رواية زين الصعيد الجزء الثاني الفصل العاشر والحادى عشر بقلم منه الله رافت
رواية زين الصعيد الجزء الثاني الفصل العاشر والحادى عشر بقلم منه الله رافت
=العاشر /زين الصعيد
فما عدت أملك في الأرض شيئًا اوهم به نفسي، أنا هوامش، مدينة ليس لها وجود ، أنا العنوان على كتاب لم يكتب، لست بأحد أنا، أنا لا أحد.
___________________
انقضى اليوم وصعد كل فرد لغرفته
في غرفة ليل كانت تجلس معها حورية
ليل بفرحة...: طب شفتيه لما قام وقال لا
حورية بشك...: كلنا شفناه يبنتي بس المهم هو عمل كدا ليه؟
ليل وهي تلكزها وتقول بحدة...: انتي يبت عبيطة؟... واقعة على دماغك وانتي صغيرة؟... الراجل اتحمق لما اتطلب ايدك... اكيد بيحبك
حورية بحزن....: لا يبنتي... دا مبيطقش يبص في وشي وكل ماعمل حاجة الاقيه بصلي بكُره وغضب
ليل...: يعبيطة ماجايز بيتوه ع الموضوع... او مستني مثلا لما يقدر ياخد الخطوة.
حورية...: وهو ايه اللي مانعه؟... انتي هتستعبطي ياليل!.. ظافر معاه كل حاجة وعنده كل المواصفات اللي تخليه يتجوز النهاردة قبل بكرة... بس المؤكد انه مش بيحبني... هو ممكن شايفني زي اخت من اخواته البنات مثلا
ليل...: طب اسمعي ما إيه رأيك توافقي ع العريس وتشوفي طريقه ايه؟
حورية...: وبتقولي عني اني انا اللي عبيطة؟... ليل!!!.. انتي عاوزاني اتجوز من واحد تاني غير ظافر؟
ليل...: يبنتي كدا وكدا... اما نشوف الاخ ظافر دا هيعمل ايه؟... بس اسمعي... نفذي اللي هقلك عليه.. انتي عارفة انه دلوقتي بيكون قاعد في القاعة لوحده
حورية بكذب...: لا مش عارفة
ليل بنظرة مكر....: وحياة خالتك؟... حورية انتي لو عاوزه تعرفي مقاسات قمصانه هتعرفي... دانتي مراقبة كل حركة هو بيعملها وكل كلمة بيقولها
حورية بضيق...: طب خلاص... اتنيلي قولي اللي عندك!
ليل...: احنا هناخد الواد كريم اخويا وننزل تحت نقعد ونتشاور تحت ف حكاية العريس ونشوف هيعمل ايه
حورية...: طب ماهو ممكن يشك اننا عاملين كدا عشان نلفت نظره!
ليل بتفكير....: امممم... طيب اسمعي احنا هنتكلم عني الاول.. مش انا متقدملي شهاب زميل كريم في نفس العيادة!
حورية...: ايوا
ليل...: خلاص.. نجيب الموضوع فيا الاول وبعدين نشوف موضوعك
حورية...: ماهو افرضي زهق وقام!؟
ليل بغضب...: لا ماهو اسمعي بقى متنرفزنيش عشان واقسم بالله مانزل اقله اتجوز البت دي احسن هي واقعة لشوشتها فيك وخلص اهلي منها
حورية...: خلاص يحاجة دانتي انسانة مستفزة... اخلصي يلا روحي نادي كريم..
ليل وهي تقوم...: فوريرة
_________
كان كريم نائماً في غرفته ففتحت الباب ليل بدون استئذان ودخلت
ليل....: ااااكييييموووو
استيقظ مفزوعاً ليقول...: فيه ايييه؟
ليل بمرح...: اصحى عاوزاك في مصلحة...
كريم بغضب...: طب اخرجي بره بدل ماخلي وشك شوارع دلوقتي.
ليل...: يلا اسمع... ضبطني في المصلحة دي وانا اضبلك حتة بدلة عليك... انما اييييه حكاية
كريم بتفكير...: طب حكاية ايه دي!!!.. واه مش هتنازل عن البدلة انا بقلك اهو
ليل....: ماشي... بص ياض البت حورية دي واقعة الى حد الثمالة في عشق الواد البغل ظافر
ضحك كريم وقال...: وبعدين!
