وانا بتجنب ابصلها
° علي فكرة ممكن تعيطي عادي
_ أنا مش عاوزة اعيط ، كان حصل ايه يعني؟ مش حاجة جديدة
° مش لازم تبقي جامدة قدامي ، عيطي عشان قدامها نص ساعة ونروح البيت
عيطت ف حضنتني ، منكرش أن مرام عندها قلب طيب ، جميلة من جوا زي من برا ، ودايما كانت فهماني .
° بقيتي احسن؟
_ شكراً يا مرام
ابتسمتلي ورجعت كشرت ° فيه أربعة ماشيين ورانا
_ طب سرعي مشيتك طيب
فجأة وقفوا قدامنا * علي فين يحلو؟ ، ايه دا دول طلعوا بنتين! طب مالك عاملة في نفسك كده ليه؟
_ خليك في حالك وخلينا نمشي احسنلك
* احسنلي؟
شد الكاب الي كنت لبساه ف وقع علي الارض
* طب ولو مخلتكيش تمشي؟ هتعملي ايه ؟
واحد فيهم شد مرام نحيته ' يعم خلينا في دي احنا لسه هنتخانق؟
شديت مرام ورا ضهري _ لو حد لمسها تاني هزعله
* حلو ، ورينا
جه فجأة شاب كان ماسك شنطة هدوم كبيرة وقف جنبنا
= فيه حاجة ولا ايه؟
* يلا يشاطر من هنا بدل ما نمشيك علي نقالة
كان لابس نضارة ، شكله ابن ناس ، طب فين البلطجي الي هيجي ياخد حقنا يجدعان ؟
_ امشي انت عشان متتأذيش لو سمحت
= امشي ايه؟ ، هما مضايقنكم؟
* اه مضايقنهم ، هتعمل ايه؟
_ امشي انت أنا هعرف اتصرف!
ضرب اول واحد فيهم ، ضربة واحدة خليته علي الارض! كنا كلنا فاتحين بوقنا ، رجع وقف جمب مرام وقلع النضارة = بعد اذنك يا آنسة خلي بالك منها ، ها ؟ هتمشوا ولا هتبقوا زي صاحبكم؟
* دا انت زودتها اوي!
ضرب واحد تاني بس اتكاتروا عليه ومسكوا ، روحت وضربت الاتنين الي لسه ووقعوا علي الارض ، نطيت ب انتصار _ أيوة بقي اخيرا تدريب علي ناس حقيقية
= هو انتي الي حقيقية؟ انتي ضربتيهم كده ازاي!!
_ بتمرن من زمان
روحت جبت الكاب من علي الارض ولبسته
_ بالمناسبة ، شكراً اوي
= ولا اي حاجة ، تسمحيلي اوصلكم ؟
_ مفيش داعي ، تعباك معانا ، يلا يمرام
= احممم ، هي مرام وانتي؟
° مريم ، اسمها مريم
_ مرام!! ، يلا
= لو سمحتوا معلش ، متعرفوش عمارة رقم ٢١ فين؟
° دي العمارة بتاعتنا ، خير ؟
= أنا الساكن الجديد ، هاخد الشقة بتاعت عم مجدي لو تعرفيه
° دي الشقة الي فوقنا ، طب تعالي معانا احنا مروحين
وصلنا العمارة ° هي دي
= شكراً جدا يا آنسة مرام
° العفو ، الجار للجار ، بعد اذنك
كنت ساكتة عشان؟ مبعرفش اتكلم معاهم ، طلعنا وغيرنا هدومنا وجت قعدت جمبي جارنا الجديد
° شكله عسول اوي
_ طيب
° ايه ملفتش نظرك خالص ؟
_ لاء
° بجد؟ ، دا وسيم وذوق ، شوفتيه كان بيبصلك ازاي ؟
_ الي انا عرفاه انك بعد كده توسعي لبسك احنا في منطقة شعبية يعني جايز الي يحصل دا يحصل تاني وتالت ويا عالم هبقي موجودة معاكي ولا لاء
° بس انتي فرمتيهم بجد ، انتي مفيش منك يا مريم
_ ياريت بس تسمعي كلامي وتخلي بالك من نفسك المرة الجاية
نمنا وصحيت الصبح روحت شغلي ، جيت علي ميعاد الغدا ، الباب خبط ف فتحت
= معلش ممكن بصلة؟
_ افندم؟
= بصلة طبيخ؟ ، نسيت اجيب وعاوز اطبخ دلوقتي
_ اه ، ثانية ، اتفضل
= متشكر اوي يا مريم
_ العفو
= انتي عاملة ايه؟
_ طب ثواني هدخل اجيب طقطوقة واعمل اتنين لمون ونقعد نتساير
= أنا آسف ، بعد اذنك
بصيت علي مرام الي كانت حاطة أيدها علي وشها
_ مالك فيه ايه!
فيه ايه؟ فيييييه ايييييه؟ ايه الي عملتيه دا؟ دا ساعدنا مكنش مضطر أبدا يقف ويضربهم ، وبيكلمك ب كل ذوق وانتي بتردي ب كل دبش ، مينفعش كده يا مريم انتي حرجتيه اوي
= أنا مبعرفش اتكلم معاهم
_ انتي لازم تعتذري منه
= أنا عوزاكي تزودي في احلامك!
_ مريم!!!!!
= علي جثتي
خبطت علي باب شقته ف فتحلي
_ احممم ، ازيك؟
=..
_ اخبارك ايه محدش بيشوفك يعني؟
=..
