رواية زين الصعيد الجزء الثاني الفصل الرابع عشر والخامس عشر والسادس عشر بقلم منه الله رافت
رواية زين الصعيد الجزء الثاني الفصل الرابع عشر والخامس عشر والسادس عشر بقلم منه الله رافت
14= الرابع عشر من الجزء الثانى /
فهد....: ايه يبني البوكية الزفت اللي انت جايبه دا؟ فيه حد يجيب اللون دا؟
ظافر بضيق...: هو انت مفيش حاجة عجباك أبداً يحمايا؟
فهد....: اسمي الباشمهندس فهد... حماك دي لما تكتبوا الكتاب يخويا.... ادخل ياهشام يحبيبي الأول وبعدين هو يدخل
دخل هشام وهو يضحك فوجد جميع العائلة تجلس
ظافر...: هو ايه المعامل البوهيمية دي!!
فهد...: انا أصلاً مش بطيقك وهات البوكية دا ارميه
ظافر....: هديه لحوريتي!
فهد....: وانا هديك بالبوكس لو متعدلتش
زين.....: خلاص يافهد... وبعدين اخلص بقى ياظافر وادخل
فهد....: بالصلاة على النبى كدا.... هناخد رأي البت ها موافقة؟
حورية بخجل...: بصراحة ايوه يبابا
فهد...: انا معنديش بنات اخد رأيهم.... أولاً انت معاك شهادة ايه؟
ظافر....: نعم!!!... مانا بشتغل معاك ياعمي
فهد...: ميكانيكي؟
ظافر...: لاحول ولاقوة الا بالله... لا مهندس يعمي... مهندس ميكانيكا
فهد....: تمام مرتبك قد ايه؟
ظافر...: باخد اربعتلاف ونص
فهد...: اممم يعني هتقدر تعيشها في نفس المستوى اللي هي عايشة فيه؟
ظافر...: هنصيع على بعض ياعمي؟.... حورية عايشة أصلاً معايا
فهد....: No problem ننتقل للسؤال اللي بعده.... بتشجع فريق ايه؟
ظافر...: الأهلي
هشام...: ايه يافهد الاسئلة دي؟.... انت هتوظفه في شركة؟.. داحنا هنجوزه لبنتك؟
فهد...: استنى كدا ياهشام... انت حبيبي اه لكن ابنك دا لوحده نسوانجي وانا مأمنش ع البت معاه
ظافر....: نقوم نمشي يا عمي؟
فهد...: ياريت
زين....: مخلاص بقى يافهد... وبعدين حتى لو الواد معووج ابوه هيعدله.... وانت مش هتلاقي حد يحب بنتك ويخاف عليها اكتر من اهل بيتها.. وظافر ابننا
ظافر.....: والله ياعمي انت رجولة
حسن...: متخلص بقى يافهد وانت رزل كدا
فهد...: برستيجي ياعم انت
حسن....: بلا برستيج بلا بتاع بقى ها موافق؟
فهد وهو ينظر للتلفاز....: بصوا نشوف الماتش... ولو الأهلى فاز هوافق لو خسر... فمشوفش الواد دا قدامي تاني
__________
كان لازم افل واتركه من زمان بس انا بقيت كرمال العشرة وكرمال احافظ ع بيتي كرمال ماينخرب.... بس انا مليت ومابقى فيا اتحمل
دخل حازم وقال...: انتي مفكرة انك هتقدري تسيبيني بالسهولة دي؟..... سوزان اعقلي ورتبي هدومك في الدولاب... لانك مش هتطلعي من هنا عايشة
سوزان....: مافي حكي بيني وبينك... ومن هلأ ورايح مابقى توريني خلقتك
امسك ذراعها فقالت...: حازم بعد ايدك
حازم...: انتي مفكراني من الرجالة اللي كنتي تعرفيهم قبل ماتيجي معايا على مصر؟..... تبقى غلطانة في تفكيرك اوي... انا الغلطة عندي بموته
سوزان باستهزاء....: مانا عرفت... عرفت إنك مجرم وهربت من لبنان لما قربوا يكشفوك...بس انا بنفسي اللي راح اسلمك للعدالة
اقتربت أم حازم بعدما طرقت الباب ودلفت فقالت...: الزعيق دا كله ليه؟
سوزان...: انتي مادخلك!
حازم بعصبية...: سوزان كلمي امي كويس
سوزان لحليمة وهي تأخذ منها الولد...: هاتي ابني
حليمة...: متدخليش الابن في خناقتكم
سوزان...: لتكوني مفكرة انك عن جد سته؟..... كانك نسيانه لما تركتي ولدك وعمره ٦سنين وفليتي للبنان لتتجوزي من شاب قد عمر حازم
حازم...: مخلاص بقى ياسوزااااان!!!!
سوزان...: لا مش خلاص.... وانت مافيك تحكي معي مرة تانية.... ابنك ياست ياحبيبة مجرم وهربان من لبنان... وانا اتسترت عليه.... لا ومااكتفي بهيك شغلة... ابنك اتجوز علي من ٦أشهر ومستغفلني...