ليل...: الاخ بقى تقيل تقل.... ومش عارفين هل هو معجب بيها زي مالبت حورية معجبة ولا الواد دا سكته خضراوي
كريم وهو يضع كفة يده على كتفها ...: اخت ليل!... هو انتي بتقعدي مع محششين؟
ليل...: يبني بقى خلينا في موضوعنا... مش الواد شهاب زميلك اللزقة دا متقدملي!
كريم...: وطب دا علاقته ايه بحورية!
ليل...: ماحنا هننزل تحت قدام ظافر هنجيب الموضوع فيا الاول وبعدين هننقل على موضوع حورية وقاسم
كريم...: ليل يا حبيبتي بطلي هطل!.. حتى لو هو بيحبها مش معقول يقوم في نص القعدة ويقول بحبها!!!
ليل...: مانا عارفة بس على الاقل يحس ان البت هتتظفلط من تحت ايده وتشيع «وتضيع»
كريم وهو ينظر لها بقرف....: هتتظفلط! وتشيع!... دانا كدكتور نسا وتوليد مبقلش كدا!..
ليل...: طب هاااا؟... هنروح؟
كريم وهو «يهرش»في رأسه..: طالما فيه بدلة في الموضوع اشطا
ليل وهي تلكزه في كفه...: اهو هو دا الكلام
_________________________
الثلاثي المرح راحين فين؟
كريم لزين ....: فيه مهمة عسكرية محددة يحاج
زين بضحك...: ايه!!؟؟ رايحين فين يعني!
كريم....: لا اسرار المهنة لاتقال... وبعدين اسئل رعد هيقلك دي القواعد كدا!
زين...: انتم بمناظركم دي.... انتم المجرمين اصلا... المهم خارجين يعني!.. دا الوقت اتأخر يولاد!
حورية بتوتر....: لا احنا رايحين للقاعة... قلنا نقعد نتكلم شوية
زين....: حاضر يحبايبي...هطلع انا بقى عشان انام
حورية...: اتفضل
صعد لأعلى فاتجهوا هم للقاعة... كان ظافر يجلس ويدخن السجائر وكان من معه؟
رعد!!!
كانوا يجلسون ويلعبون طاولة
رعد....: عم سامح كان دايماً يقلي ان كل الكلام اللى بيتخزن جوانا ... بيطلع على هيئة واحد تانى... انت نفسك بتستغربه... واحد بيبقى عاوز يدوس الكل ومش هامه حد....وكان بينصحني ويقلي.. اوعا تكتم الكلام جواك.... الحروف البسيطة اللى انت بتخزنها فى عقلك الباطن ممكن تقتلك
ظافر بتنهيدة....: على رأيك... بس انا عاوز اخد مشورتك ف حاجة كدا
دخل كريم وليل وحورية فنظروا لهم
كريم...: متحضرونا ياخونا كدا في الموضوع اللي هنتكلم فيه؟
ليل بتوتر وهي ترى رعد ينظر لها فهمست لكريم...: خلاص يكريم خلينا نطلع
رعد وهو يظن انها لاتريد اخباره ...: هو احنا مش من العيلة ولا ايه؟... تطلعوا ليه متتكلموا في الموضوع ولاهو موضوع خاص!
كريم وهو يجلس ويضع قدماً فوق الآخرى بمرح...: لا ولا خاص ولاحاجة... بصوا البت اختي متقدملها عريس
كريم وهو يشير على حورية....: والبت حورية بردوا
كريم...: فكنت بفكر يعني لو هما يعملوا الخطوبتين مع بعض وخصوصا قبل طبعا مارعد يسافر!
هم رعد بالحديث ففاجئه اتصال من القائد جاسر
اجاب عليه ومن ثم ابتسم وقال...: يشرفوا ف اي وقت
ظافر....: مين اللي بيكلمك يرعد؟
رعد...: دا القائد.... هيبعت بنته وابنه يقعدوا معانا اسبوعين
حورية...: هو القائد دا عجوز!