_ الصحة تمام؟
= فيه حاجة ؟
_ بص هو انا جاية اقولك.. ، أنا يعني كنت.. ، قليلة الذوق شوية
بصلي ورفع حاجبه _ ماشي ، قليلة الذوق اوي وانا مينفعش اعاملك كده بالذات انك ساعدتنا ، ف حقك عليا
=..
_ مخلاص قولت حقك عليا فيه ايه؟
= انتي مبتعرفيش تكملي صح للآخر ؟ انتي.. ايه الريحة دي ؟؟ البصلة!!!
جري علي المطبخ وشوية لقيته جاي وفي أيده طاسة
= الاكل اتحرق
_ لا حول ولا قوة الا بالله ، طب ليه كده؟
= عشان انتي واقفة بقالك ربع ساعة مش عارفة تقولي انك آسفة ؟ مثلا يعني؟
_ لاء محصلش
= اعمل ايه أنا دلوقتيييي
مرام ظهرت فجأة ° الجيران بيشتكوا ، الريحة خنقاهم ، حالفين بالله لو ما كلت عندنا هيفرجوا علينا الشارع
_ مرام!!!
° ومريم الي طابخة
_ يبنتي!
° ماما مصرة
_ يحبيبت قلبي ثواني
° الاكل اتحط ، هيبرد
= لاء معلش
_ طب والله كويس ، ايه مش نازل؟
= لاء معلش أنا مش باكل الاكل بارد ، يلا بينا ؟
نزل البيت واتعرف علي ماما ، ساعتين كانوا كفاية إن ماما تحبه وصوت ضحكتها تعلي في الشقة
= تسلم ايدك ، الاكل حلو اوي
_ الله يخليك
= ميبانش عليكي انك بتعرفي تطبخي
_ وانت تعرفني عشان يبان عليا أو لاء؟
= يعني ألطم على وشي يجدعان ، لو رديتي كويس هنقول الي ردك حلو اهو؟
ضحكت _ خلاص خلاص ، أنا بجد مش بعرف اتكلم ف معلش ، قول كده تاني ؟
= يعني ميبانش عليكي انك بتعرفي تطبخي ؟
_ طب خليك في حالك
= اه ، اهههههه
' بتنادي يحبيبي؟
_ لاء يطنط تسلميلي
° الشاي ، أنا الي عملاه ب أيدي
شرب بوء = تسلم ايدك يا مرام ، من ايد نعدمها
ضحكت ف بصتله ° والله ؟ قصدك ايه يا احمد؟ ، ما انتوا دبش زي بعض
= لاء يشيخة أنا مش للدرجاتي
بصيتله وانا رافعة حاجبي _ لاء يشيخ! ، دا أي الجيرة دييييييي
= الله يكرمك
' مرام تعالي عوزاكي
مرام راحت تكلم ماما ف رجع بصلي
= انتي بتلبسي كابات علي طول ؟
غمضت عيني وانا مستنية اسمع الاسطوانة الي بسمعها كل ما حد يشوفني _ ها؟ شكلي زي الراجل؟
= لاء شكلك زي القمر
فتحت عيني _ افندم؟
= قصدي شكلك حلو يعني
_ ماشي ، شكراً
= تعرفي انك تضربي حلو اوي؟
_ بقالي سنتين بتمرن
= اول مرة اشوف ست زيك كده
_ وانا يعني لازم اكون متزوقة ولابسة فستان عشان اعجب؟
= أنا مش قصدي دا انا حتي شخصيتك عجباني ،
قصدي يعني..
_ أنا مش مستنية منك تقيمني!
سيبته ودخلت اوضتي ، بعد نص ساعة مرام دخلت ووقفت قدامي وربعت أيدها
° يعني اعمل فيكي ايه اكتر من الي ربنا عامله؟
_ فيه ايه؟
° انتي مش بيطلع منك أي كلمة حلوة ابدا ؟ دا حتي بيقول شخصيتك عجباه
_ مرام انتي كنت واقفة تسمعينا؟
° يعني مش بالظبط، دا انا وانا معدية بالصدفة سمعت أنا وماما ، ماما أغمي عليها فوقتها وجتلك
ضحكت _ انتوا عاوزين ايه ؟
° شاب كويس ، ابن ناس ، محترم
_ وماما قالتلك ايه تاني؟
° لاء يمريم أنا بقول من دماغي محدش بيمليني
ماما دخلت الاوضة ' ومهندس يساقطة نسيتي تقوليلها أنه مهندس
_ انتوا مكبرين الموضوع ، دا مجرد جارنا ، مش عاوزة اتكلم في الموضوع دا تاني
' بس انتي حرجتيه ولازم تعتذري!
_ نعم يماما؟ لاء دا انتوا بتحلموا بجد
' مريممممم!
_ علي جثتي
_ احمممم ، معلش متزعلش ، مكنش قصدي ارد عليك وحش امبارح
= هو انتي بتخافي من الرجالة؟
_ أنا ؟؟؟ لاء طبعاً مبخافش من حد
= متأكدة ؟
سكتت ، هو ازاي عرف ولاحظ حاجة زي دي ؟ هو باين عليا اوي ؟ = أنا مستحيل أذيكي
_ محدش يعرف يأذيني
= طب انزلي تحت مدي ، انا غلطان اني بطمنك
ضحكت _ احمد انت عاوز ايه ؟
= مينفعش نتعرف علي بعض ؟
_ طب ما مرام موجودة ، مرام بتعرف تتكلم عني ، بتعرف تلبس ولبقة في الكلام وتفتح مواضيع وترد كويس ، اتعرف عليها
= أنا عاوز اتعرف عليكي انتي! منا لو عاوز اتعرف علي مرام هكلمك انتي لييييه؟
_ وانت ليه تعمل كده؟
= طيب انا هقولك ، بس انتي اتفهمي الموقف
_ عيب عليك أنا متفهمة جدا
= أنا عارفك يا مريم ، ومعجب بيكي من زمان
طلعت اجري علي السلم وقفلت باب الشقة ورايا ، تفاهم ايه ؟؟؟؟ هو بيقول ايه؟
° مالك فيه ايه ؟
_ أحمد!