حازم...: لو طلعتي من البيت دا مش هتاخدي معاكي الولد
سوزان...: انت بدك ياه يعيش متل ما انت عشت بعيد عن إمك؟؟؟؟
حازم....: انا قلت اللي عندي.... وكلام معدتش عايز
سوزان وهي تفكر بأنها لو أخذت معها الولد فلن تكون بمأمن هي ولا هو.... ولكن ستذهب للمحكمة وتضمن حضانته لان حازم متزوج بينما هي لا
سوزان...: وانا موافقة
حازم...: تمام.... اتفضلي بره وطلاق مش هطلق
سوزان...: بدك تطلقني غصب عنك... وبكرة تشوف
ثم خرجت من الباب بعدما نظرت لذلك الرضيع بحزن
لتنطلق لوجهتها
حليمة...: هتسيبها؟
حازم....: انا مخلي وراها واحد يراقبها.... هنشوف هتعمل ايه
__________
طرقات الباب
فتحت لمياء الباب فتفاجئت بسوزان وهي تبتسم وتدخل بدون إذنها
سوزان....: بيتك مرتب.... باين انك كتير مرتبة متله
لمياء بتوتر...: انتي تعرفيني منين؟
سوزان...: بلاها هاي المسرحية لمياء... انا بعرف كل شي... بعرف ان حازم اتجوز علي....وانتي بتعرفي اني مرته
لمياء...: انتي عاوزه ايه مني؟
سوزان...: انا مابدي منك شي... كيف مابتقولوا انتي اللي عاوزاني أكتر
لمياء...: وانا هعوزك في ايه؟
سوزان...: بدي حازم يطلقني... إقنعيه ويبقالك لحالك
لمياء...: لعبة منك عشان تطلقيني انا ويفضالك هو
سوزان....: لا ماهي لعبة.... هيدا استغناء.... انا اتزوجت حازم وتركت لبنان لحتى اتبعه ونعيش بمصر واكتفيت... بس هو ما اكتفى بهيك شغلة... اتجوزك علي...
لمياء...: وازاي عرفتي؟
سوزان...: عرفت لما زادت ضهراته بالليل ولما بقى يجي لعندي وريحته عطر متل العطر اللي انتي حاطتيه هلأ...... وهون شكيت......
وقفت وأكملت حديثها...: انا ماعد بدي شى من حازم غير انه يطلقني وبس.... انا طلبت منه هيدا الشى... وانتي راح تكملي المهمة
________________
ظافر....: لولولولولولولوليييييييييي
ضحك الجميع فقال ظافر....: الأهلى كسب... ايدك على بنتك ياعمي فهد!
فهد...: بص يبني.... انا موافق ع الجوازة مبدئياً بس والله العظيم لو زعلتها... مهقلك انا هعمل فيك ايه
ظافر....: في عينيا
رعد....: انا بردوا يبابا بستأذنك... اني اكلم القائد في حكاية ليلان
زين...: عاوز تتجوزها!
نظرت ليل بصدمة لرعد عندما قال...: ايوه
زين...: انت اجازتك قربت تخلص.... لما ترجع يبقى تكلمه ولو وافق هو.... نروح كلنا نطلبها
_________________
سوزان...: دشيت اللي اشعرلي بدني.... بدك ياني اروح وافل بس مخلي البادي جارد تبعك يراقبني!!!!
حازم وهو يحدثها بالهاتف ويشرب سيجاراً...: شو بدك سوزان!!
سوزان....: وبتحكي لبناني وبتتمسخر كمان!
حازم...: انا مش باستهزء بيكي... بس دلوقتي مش هسيبك.... ولو فكرتي انك تروحي وتبلغي عني السلطة.... شوفي اللي هيحصلك!... اوعاكي تكوني مفكرة ان قصة انك سبتيلي ابنك دي دخلت عليا؟.... لا... انا فاهم انك هترفعي قضية وتكسبي الحضانة... بس انا بحذرك... لو انتي عاوزه ابنك يتربى كويس... متقربلوش تاني
سوزان....: انت واحد صرماي
ضحك حازم وقال...: وانتي واحدة زبالة.... وانا مش طايق اسمع صوتك.... انا واحد حمار اني حبيت واحدة زيك
سوزان...: والله؟.... عنجد بتحكي!....
اغلقت المكالمة وهي تقول....: انا بورجيك ياحازم....
_______________ويتبع
15= الخامس عشر =
بعد انقضاء مدة اجازة رعد
رتب حقيبته بينما نظرت مهرة لليلان وقالت باستهزاء....: سبحان الله المفروض كنتي تقعدي اسبوعين بس.... لا قعدتي طول مدة اجازة رعد وهتاخديه معاكي كمان
ليلان ببرود....: اه فعلا.. شفتي الصدف
رعد بضيق وهو يحاول الا تثار مشكلة ....: انا هسلم على الكل وهمشي
مهرة...: تروح وترجع بالسلامة ياحبيبي
دخل زين وقال....: خلصت حاجتك يارعد!
رعد...: ايوا يبابا... امال فين زينة وشهاب لسه مرجعوش من الرحلة؟.. دول بقالهم شهر!!!
مهرة....: انت عارف انهم لما بيبقوا مع بعض بيطولوا
زين...: المهم دلوقتي لما توصل متكلمش القائد على طول شوف انت هتعمل ايه وهترتب امورك ازاي وبعدين فاتحه في الموضوع
رعد....: باذن الله
ليل وهي تمسك حقيبه كبيرة بيدها...: ازيكم جميعاً....