كريم بضحك...: ايه يحاجة اشحال مكان متقدملك عريس لقطة
ضحك حورية وقالت...: ابن مرزوق هههههه
ظافر بغضب وهو ينظر لرعد...: قولي هما هيجوا ليه؟
رعد...: معرفش وبعدين مينفعش اقله جايين ليه... بس دلوقتي لازم نقعدهم في اوضة الضيوف بس سامر دا هيقعد في اوضة شهاب
كريم...: يبني وشهاب هيقعد فين؟
رعد...: يقعد معاك ف اوضتك
كريم...: نعم ياخويا وميقعدش ف اوضتك ليه؟
نظر رعد له بحدة فوقف كريم وقال بتوتر...: انا رايح اوضبله الاوضة
ليل بضحك...: اخويا الشجاع
كريم بمرح....: اوممماااال
حورية...: انا هطلع انام بقى عشان ورايا شغل... وانت يا أخ كريم بردوا نام بدري عشان توصلني ف سكتك بدل مانتا مبتحضرش في العيادة
كريم...: لا مسمحلكيش انا رحت الشهر دا ٤ ايام بحالهم
حورية بسخرية....: يبني وليه الالتزام دا كله؟
_________________________
في العيادة صباحاً
سهر...: طيب ياحورية انا كل ما احط ايدي على ابني الاقي صوت خروشة كدا في صدره
ابتسمت حورية ثم فحصته بالسماعة فقالت...: بصي ياسهر دا بسبب انسداد في الانف
سهر باستغراب...: وده ايه علاقته بصدره؟
حورية...: الاطفال حديثي الولادة بسبب الوزن والمناخير الصغيرة بيحصلهم اول ٦شهور خنفرة... والخنفرة دي بتبدء تقل من الشهر التالت او الرابع
سهر...: طب اعملوا ايه؟
حورية...: حاولي تخليه في وضع عمودي طول اليوم وتستخدمي مخدات فايبر عشان متتعيبلوش ضهره ولما تعوزي تنضفي مناخيره يبقي بمحلول ملح سواء اوترفين بيبي سالين او سالينكس... او حتى ماية البحر (فري نوز بيبي) ولو عاوزه تستخدمي البخاخ او النقط بيكون قبل الرضاعة او قبل النوم لانه مش هيعرف يرضع الا لما تحطيله في مناخيره
سهر وهي تأخذ الطفل...: طيب يادكتورة تسلمي... فتك بعافية
حورية...: الله يعافيكي
خرجت سهر بالطفل من العيادة فدخل قاسم فقالت حورية باستغراب...: انت ايه اللي جايبك هنا!
قاسم بابتسامة...: بشويش عليا يادكتورة... انا جاي اسلم عليكي واتناقش معاكي في حكاية العرض اللي انا عرضته
حورية بسخرية..: هو الجواز الايام دي بقى عرض!
قاسم...: امال تسميه ايه!
حورية...: مش المفروض ان الجواز مشروع مشاركة بين اتنين... مشروع بيعتمد على بناء اسرة
قاسم...: والمشروع دا ياحورية لازم ياخد موافقة
حورية...: انا لسه بفكر
قاسم...: طب وايه اللى مطول تفكيرك!
حورية...: اظن ان الجواز مش بيجي بين يوم وليلة!
قاسم....: اكيد... بس لازم تكوني فاهمة ان الجواز بردوا بيعتمد على قواعد واسس لازم تتوافر في الشخص عشان نقدر نوافق عليه... وعشان كدا انا جيت احط النقط ع الحروف واشوف مواصفات الشخص اللي انتي عاوزه ترتبطي بيه ايه
توترت حورية وحاولت التتويه عن الموضوع ولكنها لم تعرف فتنهدت وقالت....: قاسم.. انت شاب كويس وطموح.. وانا معجبة باصرارك انك عاوز توصل لمكانة كبيرة برغم الضغوطات اللي بتواجهها
قاسم بضيق لانه احس بتأنيب ضمير...: وبعدين!
حورية وهي تلاحظ ضيقه...: قاسم!... انا عارفة انت عاوز تتجوزني ليه!... انت قلت انك عاوز تصفي العداوة بين عمي زين وبابا فهد وبين باباك.... بس الحقيقة غير كدا تماماً...انا عارفة ان والدك بيضغط عليك... بيحسسك انك ضعيف
قاسم وهو يداري عينيه...: كفاااية!
حورية...: لامش كفاية ياقاسم... انت بتغلط... انت بتعمل جريمة ف حق نفسك
نظر لها وقال باستنكار....: نفسي!... نفسي فين دي؟... نفسي دي اتلغت من سنين.... تحبي تعرفي الحقيقة!
.... الحقيقة اني بكرهك وبكره ظافر وبكره عيلتك وعيلته.... بكره حتى نفسي... بكره حتى ابويا...
ابويا اللى انا كان نفسي في نظرة احترام من عينيه... بنظرة حب... نظرة الاب لابنه...
انتي عندك ابوكي اللي واقف في ضهرك...