° ماله؟ ، قولتيله ايه المرادي ؟ هتخليه يعزل ولا ايه ؟
_ قاله أنه معجب بيا!
° لاء تعالي احكيلي بالتفصيل
قعدنا في اوضتنا وحكيتلها الي حصل ° اه ، يعني قالك أنه معجب بيكي؟
_ اه
° وعارفك من زمان؟
_ اه
° وبدل ما تقفي تتفاهموا ويقولك عرفك ازاي طلعتي تجري زي الزرافة المتسابة؟
_ هو مش بالظبط
° انتي عاوزة تموتينا كلنا وتقعدي انتي يعني ولا ايه مش فهماكي؟
الباب خبط ف روحنا وقفنا قدامه ° مين؟
= افتحي يمرام أنا احمد ، وخلي اختك تقف مكانها احسن والله اديها دماغ امددها علي الارض
_ الظاهر أنه متعصب ، يتري ليه؟
° يبجحة!!!
فتحت الباب ف بصلي ب ابتسمت ب سماجة _ أهلا وسهلا
= مرام ، ادخلي اعمليلي شاي
° انت متأكد ؟
= هشربه ، هشربه مهي سقياني المر
_ اختي مش هتسيبني علي فكرة انت بتحلم! علي جثتها بقولك
° في رعاية الله
مرام دخلت المطبخ ف برقت _ اه يعني انت جاية معاك ب ايه؟
= بتجري يمريم؟ ليه هو انا لسه قولت حاجة ؟
_ كمان عاوز تقول؟ انت ازاي ؟
= طب اقعدي
_ انت خدت علينا اوي
= أيوة منا هبقي من العيلة
_ نعم؟
= أنا معرف مامتك كل حاجة
قعدت _ نعم؟؟؟؟؟ معرفها ايه؟
= أنا هتكلم ، سمعت صوتك هزعلك ، مدام التفاهم مش جايب همه
_..
= أنا كنت بشوفك في الجيم ، فاكرة الشاب الي عاكسك بعد ما خلصتي تمرين؟
بصيت علي السقف _ لاء مش فاكرة
= أيوة يقادرة الي عدمتيه العافية ، دا كان صاحبي
_..
= كنت عاوز اقرب منك واعرفك ، اتكلم معاكي بس كنت عارف اني لو حاولت هيبقي مصيري معروف يعني
ضحكت _ وبعدين ؟
= عرفت عنوانك ودورت علي شقة تكون فاضية عشان اكون قريب منك ف طلعت الشقة فوقكم ، يعني ربنا مسهلها ، إشارات والله
_ انت عملت كل دا عشاني؟؟
= عشان بحبك يا مريم
_ ها؟؟؟
= ها هتقومي تجري فين ؟ شقتكم اوضه وصالة تبقي تتحركي من مكانك بقي
_ أنا مش عارفة اقولك ايه
= لاء متقوليش ، عاوز بقي توافقي نتعرف علي بعض ، خطوبة مثلاً ؟
_..
= متخافيش يا مريم ، أنا والله عاوز فرصة بس اثبتلك فيها اني فعلا بحبك
_ لاء مبخافش
= بردو؟ يعني بردو؟
° الشاي يا احمد
= سمي اختك بيه ونادي علي الحج والحجة عاوزهم
مش مصدقة أننا اتخطبنا! ، معملناش خطوبة بقرار مني ، لبسنا الدبل في المحل وعرفنا الجيران والحبايب ، أيدي بقي فيها دبلة!
° خلي بالك يا احمد
_ أيوة وصيه عليا يمرام
° لاء بقوله خلي بالك من نفسك
بصينالها احنا الاتنين = ها؟ يعني مش طالبين حاجة تانية؟
' تسامحنا يبني
_ ماما!!!!
اتفقنا نبقي صحاب ، مكنرش إن اكيد كان فيه مشاكل بس كانت كلها بتتحل بيه ، مكنتش اعرف ان الحب الي كنت بقرأ عنه حلو اوي كده ، بقي صاحبي الوحيد واقرب حد ليا ، شبهي في كل حاجة وبيعمل أي حاجة عشان يرضيني ، مكنش صعب احب واحد زي احمد .
° حبيب اخوك ، فرح اختي لو مجتش بزعلة
= انت مين يحبيبي ؟ أنا معرفكش!
° لو مخمستش معايا بالموتوسيكلات قدام القاعة بموتة
= حبيبقلبي بس كده دا احنا عنينا
ضحكت ف بصلي = مين دا؟
_ دا عاطف ، فرح أخته بكرة وكل المنطقة معزومة
طلعت اجهز للفرح ، مرام خلصت من بدري ف بصتلها
_ هو ممكن تحطيلي ميكب؟
° ها؟؟؟؟ عاوزة تحطي ميكب بجد؟
_ أيوة ، وهلبس الفستان الأسود
° انتوا نازلين ديت ولا ايه؟
_ لاء دا عشان الفرح ، يلا عشان نلحق
خلصنا وماما ومرام راحوا القاعة سوا في الاول وانا نزلت عشان احمد كان مستنيني
= شكلك ، تحفه
_ شكراً
فتحلي باب العربية بتاعته ، زي أي مشهد كنت بشوفه في الافلام ، كنت ساعتها بستغرب البطلة ليه مبسوطة لكن دلوقتي بس عرفت ، أي إحساس إنك مع شاب وسيم ، لطيف ، ذوق ، وحبيبي .