زين...: ازيك ياليل... اخده الشنطة دي ورايحة على فين كدا؟
ليل...: دا عمرو كان عازمني على الغدا بعد ما اخلص شغل وانا إستئذنت من بابا وهاروح باذن الله فقلت اخد الهدوم دي واخلصها هناك قبل ماروح العزومة
زين....: كريم مش هيبقى معاكي؟
ليل...: لا كريم اصلا مسافر في شغل.... المهم انا هاروح بقى عشان متأخرش... سلام!
ثم خرجت فقال رعد بضيق....: دي حتى معبرتنيش... وكمان انا منبهها انها متكلمش الزفت عمرو دا
زين....: وانت مالك ومالها؟
رعد....: انت ناسي ان امها تبقي بنت عمة مامتي؟
زين....: ايوا... بس مخدتش بالك انها استئذنت من ابوها.... وكمان خلص يلا عشان متتأخرش عن كدا... الطريق طويل
خرج رعد من البوابة فوجد ليل تصعد بسيارة عمرو فذهب إليها وأمسك يدها وقال...: انا مش قلتلك متكلمهوش تاني
ليل....: وانت مالك ومالي.. وبعدين سيب ايدي ومتأخرنيش عشان ورايا شغل
رعد بغضب...: اه ماهو واضح الشغل على اصوله... يلا اشبعي بيه مانتوا صنف ميملاش عينكم الا التراب
ليل بصدمة...: انت بتقولي انا الكلام دا
عمرو بغضب ..: اركبي ياليل وعدي اليوم عشان متدخلش
لم يجب رعد بل نظر لها بدهشة مما قاله وهم بالاعتذار ولكن انطلقت السيارة
رعد...: غبي
اقتربت ليلان وقالت....: هو انت بتحبها!
رعد...: لا طبعا وبعدين بتسألي السؤال دا ليه؟
ليلان....: لانك بتغير عليها بطريقة اوفر
رعد...: لانها من اهل بيتي ومينفعش اللي هي بتعمله دا
ليلان..: انا شايفة انك مزودها لانها اصلا استئذنت والدها.... ويلا يارعد عشان منتأخرش عن كدا
تنهد رعد وقال....: ماشي
ثم ركب سيارته وانطلق
_________________
كانت تبكي في السيارة فقال عمرو.....: متعيطيش بقى ياليل وبعدين دا يوضحلك حقيقة مشاعره من نحيتك
ليل وهي تنظر له...: تقصد ايه؟
عمرو....: أقصد انه شايفك زي اي بنت رخيصة
ليل بعصبية...: متقولش كدا تاني عليا انت فاهم!!!!؟؟
عمرو....: انا مقصدش اصلا عليكي... انا اقصد انه هو اللي شايفك كدا... وانتي اللي سمحتيله
ليل...: سمحتله ازاي؟
عمرو...: بانك سبتيه يتحكم فيكي باي شكل هو عاوزه.... فبعد كدا متعاملهوش تاني
ليل....: انا هسمع بنصيحتك وفعلا هعمل كدا... وشكراً ياعمرو انت بجد أخ كبير ليا والله
لم تلاحظ عندما أمسك المقود بغضب حتى برزت عضامه
ليل...: بس سوزان يعني معدتش هتيجي الاتيليه؟
عمرو...: هي قالتلي انها مش هتيجي لفترة.... ووصتني اني انا اللي اتابع الشغل بمساعدة اللي بيشتغلوا هناك... وطبعا هاجي كل يوم اخدك بقى ونروح سوى
ليل بمرح وهي تسأله عن زوجته...: واخبارها ايه الست صحبتشي
عمرو....: فيه بينا مشاكل يا ليل وبفكر اطلقها.
ليل بشهقة...: اوعى تعمل كدا ياعمرو... هي بتحبك وانت عارف
عمرو...: افهمي ياليل بقى.... انا بحب واحدة تانية... ومش قادر اكمل في جوازتي دي
ليل...: واللي بتحبها عارفة؟
عمرو....: لا... بس اكيد هتعرف بس بعد ماطلق مراتي
ليل...: منصحكش يا عمرو... لانك مش ضامن هي ممكن ترفضك ولا لا.... فمتخربش بيتك ياريت
عمرو...: ربنا يسهل....
أوقف السيارة وقال....: وصلنا
نزلوا سوياً ودخلا للاتيليه
اجتمع العمال ووقفوا فقال عمرو....: انا هنا هبقى المسؤول عن الاتيليه مع ليل لحد ما سوزان ترجع.... الشغل هيمشي زي ماهو.... ولو سوزان طولت في المدة فالمرتبات هي هياها مش هتنقص حاجة.... ودلوقتي عاوز مدير الحسابات عندي في المكتب... اما انتي ياليل فمكتبك معايا
ليل...: تمام
_____________________________
زين...: رعد مش عاجبني نهائي يافهد... حاسس انه متلخبط او فيه حاجة شغلاه... بس مش عارف ايه هي؟
فهد...: طب ماتتكلم معاه يازين وشوف ايه هي؟
زين...: لا.... رعد مش من النوعية اللي بيحكي بسهولة... وخصوصا لو الأمر ليه علاقة بمشاعره
فهد....: مشاعره!... قصدك ان رعد بيحب؟
زين...: هو دا اللي مجنني... انا مش عارف هل هو بيحبها ولا لأ
فهد...: هي صحيح متطاقش وبت رخمة بس على الاقل بنت القائد ودا هيساعده في شغله
زين...: انا مش قصدي على ليلان
فهد...: امال قصدك على ايه؟... اوعى تكون البت بنتي مقصوفة الرقبة اللي كل شوية داخلة عليا بعريس شكل!!