ظافر عنده عيلته اللي محسسينه انه مسنود مش على حيطة... لا مسنود على مبنى لايمكن يتهد...
انا كنت دايما وحيد.... كنت الانسان اللي دايما اهله شايفينه بلوة سودة بسبب ابوه... الانسان اللي عاش يشحت الحب من دا ومن دا... تعرفي ايه عني!... تعرفي ايه عن السواد اللي انا عشت فيه.... اما عن طلبي للجواز... فانا سحبته يا... يادكتورة
حورية بتأثر...: قاسم.. انا مكنش قصدي اضغط عليك بالشكل دا.... ارجوك تسامحني... وارجوك تعال نخرج ونتكلم... انا واثقة ان الكره اللي جواك اتكون غصب عنك
قاسم بحزن...: وايه الفايدة يحورية... ايه الفايدة؟... الكره لما بيتبت جوه القلوب مش بيطلع منه
حورية بثقة..: هيطلع ياقاسم... هيطلع انا هساعدك!
انت انسان كويس....وعلى فكرة اوعى تزعل من نفسك على شئ انت ملكش يد فيه!
وبعدين احنا مش مجبرين اننا نتحب لكن مجبرين اننا نحب نفسنا... والنفس أمارة بالسوء يعني انا على فكرة ساعات ببص لزمايلي في الحاجات اللي نقصاني ويتملكني الانانية.... لكن برجع تاني وابص ع المميزات... انت في ايدك انك تحول حياتك وتخرج بره الصدفة اللي انت حاشر نفسك فيها ليل نهار.... وصدقني انا هساعدك... يمكن في يوم اقع انا في ورطة وتردلي المساعدة
قاسم بنظرة ودودة...: انتي لو صادقة ف كلامك فاعرفي ان دا اكبر معروف ممكن تعملهولي ف حياتك...
حورية...: انا بجد صادقة ف كلامي.. واكبر دليل على كدا اني بطلب منك تيجي بكرة وكأنك جاي تتكلم معايا عن موضوع الجواز.... بس الحقيقة اننا هنتناقش في موضوعك انت..
قاسم....: شكراً ياحورية.. شكراً
حورية...: بس انا عاوزه اطلب منك طلب... اوعى تسمع لابوك تاني يا قاسم... اوعى تخليه يدس افكاره جواك... احنا رايحين مش راجعين والعمر واحد... بدل ماتحاول انك تهد عيلة... حاول انت انك تبني نفسك وتهد الاسود اللي جواك
قاسم بنظرة تأكيد..: اوعدك اني هحاول
__________________
في اليوم التالي
________________
دخلت ليلان هي وسامر للدوار وهي تنظر له بانبهار تام.... فهي توقعت انه دوار قديم متهالك ولكنها اندهشت عندما رأته أشبه بالقصور وحتى أجمل من الفيلا التي تقطن بها
رعد...: انتوا شرفتوا المكان واتمنى تتبسطوا معانا في الاسبوعين دول!
ابتسمت ليلان وأجابت وهي تقترب منه...: أكيد يارعد وشكراً على استضافتك لينا
رعد...: العفو.... وست هنية هتوصلكوا لحد الأوض بتاعتكم وهترتب الهدوم في الدواليب.... أما أنا فهاروح الإصطبل على ما ترتاحم
ليلان وهي تمسك يده....: مينفعش تاخدني معاك الإصطبل؟
كانت ليل تنظر لسامر وهي تقول بهمس...: انت يبرطمان ايه الحكاية اختك بتشقط الواد عيني عينك!!!!
سمعتها حورية وقالت....: لو انا كنت مكان ليلان كان ظافر علقني على باب الحسنية وقطع راسي
ليل بغيظ...: شوفتي البت المسهوكة يا حورية!!!... والواد الطحش دا سابها تروح مع رعد
حورية بتفكير...: بت!!!!... تعالي معايا!!
ليل....: فين؟
حورية...: مش هي عاوزة تعلق الواد..... فاحنا نعلق أخوها
ليل....: يخربيت اهلك ع الصبح انتي شاربة ايه ياحورية!
حورية....: اسمعي اللي عرفته انهم اتربوا في امريكا... واشك بعد المنظر دا انهم اتربوا اصلا... بس اكيد يعني مفيش غيرة عندهم وادينا شفنا
ليل بتفكير...: طب ودا هيحل ايه يعني!