خلص الفرح وقولت ل ماما اني هتمشي للبيت ، خرجنا احنا وأحمد ومشينا
= علي فكرة ، شكلك ب التيشيرتات والكاب كان حلو اوي بردو
_ بجد! انت اول حد يقولي كده ، اصل في العيلة بيقولولي عمرنا ما شوفناكي لابسة فستان زي البنات ، ف كنت بعند اكتر ، مكنوش فاهمين اني بلبس الي بيريحني ، الي شبهي ، مش شرط ابقي..
= زي باقي البنات
بصتله وابتسمت = ومع ذلك كنتي احلي واحدة في الفرح النهارده
_..
= مش مصدقاني؟
ضحكت _ الصراحة لاء
= انتي احلي واحدة في الدنيا يا مريم مش في الفرح بس
_ هو الهيلز دا بيقلعوه ازاي؟
= ليه؟
_ عاوزة اجري
= طب اثبتي طيب هو انا شاقطك؟ منا خطيبك هو فيه ايه؟
_ انت قلبك جايبك اوي ، انت نسيت انا مين ، لا يكون شوية الاحمر والفستان خدعوك؟
= يوه شوف الشيطان وعمايله بقي ، معلش يمريم زي بعضه
_ أيوة كده اظبط حالك ، ها كمل
= لاء اكمل ايه بقى
_ أحمد ؟؟
= عاوزة اييييييييه؟
_ هتسيبني هنا لوحدي؟
= بلاش البصة دي
_ طب خلاص انا هروح لوحدي
غمز = متهونيش عليا
_ أنت عينك بتوجعك؟
= لاء يا روحي
_ اروح فين ؟
= يادي النيلة عليا وعلي الشورة الي انا فيها
_ أنت عاوز ايه؟
= عاوز اتجوزك
_..
= اقسم بالله؟ مريم انتي مكسوفة؟
_ البلاشر الي حطاه ماركة ولا ايه؟
=..
_ خلاص والله بهزر
= طب هقول الكلمتين الي محضرهم من امبارح ، مترديش حلو مش عاوز منك حاجة بس مترديش وحش علي الاقل
_ بس كده دا احنا عنينا
= مريم انتي حيطة
_ افندم؟
= لاء مش قصدي ، قصدي انك ارجل واحد في صحابي
_ انت كده محضر؟ ، ليه كنت مبرشم وانت بتتدرب يعني ولا ايه؟
= منتي موتراني
لفيت وشي _ ها؟ اخلص؟ ياريت ننجز ؟
أنا يمكن مبعرفش اتكلم اوي بس معاكي بكون عاوز اتكلم في أي حاجة ، المهم ابقي جمبك وشايفك ، ومستعد اعمل اي حاجة عشان اشوفك مبسوطة ، انتي اطيب واحن واجمل ست أنا شوفتها في حياتي ، وهبقي اكتر راجل محظوظ لو قبلتي تتجوزيني ، من اول ما شوفتك وانا متأكد اني هحبك و.. بصيلي عشان رجلي وجعتني
لفيت لقيته نازل علي رجله فاتح علبة فيها خاتم
=..
_ لاء انجزي يمريم متهزريش
= ما تصبر يعم ، دا أي عرض الجواز دا
قام وقرب مني _ والله؟ بعد كل الي قولته مش عاجبك؟
= هات العلبة دي أما اشوف الخاتم بيقول ايه
_ يعني موافقة؟
= أيوة
_ ليه؟
= جرام الدهب دلوقتي داخل علي سبعة ف شهرين كده واسيبك واخلع بالشبكة
_..
= احمد ؟؟؟
_ انتي مش هتبطلي يعني؟
ضحكت = عشان بحبك
_ بجد؟ ، يلا الحمد لله راضي يا رب
= بقولك ايه يا احمد
_ نعم يا روحي
= اروح فين؟
° معندوش فيس! ولا انستا!!!
_ حبي الاول واملي الوحيد بقولك
° مريم هو دا الي بتكتبي عنه؟
_..
° هو دا الي بتكتبي عنه!!!!
_ أيوة يا ليلي ، هو
° بتكتبي عنه بقالك خمس سنين وهو ميعرفكيش ، طب ليه؟
_ هو أول راجل اكون عاوزة اشوفه بدل ما اهرب منه ، مش ب أيدي والله غصب عني
° لازم تعودي نفسك بعد كده تشليه من دماغك ، هو ميعرفكيش ، محدش بيحب حد ميعرفوش!
