رواية ليالي الغول اقتباس من الفصل الأخير بقلم لوجي احمد

 - انتي يا زفته بقولك ايه

= لا متقلش.. مش معايا فلوس ولا بسلف حد

- فلوس مين يا شحاته انتي

= عايز ايه؟

- مش هتوافقي عليا و ننجز بقا ؟

= اوافق على مين يابني انت زي اخويا قولنا

- بس انا ابن خالتك!

= مهو جواز القرايب غلط مينفعش

- العيلة كلت وشي! كلهم اتجوزوا مفاضلش الا انا وانتي! ولا انتي بتفخميها عليا عشان دكتورة! 

= اه اعتبرني مغرورة وعايزه دكتور

- حالا اسيب شركة الهندسة وابقي دكتور

= فكك مني يا يحيى

- افكني منك ايه؟ وافقي عليا بقولك بدل ما اروح اعمل كاتنج في قورتي

"ضحكت فا بصلي بهدوء"

= انتي مش عايزه تديني فرصة ليه يا فريده!

- يحيى.. بلاش صدقني كده احسن

= طب ممكن اسألك على حاجه؟ وتجاوبيني

- عايز تعرف محوشه كام؟ احترموا نفسكوا بقا دي أسرار ناس عيب

" اضايق ومردش عليا فا صْربته براحه في كتفه"

- خلاص قول يخربيت قمصك!

= هو انتي فيه حد في قلبك! بتحبي حد يعني تاني؟ عشان كده مش عايزه تديني فرصه

" بصتله بتفكير.. وبعدت عيوني عنه و رديت "

- اه يا يحيى فيه حد تاني. انا آسفه بس ياريت متقولش لحد ممكن!

" مكنش مصدقني و لكن ملامح وشي كان مرسوم عليها الجد فا عرف اني مش بهزر.. "

" قام وساب التجمع العائلي و نزل..! "

" و في الحقيقة انا كدابة انا لو حد في قلبي.. فا هو و مفيش غيره ولا هيبقي فيه.. " 

" انا من ساعه ما وعييت على الدنيا مفيش راجل عرف يدخل قلبي غيره هو ، صديق طفولتي.. و رفيقي في المدرسة.. و المحامي بتاعي في قلب العيلة! و البودي جارد لو عندي خروجه في مكان بعيد! هو  كل حاجه.. "

" بس هروبي منه بقا معرفش سببه بالتحديد معرفش هل ده بسبب عقدتي ان بابا سابنا ولا ياتري بسبب العقدة الجديدة الى اكتشفتها "

>>>>>>>>>>>>>>>>>>>>>>>>>>>>>>>>>>>

|| بعد مرور اسبوع | في بيت كبير ||

- احمم بقولك يا هدي ابنك مش باين ليه؟

= مين أدهم ولا يحيى

- ءء.. يحيى ايه هو انا بطيقه.. ادهم طبعا

= أدهم وصلني وطالع

" متقولي يا وليه و يحيى فين الله ! لازم اسأل شكلي" 

- احمم.. و يحيى برضو معاه

= لا يختي قاعد في البيت مرضيش يجي

بصتلها بدهشه: نعم !!

بصتلي وسابت السلطه الى كانت بتعملها: فيه ايه يا فريده يوه

- مفيش يخالتو..! بس يعني ازاي يفوت تجمع العيلة مش كفاية المره الى فاتت سابكوا ومشي

= والله يابنتي ما عارفه حاله مقلوب ليه

" بدأت احس بالذنب.. طب ايه احنا بينا عشر دقايق اروح اخليه يجي!؟ افرض تجاهلني بقا زي ما عمل طول الأسبوع ده..! والله عيل قماص.. " 

- طيب بقولك ايه يخالتو؟

= قولي

- انا هنزل كده.. بصي قولي لأختك اي حاجه بقا عشان هي بتقعد تدخلني في سين وصاض

= سين وصاض اه. ماشي ، هتتأخري؟

- لا عيب عليكي هو انا ندله شبه ابنك عشر دقايق وابقي هنا وهجبلك حاجه تنحه وانا جايه