حورية...: ماهو الواد بقى لما يتقرب مننا هنعرف صفات البت العقربة دي ايه وبعدين متنسيش ان رعد بيشتغل مع ابوها يعني اكيد البت دي بتنطله كل شوية والا مكانش عرفها اول ماجيت وكمان هي مكانتش هتتعود عليه بالمنظر دا لدرجة انها تيجي وتقعد معاه اسبوعين بحالهم !!!!
ليل بحزن....: لا انسي ياحورية... خلاص... وبعدين هو شكله مهتم بيها انتي مش شايفة تعامله معاها
حورية...: يعني يديها بالبوكس ولا ايه يعني عشان يثبتلك انه مش بيحبها؟... يبنتي واحدة ضيفه عنده اكيد مش هيقلها لا على حاجة عشان متحسش ان وجودها مش مرغوب فيه
ليل...: بصي انا عندي مشوار شغل دلوقتي ولازم اروحه اصلا فلما ارجع هبقى اكلمك
حورية باستغراب...: مشوار فين دا؟
ليل بفرحة...: عمرو يبنتي ابن المهندس حسان كلمني وقالي ان فيه اتيليه محتاج مصممة ازياء
حورية بخبث...: انتي معاكي رقمه!
ليل...: لا انا كنت انا وكريم الاسبوع اللي فات في المول... هو كان بيشتري قمصان وانا كنت رايحة اجيب اقمشة للزباين فاتقابلنا هناك
حورية...: اشطا... بس متتأخريش
ليل....: لا مش عارفة الصراحة ايه النظام فهبقى اكلمك من هناك
حورية...: حاضر تروحي وتيجي بالسلامة
__________________________________ويتبع
11=الحادى عشر 11 /
يُمكنكِ أن تأتي إليّ دائمًا، أنا منزلكِ".
____________________________
كان يقف مع سوزان صاحبة الاتيليه وهو يحدثها...: مش هوصيكي يا سوزان... ليل دي غاليا عليا اوي
سوزان بابتسامة...: أكيد رح أشيلها بعيوني
ابتسم هو وقال بمرح...: تسلملي عيونك
ضحكت سوزان وقالت...: اللهجة المصرية مش مضبطة معي شوي ومشان هيك الزباين المقربين بيتمسخروا علي
عمرو ممازحاً إياها...: ماهو بصي لازم تتعودي لان فعلا انتي بتدخلي اللهجتين في بعض ودا خطر على اللغة بتاعتنا يستي
سوزان...: رح احكي انجليزي وهيك اسلم
عمرو...: اتكلمي براحتك انا بهزر معاكي مش اكتر انتي عارفة انك صحبتي المقربة وواخدين على بعض
سوزان...: انت اللي بتقلي هيك؟... أكيد عارفة يا دكتور
دخلت ليل بابتسامة زينت فمها فابتسم هو بدوره وقال...: شوفوا الدخلة اللي تفتح النفس.... ايوا كدا ابتسمي على طول
ليل...: ازيك يادكتور عمرو
عمور...: ازيك ياليل... احب اعرفك... دي مدام سوزان وصديقتي من الطفولة... وهي صاحبة الاتيليه دا وكمان صاحبة فندق love
ليل بانبهار....: اللي بيغنوا فيه المشهورين!!
سوزان بابتسامة...: اي
ليل...: دا من ضمن احلامي اني اغني هناك
سوزان...: بتعرفي تغني؟
ليل...: كروان يباشا
ضحكت سوزان وقالت....: عطيني رقمك لاسجلو عندي واتفق معك... ووعد مني رح تغني بأول حفلة تچيني
ليل وهي تخرج هاتفها...: التليفون معاكي اهو
عمرو بمرح...: شوفي الندالة... ولا كأني هنا خالص
ليل مبادلة اياه مرحه...: لايادكتور عمرو بردوا انت موجود بس الحفلة والمشاهير ولا نقف نتكلم؟
عمرو...: لا الحفلة ياستي
ليل...: شفت بقى!!