كلامها كان قاسي؟ يمكن ، بس كان معاها حق ، اول مرة كنت اشوفه فيها كنت في خطوبة ناس تبع بابا ، كانت خطوبة مملة نظراً اني مكنتش عارفة اي حد هناك ، لحد ما شوفته ، اول راجل يشدني مكنتش خايفة منه! ، قد ايه كانت ملامحه مريحة وطيبة ، لحد ما بدأت اكتب عنه ، اكتب وصفه ، شكله ، قد ايه هو لذيذ و وسيم ويتحب ، هو ممكن في يوم من الايام يعرفني؟ اني كنت بكتب عنه ، بكتب عنه دايما ؟
روحت قعدت في الكافيه الي بشوفه فيه ، باخد طربيزة بعيدة عنه ، بكتفي بس اني اشوفه من بعيد ، الحب بدون امل اسمي معاني الغرام؟ مستحيل ،
المرادي جه ب بدلة ومعاه لاب توب ، قعد وفتحه وعدل ربطة البدلة ، كان بيهز رجله ، أيده ، بتنقس بسرعة ، ساكت كأنه مستني حاجة ، بعد فترة بدأ يتكلم ويعرف نفسه ومؤهله ف فهمت أنه انترفيو اونلاين ، بعد خمس دقايق بالظبط قفل اللاب وعيونه الي كانت مليانة امل اطفت! ، فك اول زارين من القميص ، بدأت ألمح الدموع الي اتجمعت في عنيه ، وقف وبدأ يلم حاجته وفجأة وقع ، كل الي في المطعم اتلم حوالين طربيزته ، جريت عليه ونزلت ل مستواه _ انت كويس ؟؟؟
مكنش بيرد ، طلعت فوني بسرعة ورنيت علي زميلي
_ عبدالله انت في المستشفى ؟
° أيوة ، عاملة ايه ، ايه الدنيا ؟
_ الحمد لله أنت أي الاخبار ؟ طمني عليك بجد ؟
° والله يا مريم ماشي الحال و..
_ انت عبيط يسطا؟ ابعتلي الإسعاف علي الكافيه الي علي اول الشارع حالاً
° اشمعنا ؟
_ لاء مفيش ، عاوزة العب شطرنج ومش لاقيه حد ف تعالي انت والرجالة
° فعلاً ؟
_ فيه واحد مغمي عليه تعالي شيله خلصني
° أشيل ايه؟ وعملية الغضروف الي لسه عاملها؟
_ طب اسمع صلاة النبي حلو؟
° عليه افضل الصلاه والسلام
_ والله العظيم يعبده إن مجيت حالا هقول لخطيبك علي الدكتورة الي كنت واقف معاها امبارح
° خمس دقايق هكون عندك ، في رعاية الله
الاسعاف جت وشالته ، الدكتور كشف عليه وكتبله محاليل وركبتهاله ، فضلت قاعدة علي كرسي قدامه في الاوضة ، دا لو حد شاف وشي هيفتكر أنه متجوزني، هو انا واقعة ليه كده؟ لا حول ولا قوة الا بالله ما تقوم يحبيبي بقي خليني اختار اسماء عيالنا! ،
فتح عينه_ انت كويس؟
= أنا فين؟
_ في المستشفي ، نقلناك علي هنا بعد ما وقعت ، انت مكلتش بقالك فترة؟
=..
_ انت لازم تاكل ، المحاليل مش هتعمل حاجة من غير اكل ، أنا هروح اجيبلك اكل واجي
= أنا مش عاوز حاجة ، انتي الي جبتيني هنا؟
رجعت قعدت قدامه _ ايوة ، ممكن تهدي؟
= أنا عاوز امشي لو سمحتي ، فكي المحاليل دي
_ مش هينفع ، أنت كده بتموت!
= معتتش فارقة ، أنا عاوز امشي
_ أنت مالك؟
= نعم؟؟
_ مالك ؟ احكيلي أنا هسمعك؟
= افندم؟؟؟
_ هو انت هتفضل مستغرب كتير؟ ، أنا مريم ممرضة هنا علي فكرة
= عارفة يا اسمك ايه انتي؟
_ لاء معرفش ، واسمي ايه دي هحاسبك عليها بعدين
ضحك وبعدين بص قدامه = انا كنت من أوائل دفعتي في خمس سنين الكلية ، كنت بعمل كل الي اقدر عليه عشان بعد ما اتخرج ابقي الراجل الي ابويا نفسه فيه ، بس انا معرفتش حتي ألاقي وظيفة ثابتة ، معرفتش اعمل اي حاجة ، كانت كل الظروف ضدي مع اني والله كنت عاوز بس ابقي كويس ، مكنتش عاوز حاجة مستحيلة يعني عشان يحصلي كل دا ، طب ناقص ايه معملتوش؟ أنا حاولت و..
بصلي من فوق لتحت = هو حضرتك بتهببي ايه ؟
_ قصة مؤثرة ، كمل
= اكمل ايه هو انتي بتعيطي ليه؟
مسحت وشي _ يعني حياتك تصعب علي الغريب والله
= نعم؟ ، هي دي مواساتك؟
_ دنيا غريبة يجدع طب نعمل ايه
= بقولك ايه ، مش النيرس بردو ؟
_ الحمد لله ، اتفضل
= الباب في ايدك بقي ، بدل ما ألم عليكي المستشفى اقول عاوزة تديني حقنة هوا ، يلا مدي من هنا
_ بهزر مع حضرتك يا فندم جري أيه ، أنا متأكدة انك هتلاقي شغل كويس
= وايه خلاكي متأكدة؟
_ انك شوفتني ، أنا وشي حلو علي كل الي يعرفني
= بجد؟
_ تلاتة جرحي واتنين مصابين وخمسه مفقودين في ظروف غامضة
= ايه؟؟
ضحكت _ عارف ؟ لو كنت شوفتني من خمس سنين مكنتش هتصدق اني الي واقفة قدامك دلوقتي ، مكنتش عاوزة ادخل كلية تمريض ، حاولت كتير في ثانوي عشان ادخل الكلية الي نفسي فيها بس معرفتش ، فضلت اربع سنين من عمري مجبورة علي حاجة مبحبهاش ، كنت متأكدة اني لو كنت موجودة في مكان بحبه كنت هحب الي بعمله ايا كان كمية الضغط الي هبقي فيها ، بس محصلش! القدر كان عكس حلمي ، بس انا عملت ايه؟
= عملتي ايه ؟
_ رضيت وقولت اكيد ربنا عشان كاتبلي الحاجة دي يبقي دي الي هعرف ألاقي نفسي فيها ، ومن بعد ما كنت مش بطيق انزل المستشفى بقيت عاوزة اجي كل يوم عشان بس اسمع الدعوات الي بسمعها والكلام الي بيحسسني اني بعمل حاجة كبيرة اوي باخد عليها دايما ثواب ، طول ما ربنا معاك ف ارمي حمولك وانا عارفة أنه عمره ما يردك ، ومهما كان الطريق مسدود هيجي يوم وهتٌفرج ، بكرة تفتكر الايام دي وتضحك عليها ، متزعلش نفسك
= ونعم بالله ، متشكر اوي
_ العفو ، هروح اجيبلك أي حاجة تاكلها
= مريم مش كده؟ شكراً يا مريم انتي طيبة اوي ، وشكراً انك ساعدتيني وجبتيني هنا
_ متقوليش كده دا شغلي وواجب عليا ، لو متين جنيه كرمشها في ايدي قبل ما تمشي
ضحك ، كنت بصاله مش مصدقة أنه قدامي ، اني دلوقتي قاعدة وبتكلم مع الراجل الوحيد الي حبيته!