= امشي يابنت الجزمه امشي

" ضحكت و خت موبايلي والشنطه و نزلت اتمشيت لحد بيت خالتو و بعدين وقفت تحت العماره وبعتله مسدج "

- انزل انا تحت العماره بسرعه قبل ما 

حد يسـ ـرقني لسه قابضه الجمعيه

" استنيت تلت دقايق او اربعه ولاقيته نازلي ببرود "

-  انتي ايه الى جابك ؟

= و انت ايه الى مقعدك؟

- وانتي مالك الله؟ انا قايلك قبل كده على فكره متجيش الشارع ده بليل امك عارفه انك نزلتي؟

= لا امك انت الى عارفه امي بتعملي تحقيق

- يعني هضطر ارجعك بالترينج اتفضلي امشي

= ترجع مين! اطلع غير ويلا نروح الغدا بيتعمل

- مش عايز اجي يا فريده هو بالعافيه؟

= مش كبرنا على حركات العيال دي يا يحيى !!

اتكلم بنرفزه: انتي عايزه ايه بجد انا مش فاهمك ؟؟؟

" اتنهدت بزعل وبصتله "

- انت بقالك أسبوع بتتجاهلني وانا ساكته ومش راضيه أ

قاطعني: وانتي بقالك سنين بتضحكي عليا!

= يعني ايه!

- يعني بطلي يا فريده !! 

 ايا كان الى بتعمليه ده اسمه ايه بطليه!! احنا اقرب اتنين لبعض في الدنيا!! و انتي بتقوليلي إنك فجأة بتحبي حد تاني ؟؟

بعدت عيني عنه: انت يعني مستغرب ليه انا بقول الى حصل اعمل ايه؟ 

قرب ناحيتي مره واحده و بص لعيني: تبقي غبيه لو فاهمه اني مش عارفك وانتي بتكدبي .. انتي بتكدبي يا فريده.. انتي مبصتيش في عيني وانتي بتقولي ان فيه حد تاني و انا عارف و متأكد ان مفيش كدا كدا 

"عيوني لمعت بالدموع وبعدت خطوة عنه ومسكت نفسي"

- تمام امال بتتجاهلني ليه لو كلامك صح؟

= عشان مش مصدق انك مش عاوزاني لدرجه انك تكدبي عليا وتقوليلي فيه حد غيرك؟ ما تقولي مش عاوزاك

ضحك بسخريه وبصلي: لكن ازاي يبقي فيه حد غيري دي اصلا؟ انتي فاكره واحنا صغيرين.؟ فاكره قولتيلي ايه؟ لو ناسيه افكرك ! 

فلاش باك # 

- يحيى انا سمعت ماما و خالتو بيقولوا ان عادي الناس تسيب بعض ومفيش حد بيفضل مع حد للأبد!

= طب هما ليه قالو كده

- مش عارفه.. يمكن عشان بابا مش راضي يرجع من السفر؟ ماما بتقولي انوه عنده شغل

= اممم يمكن عشان كده

- بس انت كمان مش هتفضل معايا للأبد!

= لا احنا هنفضل سوا علطول

- طب زي ايه؟!

= زي القلب و الجسم انا اخدت في المدرسه انهارده ان القلب مش بيفارق الجسم ابدًا

ضحكت بطفولة: يبقي هنفضل سوا للأبد صح

- ايوه طبعا صح

باك # 

بصتله وانا بحاول انهي الجدال: ما احنا مع بعض اهو وفضلنا سوا! 

- مع بعض؟ والله! انتي بتبعديني عنك انا مش هقدر استحمل طريقتك دي 

= بس انت وعدتني تفضل جمبي

- اعتبريني كداب انا كمان

= لا انت مش بالقسوة دي!

- و انتي مش بالغباء ده.. كفايه تضيعي وقت انا عارفك و بفهمك .. انا حاسس ان انتي كمان عندك مشاعر ليا!! ليه بتحاولي تحاربيها! او تخبيها! 