زين بضحك...: لا لا... انا قصدي المرادي على ليل.... نظرته ليها بتفكرني بنظرتي لمهرة لما كنت بحبها ومش قادر اعبرلها عن كدا... ايام ماكنت متفق معاها اني هتجوزها مدة وهطلقها
فهد...: يازين الحياة اتغيرت... مش شرط عشان بيبصلها بنفس البصة يبقى بيحبها... مالواد مصلحي عينه كانت على الرقاصة ومع ذلك بيحب مراته
ضحك زين وقال...: عمرك ماهتتغير ابداً يافهد
فهد بمرح...: يبني اتغير اي الواحد لسه شباب!
زين...: واضح ياعم من سنك في البطاقة
فهد...: يووووه يازين... المهم كمل وسبنا مني خالص
زين بتنهيدة....: النهاردة كان وشه هينفجر من الغيرة عليها وهي بتقول انها رايحة مع عمرو.... في الاول قلت دا غيرة عشان من اهل بيته... بس راقبته من بعيد وشفته وهو بيتخانق معاها وبعدين بصلها باستغراب م اللي قاله حسيت انه فعلاً بيحبها وانه مش مجرد واحد خايف على اهل بيته وخلاص
فهد....: والله ماعارف اقلك ايه يازين.... بس دلوقتي معدش يفيد الكلام بحاجة.... لانه هو مسافر وهيفاتح القائد في موضوع ليلان.... يعني موضوع ليل منتهي تماماً...
زين....: والله كان نفسي انه يتجوز ليل... بنت صحيح مخها ضارب بس حنينة وجدعة وتقدر تشيل مسؤلية بيت... مش البت ليلان دي.... بس انا اعمل دي... دي رغبته هو ومقدرش اعارضه فيها ابدا!
فهد...: بص سيبها لله.... واللي ليه نصيب في حاجة هياخدها
زين...: على رأيك وجايز يجلها ابن الحلال اللي يبقى احسن كمان من رعد
فهد...: ربنا يعوض رعد بالاحسن ويعوض ليل بالاحسن
زين...: يارب... الاتنين ولادي....وبحبهم نفس الحب
فهد...: وبردوا ظافر... مع ان الواد دا هيكبرني بس انا مأمنش على حورية غير معاه
زين...: بأمارة مارزعت في ضهره البوكية وهو طالع ع السلم ههههههههه
فهد...: يلا اهو اللي حصل... المهم يلا نروح نتابع الشغل... احنا بقالنا كذا يوم مش منتبهين ليه
زين...: على رأيك يلا
________________
الف مبروك ياهندسة
كان الجميع يهنئ ظافر بخبر قراءة الفاتحة
ظافر....: الله يبارك فيكم يارجالة... المرة الجاية عندكم بقى
اسماعيل...: انا اول واحد كان عارف ان الواد دا بيحب حورية
ظافر....: يعني عارف وكنت بترزل عليا!!!!!
اسماعيل...: مانا كنت عاوزك تتلحلح كدا وتاخد خطوة والله لانك كنت منرفزني حرفيا.... كنت عامل نفسك كفيف
ضحك ظافر وقال....: الحمد لله الايام دي ولت
______________
قاسم...: انا معرفش يعني ايه حب.... بس انا بحس اني برتاح ف وجودك ودا اجمل شعور بحس بيه... انى اطمن ف وجود حد
ليانا بخجل....: بس دا معناه انه حب!
ابتسم قاسم وقال...: يمكن... وعشان كدا انا عاوز اخد الخطوة الأولى... ليانا... تقبلي تكوني ليا انا
ضحكت وقالت....: موافقة
____
عمرو....: ليل انا اشترتلك السلسلة دي امبارح ويارب تعجبك
امسكت ليل وقالت باندهاش....: الماظ!!!!
عمرو بابتسامة...: متغلاش عليكي ابداً
ليل...: أنا آسفة مقدرش أقبلها لإني مش هقدر اقدملك حاجة مشابهه... ولا اشتريلك هدية زيها
عمرو: اشتري اللى احسن من دا كله... اشتري خاطري ياليل... حسسيني انى حاجة فى حياتك
ليل....: تقصد ايه ياعمرو... وبعدين مانا معتبراك أخويا هو فيه بعد كدا!
هم بالحديث بعدما احتدت عروقه ولكن قطع التكملة دخول إحدى العاملات وهي تقول....: انا مديرة الحسابات يادكتور عمرو
عمرو بحدة...: اتفضلي
دلفت وجلست معه لتبدء في مراجعة جميع حسابات الاتيليه بينما نظرت ليل له بشك.... ماذا كان يقصد؟
______________________
شهاب....: يبنتي حرام عليكي بقى طلعتي كل الصدفات اللي في البحر!!!!