خرجت وقفلت الباب ، مشيت ف خبط في ليلي
° انتي يحجة فيه ايه؟
_ عارفة مين جوا؟
° مين؟
_ أحمد
° احمد مين؟
_ هو انا اعرف كام احمد بذمتك ؟؟؟
° احمد!! جوا بيعمل ايه؟
_ بياخد تان ، متعصبنيش ، متلقح جوا تعبان
° متلقح؟ غريب الحب مين فاهمه
_ باين علي وشي اني اعرفه؟
° لاء تعرفيه ايه ، دا باين ان كتب كتابك النهارده ما تهدي شويه!
_ هبقي تقيلة أي العبط دا بجد
° أيوة كده جدعة
_ ابحثي عن ميكب يليق علي وشي في فرحي لحد ما اجيب اكل واجي
° ها؟؟؟
روحت جبت اكل من الكافتيريا ودخلت الاوضه حطيته علي الطربيزة = تعبتك معايا
_ ولا اي حاجة ، حاسس انك احسن ؟
= اه الحمد لله ، فرصة سعيدة جداً يا مريم
_ الله يسعدك
= نعم؟ لاء مترديش تاني بقي
ضحكت _ هتدور علي شغل؟
= مفيش حلول تانية ، هدور اكيد إن شاء الله
_ ربنا معاك ، ممكن رقمك؟
= ايه دا كده علي طول ؟ بس كده دا احنا عنينا
_ احترم نفسك يا احمد
= محترم يا مريم
_ هات رقمك عشان لو فيه اي فرصة عمل مع حد من معارفي اقولك عليها
اداني الرقم ومشي ، روحت بعدها علي طول علي مكتب المدير
_ ازي حضرتك يفندم؟
° الحمد لله ، تعالي يمريم اتفضلي ، خير فيه حاجة ؟
_ كنت عاوزة اسأل لو فيه فرصة عمل متوفرة هنا؟
° لمين؟
_ واحد معرفة محتاج الشغل اوي
° خريج ايه؟
_ هندسة ، ينفع؟
° ضمناه يعني؟
_ اوي ، هتبقي خدمة عمري مهنساها لحضرتك
° متقوليش كده ، أنا عمري ما انسي انك كنتي السبب بعد ربنا في انك تنقذي حياة ابني الوحيد
_ دا واجبي يفندم
° ممكن يشتغل في حسابات المستشفى ، هيفضل اسبوعين تدريب لو تمام هيتثبت لو مش تمام للاسف مش هينفع ، انتي عارفة المستشفى مسؤولية
_ ربنا يخلي حضرتك ، أنا هخليه يجي يقابلك بكرة وتتفقوا ، أنا بجد متشكرة اوي
بليل رنيت عليه = ألو؟
_ ألو؟؟؟؟؟ دا انا اعيد حساباتي بعد الكلمة دي
ضحك = مريم؟ ازيك ؟
_ الحمد لله ، صحتك عامله ايه؟
= الحمد لله والله كله تمام
_ أنا كلمت مدير المستشفى ووافق تشتغل في الحسابات ، بص هو انا موصلاله انك في نفس مستوي ذكاء اينشتاين ف احفظ جدول الضرب وتعالي
= انتي بتتكلمي بجد؟
_ اه والله ، بكرة الساعة تسعة تروحله مكتبه إن شاء الله
= ليه عملتي كده؟
سكتت ، مبلاش الأسئلة الي تخليني اقول اسباب حقيقة توديني في داهية بقي .
_ مش عارفة ، حسيت اني لازم اساعدك
= أنا مش عارف اقولك ايه يا مريم ، بجد شكراً
_ العفو ، ولا اي حاجة
قفلت معاه وانا مبسوطة ، هيبقي موجود قدامي كل يوم ، مش هبقي مضطرة اروح الكافيه واقعد بعيد!
الصبح روحت المستشفى ، شوفته داخل المكتب فضلت قاعدة في الاستراحة مستنياه يخرج ، خرج بعدها ب ربع ساعة وبصلي
_ فيه ايه؟ هو رفض!!
=..
_ دا انا مأكدة عليه ، أنا..