____________
بعدما اتفقت ليل على كل شئ مع سوزان وعلى مواعيد العمل أصر عمرو على اعادتها للدوار بنفسه
نزلت من السيارة لتقول له....:والله مانت ماشي الا لما تدخل واعملك شاي بنفسي على الواجب دا
عمرو بسخرية...:شاي مرة واحدة
ليل...:لا مانا الطقوس بتاعتي الخاصة هي اني لما بعزم حد على شاي بقدمله حاجة معاها وحظك اليوم اني عاملة كنافة بالمنجا وحاطة التاتش بتاعي ومسمياها المتبهدلة على صفتي يعني
عمرو باستغراب...: هو فيه اسماء للكنافة!!!؟
ليل..: يوووه كتير... اثناء الطريق سأقولها لك
ضحك عمرو وقال...: ماشي ياستي.. بس فيه رجالة جوه؟
ليل...:فيه رعد وفيه ظافر وعمو زين جوه
عمرو وهو ينزل....:تمام
نزل لتلتفت ليل وتجد ليلان وهي تمسك ذراع رعد بينما رعد ينظر لعمرو الذي اقترب من ليل وهمس لها قائلاً...: مين دي؟
نظرت له وهمست...: دي المتدلعة!
ضحك عمرو وقال...: ودي نوع كنافة!
ليل...: لا دي بنت القائد بتاع رعد وجايه قال ايه تقضي عندنا اسبوعين يا خويا... شوف البت ولاتعرف الواد رعد ولااي حاجة ولازقة نفسها في دراعه لا وايه... الصبح داخلة تنبهر بالدوار بتاعنا ولاكأنها شافت حاجة مشافتهاش قبل كدا!!... دا رعد قبل كدا قايلي انها مش بتصيف غير في تركيا بنت المحظوظة وانا نفسي مزرتش هرم صقارة اللي في الاقصر
عمرو...: صقارة ايه اللي ف الاقصر حرام عليكي الفراعنة دلوقتي هيطلعوا يهزقوكي!!
اقترب رعد وقال...: ازيك يادكتور عمرو!
عمرو...: ازيك ياحضرة الضابط.... ايه انت في اجازة ولا؟
رعد...: لا في اجازة... انت اللي جاي لمين هنا؟
نظر عمرو بضيق لليل بسبب الموقف فقالت ليل بسرعة...: دا جايلي يا رعد
رعد بحدة...: نعم!!!!!!
ليل بتوتر...: اقصد يعني...
عمرو...: جاي ازور ظافر فيها حاجة دي؟... انت ناسي اني انا وهو دفعة واحدة
رعد...: مش هو متخرج قبلك تقريبا؟
عمرو...: لاني كنت في طب بقى مانتا عارف الكلية...
ثم نظر لليلان رغم علمه بها بسبب ليل ولكنه اراد اغاظة رعد....: خطيبتك؟
ليلان....: لا بس تقدر تقول حاجة شبه كدا
نظر رعد باستغراب فأكملت ليلان وهي تنظر لليل....: اصل الضابط رعد شبه مقيم عندنا.... دا في مرة شقته غرقت وكان هيروح يبات في فندق... لكن بابا قاله لا... واصر يجي عندنا وانا بنفسي اللي ناولته هدومه اللي هينام بيها
تفاجئ الكل بما بيهم رعد من وقاحة ليلان
إلى ان قال رعد...: هو انتي تقصدي ايه بكلامك ده؟
ليل بحدة...: متخبيش يارعد علينا حاجة!.... هي وضحت ان فيه ارتباط بينكم والاصحيح كانت هتيجي تقعد هنا ازاي اسبوعين بحالهم!!!!!
رعد...: هو ايه الكلام دا؟... مفيش حاجة من دي نهائي
ليلان لليل...:انا. مقلتش ان فيه ارتباط... واضح ان خيالك واسع
ليل بغضب...: احترمي نفسك معايا احسنلك... وانت يادكتور عمرو اتفضل معايا لان الصراحة الحكاية بوخت اوي
دخلت ليل وتبعها عمرو للداخل بينما رعد التف لليلان وقال...: ايه اللي قلتيه دا؟
ليلان....: رعد!!.. عادي ان يكون فيه ارتباط وبعدين ايه يعني لما اعرض عليك عرض زي دا!؟
رعد بحدة...: هو انتي مدركة للي بتقوليه؟
ليلان...: طبعا... وايه الغلط في اللي بقوله... ماما هي اللي اتقدمت لبابا على فكرة.... ومتنساش ان هناك ف امريكا فيه تحرر عن هنا وسهولة اكتر من هنا بكتير في التصرفات... انا متفهمة ان طباعك شرقية وصعبة شوية بس
قاطعها قائلاً....: بس راجل.. وبعدين على فكرة انا مش هقلك الصح من الغلط لاني مش ابوكي... بس كل اللي اقدر اقولهولك انك ضيفة هنا... فياريت متتخطيش الحدود
تركها ودخل فنظرت هي بصدمة لما قاله وبعدها توعدت له
__________________
عمرو...: حاسس اني عكيت الدنيا
ليل وهي تقدم له طبق الكنافة...: لا متشيلش نفسك ذنب محصلش... هي اصلا كانت متربية في امريكا
عمرو...: طب وايه المشكلة... على فكرة ياليل فيه كتير في امريكا مسلمين وطباعهم احسن مليون مرة من معظم الناس اللي بنشوفهم طول الوقت.... المهم الشخصية ذات نفسها
ليل...: على رايك فعلا... المهم الشخصية...