زينة....: يبني جايز احتاجهم في المعمل ولا حاجة
شهاب...: كلية العلوم دي شالتلك مخك اقسم بالله
زينة...: يبني ايش فهمك انت في الرقي والعظمة انت... كلية العلوم دي كلية الحاج احمد زويل
شهاب....: وانتي عاوزة تبقي الحاجة زينة زين؟
زينة...: يوووه... قلتلك متقوليش اسمي على بعضه العيال بيتريقوا عليا.... نفسي اعرف ابوك دا لما جه يسميني ملاقاش غير الاسم دا؟... هي الاسماء عدمت ساعتها!!!!
شهاب....: والله دا نصرني انا... خلاني كل شوية اذلك بالموضوع دا
زينة...: يلا ياض روح هاتلي صدفتين كمان
شهاب..: ياض!!!... طب مش رايح
زينة...: مااااشي... ليك يوم ياشهاب يازين
شهاب...: يلا ياختي...
زينة...: والله لقول لابوك انك مكراش على بنت عمك ادم... البت شمش
شهاب باستنكار....: شمش!!... وبعدين فيها ايه؟... طب ياريت تقوليله والله ع الاقل يخطبهالي
ضحكت زينة وقالت....: او هي اللي تطلبك زي ما رعد اتطلب
ضحك شهاب وقال...: طبعا انتي بتقولي كدا في ضهره... انما قدامه متقدريش.. بتقلبي كتكوت مبلول
زينة...: والله يبني انا لو قلت كدا قدامه مش بعيد يخرشملي وشي.... المهم هاروح بقى اجيب صدفتين كمان
شهاب...: وانا هاروح الحمام اخد شاور على ماتخلصي مغامراتك دي
ذهبت للبحر وأمسك بصدفتين لتفاجئ بكرة تصطدم بضهرها
وقفت ونظرت للشاب الذي ألقاها فقالت....: مش تفتح ياعمى!!!!
يوسف....: انا متآسف بس انا بلعب زي مانتي شايفه فلما...
زينة....: شششش... خلااااص ايه هتحكيلي رواية.... اعتذرت وانتهى الموضوع.... بس المرة الجاية هخرملك الكورة انا بقلك اهو... احذر بقى
ضحك يوسف وقال....: حاضر
ذهبت وأمسكت الصدفتين وقالت...: اشطا.... كدا جمعت ٤٣ صدفة
وقعت منها صدفة كبيرة همت بأخذها وماراعها إلا وذاك الشاب يدهس عليها
زينة....: نهار ابوك اسود!!!... دي احلى صدفة جمعتها!!!
يوسف...: انا.. متآسف
زينة بغضب...: ويفيد بإيه أسفك دلوقتي بقى.... اديها انكسرت ومش هترجع تاني
يوسف....: على فكرة قلت آسف وبعدين انتي اللي واقفة في حتة كلها لعب وقاعدة تجمعي صدف
زينة...: امال انضم ليكم يا بو طويلة وابقى شبه البنات اللي خالعة هدومها دي.... اسفوخس حقيقي
نظر لها بصدمة وقال وهو ينظر للارض بعدما ذهبت...: يا آنسة جون سينا... ال....
ثم قطعت حديثه وهو يبتسم... ليلتقط الصدفة المكسورة ويضعها بجيبه
ويتبع
16= السادس عشر =
عجبا لثبات قلبك! ما أخلص لحب أحد إلا وباعد بينه وبينك الزمان.
____________________________________________
دخل منزله واشعل النور ليضع ملابسه في الدولاب وأيضاً حضر بعدها طعاماً يأكله
وبعدما انتهى ذهب لسامح
وجده يهذي بسبب الخمر
رعد...: بردوا لسه حالك كدا!... كل مرة بيبقى عندي امل تتغير!
سامح....: انا خلاص راحت عليا... المهم عملت ايه معاها!
رعد....: مع مين؟
سامح...: مع اللي بتحبها!
رعد...: هتجوزها
ضحك سامح وقال...: كداب
رعد بتساؤل...: بتقول عليا كدا ليه؟
سامح...: انا اكتر واحد فاهمك... انت مش هتتجوزها
رعد....: مش مهم.... بس هتجوز واحدة احسن منها
ضحك اكثر وقال...: وتفتكر لما حد يحب حد... يقدر يشوف اي شخص في الدنيا احلى منه
رعد بتهرب...: انا جاي عشان اسلم عليك بعد مارجعت
سامح....: انت جاي عشان تشكي... بس مش عارف... لانك ملكش عين.... وانت اللي حطيت نفسك في الموقف دا
رعد...: الاولوية بتقول ان ليلان احسن بكتير... ابوها قائد وهيساعدني ف شغلي
سامح...: وقلبك مين هيساعدك عليه؟
لم يجب رعد
وقف سامح وقال....: هتندم يارعد... هتندم وهتوصل لحالي لو كملت بالشكل دا... هتدفع تمن الحب غالي
بكى سامح وقال...: انا دفعت تمن الحب
كعادته.... كلما حادثه رعد في أمر الحب يقول له تلك الجملة (انا دفعت تمن الحب).... ولكن ماهو التمن؟.... لم يعلمه بعد
ثم ذهب سامح فتنهد رعد وقال...: كدا اسلم قرار.... متتراجعش يارعد.... انت عملت الصح
اتصلت به ليلان فنظر للبيت للهاتف بضيق ولم يجب
__________________________________
ليل وهي تمسك (المازورة) وتقف بعدما نهضت من على الأرض....: كدا ياعروسة اخدنا المقاسات... وباذن الله هيبقى فستان عسل زيك كدا
ضحكت نور وقالت....: والله بجد انا حبيتك اوي... وانا واثقة ف ذوقك لان اصلا معظم صحباتي انتي اللي عملالهم فساتينهم بنفسك
ليل بمرح...: اممم يعني انتي جاية واسطة بقى
نور....: اي نعم
ليل...: نورتيني بردوا ياستي... ع العموم سيبيلي رقمك وانا بعد ٣ اسابيع هخلص الفستان ودا بالنسبالي اسرع فترة على فكرة وعشان خاطرك هحاول اعمله بردوا ف أقل من المدة دي
نور....: تمام ياليل.... وانا هبقى على تواصل معاكي بإذن الله
ليل...: بإذن الله
نور....: انا همشي بقى يا ليل... سلام
ليل...: سلام ياقمر
خرجت نور فنظرت ليل بدهشة لمن أتت... ولم تكن سوى لينة زوجة عمرو
دخلت لينة وقالت باستهزاء....: الاتيليه حلو اوي
ليل بمرح...: يمكن عشان نورتيه
لينة ببرود...: تاخدي كام وتبعدي عن عمرو!!!