= اتقبلت! شاف ال CV بتاعي وعجبه اوي وثبتني علي طول
_ طب الحمد لله ، الف مبروك يا احمد
= أنا مش عارف اقولك ايه
_ مفيش حاجة ، بعد اذنك هروح اشوف الحالات الي مسكاها
في ظرف تلت ساعات كانت المستشفى كلها شافته نظراً أنه واقف في الاستقبال .
' ايه دا؟ مين دا؟ واتعين امتي؟ ورقمه فين؟
_ اهدي يقلبي منك ليها ، دا موظف الحسابات الجديد
' يعني قاعد هنا علي طول؟
_ للأسف ، دا ايه فيلم المراهقات الي وقعت فيه دا
ليلي ميلت عليا ° هو؟
_ أيوة هو
° ما شاء الله ، انتي الي جبتيه؟
_ يعني مش بالظبط
° طب حرسي بقي عشان في ظرف تلت ايام هنسمع كلنا اخبار حلوة
_ يبنتي دا تقيل موت
° هي نانسي الي واقفة معاه دي؟
بصيت نحيتهم ورجعت بصتلها _ بقولك تقيل موت
صوتت _ نانسي؟ ملكة جمال المستشفى ؟؟؟؟ تعالي يا ليلي
' هو انت شغال هنا جديد صح؟
هز راسه = أيوة أي خدمة؟
' أنا نانسي ، ممرضة هنا ، وأنت ؟
= احمد
' فرصة سعيدة ، للاسف عندي شغل دلوقتي اشوفك تاني
مشيت ف رجع بصلي = ازيك عاملة ايه؟
° احممم طب أنا همشي بقي يمريم هشوف الحالة بتاعتي
ليلي مشيت ف رجع بصلي = مالك؟
_ مفيش ، انت مرتاح؟
= اه الحمد لله ، الناس هنا لطيفة اوي
_ منا واخدة بالي أنهم بيلطفوا فعلاً
= يعني ايه؟
_ نصيحة مني ، اتنين هيوقعوك من طولك ، البنات و..
= السياسة؟
_ لاء ريحة البنج في المستشفى يا ساتر ف خلي بالك ، ركز في شغلك يا احمد
= أنا معملتش حاجة يا مريم
_ احترم نفسك يا احمد
= محترم يا مريم
أنا غلطانة اني جبته ، ما كان مجهول الهوية ومحدش عارفه غيري والدنيا ماشية ، سيرته بقت علي كل لسان طب ارقع بالصوت يجدعان؟
_ عبده الحالة بتاعتك بتشتكي منك
° طب اعمل ايه اكتر من الي بعمله؟ دا انا طالع عيني ومبنامش
_ الحالة بتشتكي انك نايم طول الشيفت صباح الفل
° من التفكير بقي يا مريم طب اعمل ايه!
ضحكت _ طب روح شوفها وام ابراهيم لو اشتكتلي تاني انت حر
= هو مين دا؟
_ ايه دا ازيك يا احمد؟ ، دا عبده زميلي ، فيه ايه؟
= لاء مفيش حاجة ، بسأل بس ، دمه خفيف؟
_ اه موت ، اسألتك كترت
= طب روحي شوفي وراكي ايه
كنت حاسه أنه هيكسر عليا المستشفى بس معنديش دليل ، هو ليه مضايق؟، خلصت الشيفت بتاعي وطلعت برا المستشفى استني أي مواصلة ، جه وقف قدامي
= كنت بدور عليكي
_ عليا أنا؟ ليه؟
= كنت عاوز اديكي حاجة
_ حاجة ايه ؟
طلع من ورا ضهره بوكيه ورد ف بصتله ب استغراب
_ هو ايه دا؟
= ورد
_ ليه؟
= بكرة عيد الأم
_ نعم؟ انت جاي تدور علي حنان الام عندي يعني ولا ايه؟
ضحك = الورد دا عشانك ، انتي السبب بعد ربنا إني اشتغل هنا ف اول قبض ليا قولت لازم اجيبلك هدية واشكرك
_ مكنش ليه داعي تتعب نفسك
= معجبكيش؟
_ دا حلو اوي
= يبقي تقبليه مني ، ممكن؟
_ ممكن
= شكراً ، وشكراً انك كنتي كويسة معايا
_ متقوليش كده يا احمد ، احنا زمايل
= بس؟ ، قصدي.. ، بصي يا مريم هو انا.. هو انتي عاملة ايه ؟
ضحكت _ أنت متوتر ليه؟
= أنا عاوز اتعرف عليكي اكتر
_ يشيخ يوم ما تحب تتعرف علي واحدة تسيب كل الي في المستشفى دول وتيجيلي انا! ، دا فيه بنات حلوة اوي وكمان معجبين بيك و..
= بس انا معجب بيكي انتي
_ ها؟؟؟
= وعاوز اجي دوغري ، اتقدملك يعني
_ ها؟؟؟؟ أنا لازم امشي دلوقتي
= بس انا معرفتش ردك ، ومش قادر احدد انتي مكسوفة ولا اتجننتي منا مش فاهم ، انتي مش موافقة طيب؟
_..
= مش موافقة؟
_ ممكن أمشي ؟
وقفت تاكسي ومسكت الباب _ احمد ، هبعتلك رقم بابا
= قولتي ايه؟؟؟
_ اطلع يسطا بالله عليك
كأني في حلم ، جه اليوم الي الدنيا كلها متسعنيش فيه ، كنت بكتب كل مرة والنهاية تكون سعيدة ، بس مكنتش اعرف إن نهايتي هتبقي اسعد من أي نهاية كتبتها قبل كده ، وإن بطل رواياتي بقي أخيراً معايا! إن بقي عندي ادفي قصة حب أنا عرفتها .