عمرو وهو يأخذ قضمة من الطبق...: بجد تسلم ايدك والله انا مكنتش متخيل انك شاطرة للدرجادي في عمايل الكنافة
ليل بمرح....: لا وكمان بعمل كل اصناف الحلويات... دا غير انى بطبخ كويس اوي
دخل رعد للداخل وسمع عمرو وهو يقول بانبهار...: يعني انتي ناجحة في شغلك وكمان في شغل البيت وبسم الله ماشاء الله جميلة.... معتقدش ان فيكي اي عيوب
ليل...: ازاي يادكتور كلنا مليانين عيوب
عمرو بابتسامة...: الا انتي ياليل... انتي عيوبك دي مميزات بالنسبة للكل
ضحكت ليل وقالت...: هتغر في نفسي انا بقولك اهو وهرفض بعد كدا اكلمك بتواضع
عمرو بمرح...: يحقلك ياستي... المهم عاوزك ترفعي راسي قدام سوزان انتي مش متخيلة انا قلتلها ايه عنك!
رعد وهو يتقدم ليجلس امام عمرو ويقول بابتسامة لزجة...: ياريت اعرف انت قلتلها ايه؟
عمرو....: انت عاوز تعرف ليه؟... دي هي نفسها مطلبتش تعرف!!
رعد...: اتعلم لما تكون في بيت حد... انك تحترمه... لانه ببساطة دا بيته هو مش بيتك انت
عمرو...: هي ايه الوقاحة اللي فيك دي؟
رعد بسخرية...: اول مرة تعرف اني وقح؟... طيب كويس انك جيت النهاردة فعرفت
عمرو وهو يقف...: انا همشي ياليل وهبقى اكلمك عشان اكمل كلامي
خرج هو فقالت ليل لرعد...: انت ازاي تحرج ضيفي بالشكل دا
امسك طبق الكنافة وقال بدون الرد على سؤالها...: متبقيش تاني تعملي حلويات للضيوف.... لان طبخك وحش
ثم دلف بالطبق للمطبخ ليرميه في سلة المهملات بغيظ وهو يهمس...: ناقص كمان يقوم يطلب ايدها الزفت دا!!!!!
دخل ظافر وقال بضحك...: على فكرة هو متجوز وبيعتبر ليل زي اخته لان لو تفتكر ليل هي اللي عملت فستان الفرح لمراته....
رعد...: وانا مالي!... انا مش مهتم
ظافر وهو ينظر للكنافة الملقاة بسلة المهملات...: واضح جداً
قال رعد بحدة ثم خرج...: ظافر متألفش من دماغك
________________________________
فوزية...: بس يادكتور انا اول ماباخد الحبوب اللي عندي في البيت بيحصلي شبه فوران كدا في معدتي
كريم...: انتي بقالك قد ايه بتاخدي في الحبوب دي؟
فوزية...: بقالي ٦شهور يادكتور
كريم...: طيب اسمها ايه؟
فوزية...: والله ماعرف يادكتور.. دي مرات اخو جوزي الجديدة هي اللي اشترتهالي لاني مش بعرف اقرا واكتب
كريم...: طب اوصفيها كدا لو تعرفي!
فوزية بغيظ...: حربوقة وشبه عود القصب كدا والله ماعرف حسين اتجوزها على ايه دي...دي عينيها ضيقة وشعرها اكرت ووسطها قد رقبتي !
كان كريم ينظر إليها بصدمة إلى أن قاطعها وقال...: الحباية يامدام... اوصفيلي الحباية
فوزية...: اااه... لا معرفش يبني مخدتش بالي
كريم باستنكار...: يعني مرات اخو جوزك الجديدة حافظة تفاصيل وش اهلها... والحباية اللي بقالك ٦شهور بتبلبعي منها صبح وليل مش فاكراها!
فوزية...: مانا ذاكرتي ضعيفة يادكتور الاه!!!!
كريم وهو يكتب في الروشتة الدواء الجديد وبعدها يقطع الورقة...: واضح!!!