ليل بدهشة...: نعم!
لينة....: ايه؟... الصراحة بتصدم؟؟؟؟
ليل...: صراحة ايه يا لينة؟
لينة...: الصراحة اللي انتي مصممة تكوني معمية عنها ومش شايفة حقيقتها.... عمرو بيحبك يا ليل ومتفق معايا ع الطلاق عشان يتقدملك ويتجوزك حتى لو غصبانية
ليل بحدة...: انتي كدابة!
لينة...: وانا هكدب عليكي ف موضوع زي دا ليه؟.... لو فعلاً مكدباني روحي اسئليه بنفسك
ليل....: انا مش هسأل حد ومش هصدق التخاريف اللي انتي بتقوليها دي
لينة....: ع العموم انا مش جاية اهددك بالعكس.... انا بنبهك عشان انقذك من المصيبة اللي انتي رايحالها برجلك ومش دريانة بيها.... عمرو لو اتمكن منك مش هيسيبك الا بموتك
خرجت لينة من الاتيليه فتذكرت ليل عندما اخبرها هو بحبه لإنسانة لم تعلم بعد وأيضاً بأنه سيطلق زوجته لكي يتزوج من محبوبته
ليل بخوف...: شكل عمرو كان بيلمح عليا... وشكل رعد كان عنده حق فعلاً
_________________
ظافر...: يا سيد الثيرموستات اتعطل ودا اللي زود حرارة المحرك
سيد...: ايه الثرمو بتاع دا؟
ظافر....: دا منظم الحرارة ياسيدي... يعني الميكانيكي اللي صلحلك العربية دي اخر مرة مبوظهاش زي مانتا جاي تقولي وتطالبني بحق الفلوس... وع العموم من عندي ليك انا هصلحلك الحاجة ببلاش ياسيدي
سيد...: كتر خيرك ياظافر والله.... طب واجي اخدها امتى!
ظافر...: تعالي الاسبوع الجاي لان فيه عربيات تانيه عليها الدور الاسبوع دا
سيد....: تمام باذن الله هبقى اجي اخدها الاسبوع الجاي... سلام
دخل قاسم ووقف امام ظافر وقال له....: ازيك ياظافر!
نظر ظافر له بكُره وقال.....: خير؟... مع ان اللي زيك ميجيش من وراه خير ابداً
قاسم...: حقك عليا ياظافر... انا عارف اني غلطت وغلطت كتير اوي
ظافر بسخرية...: وبعد الاعتذار دا... معتقد ان كل حاجة هترجع لأصلها؟
قاسم...: عارف انه من الصعب... بس مش من المستحيل... وكمان انا جاي اباركلك على خطوبتك من حورية... انت طيب وتستاهل كل خير
ظافر بحدة....: زعلان! ولا جاي ترسم الود وتخوني تاني!
قاسم....: لا دا ولا دا... انا جاي اقلك اني انا من نحيتي نضيف... وكمان جاي ادعيك على خطوبتي على واحدة اسمها ليانا.... واحدة حبيتها بجد.. يعني مش واحدة كنت عاوز اغيظ بيها واحد صحبي... وانت فاهم انا قصدي ايه
ظافر....: تمثيليه جديدة!!!!؟؟؟
قاسم....: لو مش عاوز تصدق.. براحتك يا ظافر... بس انا اتغيرت.. انا اشتغلت في مكتب محامي كبير... ساعدني وحطني على أول الطريق... وحبيت زميلتي في الشغل... وهي بردوا ساعدتني اني اطلع من الدايرة اللي كنت حاطط نفسي فيها.... صحيح مش هقدر اسيب ابويا... بس معدتش بسمحله انه يسم دماغي بالكلام اللي كان بيقولهولي زمان
ظافر بهدوء...: لو انت فعلاً بتتكلم جد يا قاسم... فالأولى ان انت تكون فخور بنفسك... لان انت قدرت انك تغير من ذاتك بشكل كبير او بالاصح بشكل جذري.... اما عن نفسي انا فلو عاوزنا على الاقل نرجع ولو حتى زملا... فسيب دا للزمن... جايز الزمن يصلح كل حاجة بينا.... زي ماصلحلك افكارك وعاداتك
قاسم....: حاضر ياظافر.... انا مستني... وانا عن نفسي.. امنيتي اننا نرجع صحاب زي زمان.... بس المرادي.... مفيش اي حقد ولا نية وحشة.