روحنا بعدها محل الدهب = نقي براحتك
_ أنا ميهمنيش الدهب يا احمد
= اللهم صلي علي النبي ، أنا اختارت صح
_ ست غوايش يا ريس بعد اذنك
= استني يا امااااال ، مريم انتي بتتكلمي بجد؟
_ عشان يعملوا صوت وانا بقطعلك البطة
= والله ما هنلاقي ناكل بط اصلا متهزريش
_ أنا مقدرة كل ظروفك وفي ضهرك بجد
= العوض والله
_ عاوزة طقم الأسد الدهب لو سمحت
= بقولك ايه خدي امك وابوكي وبلاها دي جوازة
_ بقولك بقليلي برضي
= اطلعي من دور الضحية دا بقي ونقي الشبكة
عملنا خطوبة بسيطة اوي ، عدت نسمة ، محدش حس بيها ، أنا نقطة ضعفي السمبلة
= فيه ٢٠٠ نفر تحت ، انتي مش مأكدالي انك كتومة؟
_ لاء بص بقي مدام الموضوع موصلش ل جريدة اليوم السابع أنا كده مفتحتش بوقي
= دا انا هخليكي تشاوري بعد كده حاضر
اتخطبنا ، كان صاحبي ، بيسمعني ويطمني ، بنحكي كل حاجة واي حاجة واحنا متأكدين إن التاني هيفهم ، فضلت خمس سنين احبه وكنت خايفة اكون ضيعت عمري ، بس طلع احسن اختيار عملته اني اختارت احمد .
= مريم مش انا نزلت فيس امبارح؟
_ وحش وحوش التكنولوجيا ، احنا في الAi والروبوتات وانت لسه محمل الفيس امبارح ، خطوة متهورة
= يعني كويس اني حملته؟
_ أنا مكسوفالك يبني والله بس اه كويس ، عاوز ايه؟
= اصل دخلت علي الاكونت بتاعك
_ اه
= وقرأت الي بتنزليه
_ اه
= عرفت يعني أنك بتكتبي عن واحد اسمه احمد ومهندس بردو
_ بردو؟ يا سبحان الله
= وتقريباً نفس مواصفاتي بالملي
_ اه
= اه ايه ؟ انتي لسه في مرحلة الصدمة طيب ولا ايه؟
_ مهو الي زيك مينفعش يبقي عنده فيس ، انت اخرك نوكيا ب زراير
= يعني مطلعة عيني كل دا وتطلعي اصلا بتكتبي عني!
ضحكت بسخرية _ اكتب عنك انت؟ هو انا اعرفك؟
= مريم!!!!
_ طب روحني وعدي يومك
= يعني بتحبيني؟
_..
= هو انتي بتبصي في الأرض هتعملي فيها مكسوفة ؟
_ احترم نفسك يا احمد
= محترم يا مريم ، تيجي ننزل بكرة ديت؟
_ ديت؟
= بكرة الساعة تمانية ، هبعتلك اللوكيشن علي الواتس
روحت وطلعت تقريبا كل هدومي ، أنه كشفني وعرف اني بكتب عنه دي عادي ، ديت دي الي زعلتني اجيبله اوت فيت ينفع ل ديت منين دلوقتي؟
قررت اني هلبس فستان برجندي بسيط ، كنت مفصلاه من فترة لمناسبة بس جالي شغل في المستشفى ومروحتش ساعتها ، اظن مفيش مناسبة احسن من كده
لبست الفستان ، الهيلز ، عملت ميكب بسيط ونزلت ركبت تاكسي ووصلت المكان ، كان قاعد مستنيني
= شكلك حلو اوي
_ ربنا يسترك
= طب اقعدي وحاولي مترديش تاني بجد
قعدت ، شاور للويتر ف حط قدامي بوكيه ورد ، فتح علبه كان فيها خاتم وقدمهولي
_ احمد دي محالة اغتيال؟
= يعني التراست ايشو مش هتسيبك بردو؟
ضحكت _ شكراً ، شكله حلو اوي
= مريم أنا بحبك
_ بتقول ايه؟ انت بتتكلم بجد؟
= بجد ؟؟؟ انتي هتعملي متفاجأة؟
_ خلاص هسكت بجد
= من اول يوم شوفتك وانا حاسس بحاجة ، معرفش مشوفكيش كل يوم ، كنت بعمل أي حجة عشان اجي واتكلم معاكي ، كنت هبقي غبي لو مختارتكيش تكملي معايا الي جاي ، انتي اطيب ست أنا شوفتها والوحيدة الي كنتي معايا علي الدنيا مش مع الدنيا عليا ، مش هعرف ألاقي زيك تاني يا مريم
_..
= هو معلش انتي بتهببي ايه ؟ انتي بتعيطي ليه؟
_ مهو انت بتقول كلام مؤثر ، ثواني
مسحت وشي _ الورد حلو اوي
= ماشي و..؟
_ والخاتم تحفه
= طيب وبعدين؟
_..
= تسمحيلي احرجك واكسفك واقولك انك بتكتبي عني يا بجحة ومش عاوزة تنطقيها؟
_ اكتب عنك ايه يبني بقولك معرفكش
= مريم؟؟؟؟
_ طيب طيب ، ماشي أيوة بحبك ، خلاص ؟
= متجيش دوغري ابدا بجد
_ بقولك ايه يا احمد؟
= قولي يحبيبي ؟
_ مش هتجيبلي طقم الأسد الدهب بردو ؟
مريم سمير 🤍.
تعليقات
إرسال تعليق