أعطاها الروشتة وقال...: الدوا دا تمشي عليه مرتين في اليوم وتجيلي بعد شهر عشان نحدد معاد الولادة بإذن الله
نهضت فوزية ثم قالت...: تمام... مع السلامة
خرجت فقال...: الواحد بيحمد ربنا انه لسه متجوزش... ايه العينات اللي تسد النفس دي؟... ربنا يكون في عون جوزها وعون حسين
جلس وتنهد ليفتح حقيبته ويخرج منها اسكتش صغير ليرسم به... فهو وليل تعلما الرسم منذ صغرهما سوياً
رسم عينين زرقاوتين بداخلهما بحر وفيه زورق صغير ليقول..: العين دي شفتها في الحلم يجي ٣ ليالي ورا بعض... بس ياترى مقصود بيها ايه؟
دخلت الممرضة حسنة وقالت...: دكتور كريم....معدش فيه حالات
كريم...: تمام انا كدا كدا مروح
_____________________
فهد بحدة...: متكلمنيش يا فاتن لو سمحتي!
فاتن بدهشة..: انت بتهزر يافهد؟... كل ده عشان عملت لاف على صورة ابن خالتي!!؟؟
التف فهد وقال باستنكار..: والله!!!؟؟؟... مش ابن خالتك دا كان متقدملك من ٣٠سنة!!؟؟؟؟
ضحكت فاتن وقالت....: يلهوي يافهد انت لسه فاكر؟... دانا نسيت
فهد...: اه لسه فاكر ودلوقتي تدخلي تعمليله بلوك
فاتن وهي تحتضنه....: حاضر يسيدي اي اوامر تانية؟
فهد بضيق مصطنع تلك المرة...: لا... وياريت معدتيش تعملي التصرف دا تاني.... انا مش بغير ولا حاجة يعني بس عشان انا... زي مانتي فاهمة جوزك يعني وكدا!
فاتن وهي تنظر له بخبث وبعدها قالت بمرح...: واضح واضح انك مش غيران خالص... دانتا ياشيخ داخل تزعق في الاوضة وفكرت اني عملت مصيبة كبيرة وانا مش واخده بالي
طرقات الباب ففتح ليجد مهرة
مهرة باحراج...: انا متآسفة كنت مفكرة فاتن لوحدها
فهد...: لا يا مدام مهرة متتآسفيش ولاحاجة اتفضلي
دخلت مهرة وقالت...: انا بس كنت جايه اقول لفاتن لو تقدر تنزل تساعدني عشان ابن عمي غانم الله يرحمه جاي
فاتن ...: حسن!
مهرة متفهمة...: ايوا... بس ارجوكي متجيبلوش سيرة الجواز خالص لان زي مانتي فاهمة...
فاتن بتفهم..: حاضر يا مهرة... انا هلبس بس الطرحة وهنزل
مهرة وهي خارجة...: حاضر... انا مستنياكي في القاعة عشان ننضفها وليل هي اللي هتطبخ
_____________
بعدما وصل حسن واستقبله جميع المتواجدين
ليل ...: متعرفش انت وحشتني قد ايه ياخالوا !
احتضنها بحب وقال...: وانتي ياروح خالوا
دخل كريم وقال...: وانا مليش في الحب جانب؟
حسن بمرح...: اتلم ياض انا مبحضنش غير الحلويات
ضحك الكل وقالت ليل...: اخس ع الكسفة
كريم بمرح...: مش هزعل منك دلوقتي عشان فيه بدلة في الموضوع
نظرت ليل بحدة ففهم أنه كاد أن يوقعها في مصيبة.. لانها اتفقت ان توقع ظافر بحب حورية مقابل بذلة
حسن...: بصي بقى انا جاي مخصوص عشان الاكل بتاعك.... اوعي تكوني معملتيش حلويات
ليل وهي تنظر لرعد...: لا حضرت الاكل يا خالوا.... بس فيه ناس كدا بتقول ان طبخي وحش
حسن...: دول بهايم
ضحكت ليل بينما نظر رعد بحدة لها
ليل..: مش هقدر اقول عندك حق المرادي... بس يلا بقى عشان الاكل ميبردش
وووويتبع
لمتابعة باقى الرواية زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كاملةمن هناااااااااا
مجمع الروايات الكامله 1اضغط هناااااااا
مجمع الروايات الكاملة 2 اضغط هناااااا
تعليقات
إرسال تعليق