تركه قاسم وخرج فابتسم ظافر بينما اتى اسماعيل وقال...: انا سمعت كل حاجة.. بس انت مصدقه؟
ظافر...: انا اصلاً متابعه... بس كنت عاوز اضغط عليه ف الكلام عشان يطلع كل اللي جواه.... مديره ف الشغل يبقى صاحب ابويا... وانا وصيته عليه.... وبينقلي كل اخباره... وفعلاً هو بقى شاطر ف شغله واترقى كمان فيه
اسماعيل....: طب والله كويس.... ابوه منه لله اللي كان مخلي شخصيته وحشة وحقودية
ظافر...: ابوه معدش بيقدر يكلمه دلوقتي غير بالعافية.... انت تعرف ان ابوه بنفسه جالي امبارح وهو بيعيط
اسماعيل باندهاش...: بيعيط؟؟؟
ظافر...: ايوا... قالي ان قاسم مش بيزوره ولا بيسأل عنه ف التليفون وكان بيستسمحني لو اخلي قاسم يروحله ويشوفه ولو من بعيد
اسماعيل...: سبحان الله داين تدان.... الناس كانت بتقول ان ابو قاسم دا كان ساب ابوه ف اخر ايامه وبقى ميسألش عنه
ظافر...: ياخوفي بس ليترد ف قاسم كدا
اسماعيل....: انا حاسس ان قاسم مش هيسيب ابوه.... قاسم طيب ومعدنه اصيل بس تحكمات ابوه ومقارناته بين دا ودا هو اللي خلى النفس الحقودية اللي جوه قاسم تظهر بوضوح
ظافر....: بص سيبها لله.... بكرة نشوف هيحصل ايه
اتصال من رعد
اسماعيل....: رد ع المكالمة وانا هاروح اتابع الشغل
اجاب ظافر وقال....: ازيك يادرش!
رعد....: بخير انت اللي اخبارك ايه؟
ظافر....: بخير والله... ها ياسيدي فاتحت القائد ولا لسه؟
رعد بتنهيدة....: لا.....لسه لما اضبط اموري وهي تفاتحه ف الموضوع وتقله ان فيه عريس وكدا.... وبيني وبينك انا هقله اني مش عاوز فترة خطوبة... انا عاوزها كتب كتاب وفرح ف نفس الليلة... وليلان أصلاً موافقة على كدا... يعني بالكتير اوي شهر واكون متجوز
ظافر....: على خيرة الله ياسيدي.... عقبالي
رعد....: اخبار العيلة ايه؟
ظافر....: لا اطمن خالص كله تمام وكمان زينة وشهاب هيرجعوا النهاردة؟
رعد بتوتر....: وليل!
ظافر باستغراب....: ليل مالها؟
رعد...: كويسة يعني؟
ظافر....: ايوا كويسة ليه؟
رعد بحدة....: هو ايه اللي ليه ياظافر بسأل عادي؟
ظافر بشك...: تمام
رعد...: انا هقفل معاك بقى عشان ليلان بترن عليا... جايز تكون قالت لباباها
ظافر....: مع السلامة ياصحبي
اغلق الخط بينما نظر ظافر بشك وهو يقول....: هي ايه الحكاية؟
اتى زين وقال...: لسه هتقعد ف الورشة يا ظافر؟... مش انت قلت انك هتروح النهاردة بدري عشان عندك فرح؟
ظافر....: اه ياعمي هاروح دلوقتي
____________________________________
دخلت بيلا للدوار واتجهت لأمها چودي وهي تقول...: كنت عاوزه الفين جنيه
چودي...: لإيه؟
بيلا...: هاروح اشتري بيهم حاجات للبشرة
حورية...: حاجات للبشرة بألفين جنية؟.. دانا دمي بيتصفى ف ام المستشفى دي وبيطلع عين اللي جابوني فيها وف الاخرمرتبي الفين جنيه ياستي
بيلا بتكبر...: والله مش ذنبي ان ابوكي فقير
حورية وهي تقف وتقول بشهقة تزامنت مع دخول ظافر الذي جحظت عيناه بشكل مرح وهو يشاهدها وهي تقول...: ابويا فقير؟؟؟؟؟...دانا لولا بس ان اخوكي خطيبي كنت مرمطت بكرامة اهلك الارض دلوقتي.... يبت دانتي شبه ام كوثر اللي حامل ف ست اشهر وبتتابع معايا.... الولية تقوليش خلة سنان وفيها زتونة!!!!؟؟
ظافر بحدة مصطنعة حتى لايضحك....: حورية؟؟؟؟
انتبهت هي فقالت....: شوف اختك بتغلط فيا وبتقول على ابويا فقير
ظافر بهمس...: لمي الدور لان البت وشها اصفر وتقريبا فقدت النطق
نظرت لها حورية فهمست وقالت...: انت شايف كدا؟
اومأ بالأيجاب فقالت حورية...: ع العموم see you later بقى عشان اروح اتابع مسلسلي المفضل فريندز
صعدت هي للأعلى فقال ظافر...: اسمعي يابيلا... اخر مرة اسمعك تكلمي حورية او اي حد من اهل بيتنا بالشكل دا.... هي لا بتشتغل عندك ولا انتي اللي بتقبضيها المرتب اخر الشهر.... لو ابوها فقير صحيح مكنتيش لبستي اللبس دا ولا شوفتي عز من اصله... لان الورشة ابوكي مشارك فيها مع عمي فهد ومش بينزل لأ... دا عمي فهد اللي شايل الشغل كله هو وعمي زين وتقديراً لظروف ابوكي وانه عنده القلب مريحينه ومش بيجهدوه... تيجي بعد كل دا وتنكري فضله!!!!.... دا اللي مش هسمح بيه أبدا!
نظرت بيلا بغضب وقالت....: متكلمنيش تاني بالأسلوب دا... وبعدين البنات عدمت عشان ف الآخر تجبلي واحدة زي دي؟.... ماقدامك شاهندا صحبتي!.... بنت عز وكمان من طبقة غنية ومتعلمة ومعاها لغتين
ظافر بسخرية....: مش واخده كورس برمجة بالمرة؟؟؟.... انا مش مختار حورية ف شغل!... انا مختارها شريكة حياتي...ولإني بحبها فمش ههتم برأيك دا.. بالعكس... ولا كأني سمعت حاجة.... حورية اللي مش عجباكي دي دكتورة أطفال ناجحة والكل بيحبها.... وأسلوبها حلو ومتواضعة مع الكل... لكن انتي حرفياً اسلوبك زفت ومتكبرة ومحدش أبداً هيحبك لو استمريتي بالوضع دا
كانت حورية تستمع للحوار وعندما صعد قابلها فقالت حورية...: انت زعلتها جامد يا ظافر.... صحيح انا فرحت انك دافعت عني بس ف الاخر دي اختك بردوا.... ياريت تصالحها عشان خاطري
ظافر...: مش دلوقتي يا حورية... لما تقعد مع نفسها وتحس انها غلط انا ساعتها هاروح اصالحها.... لكن مرحش دلوقتي عشان متتعودش ان كل ماتغلط لاتعتذر ولاتحس بتأنيب ضمير
حورية....: تمام عندك حق.... دلوقتي بقى هتروح الفرح ولا لأ عشان اجهز؟
ظافر....: اكيد هاروحه.... فيلا ادخلي اجهزي بقى
حورية...: فوريرة ياكابتن
دخلت هي الغرفة واغلقت الباب فابتسم هو ودخل لغرفته
____________________
في اليوم التالي
زينة في المدرج
زينة....: كانت رحلة عنب
صديقتها مروة...: انبسطتي؟
زينة...: اوي... وجمعت ٤٣ صدفة... بس واحد كسرلي صدفة واحدة....
مروة...: واحد!.... واحد مين؟
نظرت زينة بدهشة وأشارت عليه وقالت...: البأف دا!!!!
شهقت مروة وأنزلت ذراع زينة وقالت....: يخربيت أهلك دا الدكتور!!!!... يعني انتي أول محاضرة تحضريهاله تقومي شتماه!!!
زينة بقلق....: نهار أسود... انتي بتهزري ولا ايه؟؟؟... دانا بستفته في الرحلة... دانا كنت بعدي من قدامه ارزعه الهزاقه واكمل كل ماشوف خلقته... وكنت بقول ايه البرود دا... لانه كان بيضحك ويعتذر
مروة....: ياهبلة ماهو معاكي ف الرحلة... يعني من الجامعة... فهيبقى يطالب يا دكتور.... وبذمتك بالعضلات والطول دا... دا منظر طالب؟
زينة....: وانا ايش عرفني؟... مانا اخويا كان معايا وهو مش ف كلية العلوم أصلاً....
مروة...: طب ركزي لانه بيبص علينا
ابتسم يوسف وقال...: صباح الخير... انا دكتور يوسف العلايني.... بدرس مادة بصريات هندسة.... دكتور في كلية العلوم وبردوا ف كلية الهندسة وعندي شركة خاصة بيا بديرها بنفسي....
إحدى التلميذات....: حضرتك يادكتور دخلت قبل كدا مرتين بس اسبوع واسبوع... وعرفنا حضرتك فيهم
يوسف....: مين اذنلك تتكلمي بدون ماترفعي ايدك؟
التلميذة...: أنا متآسفة
يوسف وهو يكمل حديثه...: فيه ناس هنا جدد... وأول مرة أشوفهم ف المدرج... بس مش أول مرة أشوفهم ف الحقيقة.... وتقريبا هما افتقروا الذوق من زمان
كان ينظر لزينة التي كانت تنظر له بدهشة وتفتح فمها
يوسف...: وياريت الناس دول يقفلوا بقهم عشان متدخلش دبانه فيه
ضحك الكل بينما أغلقت زينة فمها ووضعت يدها عليه من الاحراج
يوسف....: هنبدء النهاردة ف شابتر ٢ وياريت الكل ينتبه معايا لان المحاضرة النهاردة اغلب النقط اللي فيها مهمة
ثم قال بمكر....: الناس القليلة الذوق سمعاني؟؟؟؟؟
تكملة الرواية من هناااااااا
لمتابعة باقى الرواية زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كاملةمن هناااااااااا
مجمع الروايات الكامله 1اضغط هناااااااا
مجمع الروايات الكاملة 2 اضغط هناااااا
تعليقات
إرسال تعليق