"دموعي نزلت وبصتله بخنقه ليه يبقي فاهمني كده؟"

-  عشان انا خايفه !! 

- لا!  متخافيش من حاجه طول مانا جمبك!

= يحيى انا مش عايزه اجرحك! انت فاكر انك فاهم كل حاجه بتحصل بس ده مش حقيقي انت مش فاهم اي حاجة 

- خلاص فهميني!! 

رديت بعياط: مش هينفع !!

" بصلي وهو مش قادر يفهم وكان قلقان من عياطي.. انا عمري ما عيطت! لكن حسيت كأني بتخنق بقوة.. وحواليا حصار بيضيق عليا واحده واحده شعور عمري ما اتمناه لحد "

- طب اهدي يا فريده اهدي خلاص!

 بلاش نتكلم تمام؟ هدي نفسي

"مسحت دموعي وانا بحاول ارجع اتماسك حاولت مستسلمش للشعور ده و انهار..! "

- طب تعالي معايا انا مش هقعد مع العيله دي لوحدي

نفخ بضيق: طب هاجي ازاي كده انا!

= اطلع غير

- واسيبك لوحدك انا مش بآمن لشارعنا ده بربع جنيه نصه ناس تعبانه في دماغها والنص التاني بلطجي شبه رفاعي الدسوقي

= ده انت قديم اوي بجد

- طب يلا كدا كدا البيجامه حلوة صح؟

مسحت عيني وانا بضحك: شكلك شبه هاني الى كان في فيلم تتح 

- يا شيخة حسبي الله ونعم الوكيل

ابتسم وهو بيبصلي: على فكره شكلك حلو وانتي بتعيطي.. مكنتش اعرف ان عندك مشاعر زينا و دموع وكده

- بس يا مهزق اسكت

= طب يلا نرجع قبل ما حد يطلع علينا يثبتنا و يسرق منك الجمعيه.. هي كام صحيح

- انا بضحك عليك هو انا حلتي خمسه جنيه على بعض 

= كهن المنايفه ده مش بحبه

- خلاص تعالي نروح نتغدا و هشتريلك مصاصه تفاح بعد الغدا

= من ام خمسه جنيه؟ هتضيعي الخمسه الى حلتك

- لا هفاصل معاه في ام تلاته و اخد اتنين بخمسه

لطم على وشه: يلا يا فريده يلا

" ضحكت ومشينا .. روحنا بيت تيتة و بقينا كلنا متجمعين! و عرفت ان بعده عني الأسبوع الى فات كانت اسوء حاجه حصلت لي في حياتي! "

>>>>>>>>>>>>>>>>>>>>>>>>>>>>>>>>>

|| بعد فترة | في بيت خالتو ||

" كنت قاعده معاهم بنزور خالتو عشان تعبانه شوية.. أدهم موجود لكن يحيى في الشغل فا مكنتش مهتمه بحاجه لحد ما جملة خالتو رنت في ودني "

- كل ما اقولة على عروسة ميوافقش يختي معرفش ناوي يترهبن ولا ايه

= حطيه قدام الأمر الواقع و خدي معاد و روحي خليه يقابلها

- مانتي عرفاه عصبي ومش هيعجبه

" ادهم دخل في الحوار "

- متسيبو الواد في حالة يمكن بيحب و في في باله حد تاني ريحوا دماغكم

" بلعت ريقي بتوتر و بصتله حاولت اقلب الموضوع"

- وانت عامل ايه مع خطيبتك؟

= كل شوية نِدب في بعض بتتنفس نكد

ابتسمت: هو ده الحب يابني

" ضحك وبعدين انا ادركت الجملة الى قولتها.. وابتسمت على حالي بسخرية! " 

" شوية ولقيت يحيى وصل و بعد ما فضلنا حبه سوا قولتله اني محتاجه اتكلم معاه.. فا نزلنا نتمشي "

>>>>>>>>>>>>>>>>>>>>>>>>>>>>>>>>>>

- خير ايه الموضوع يا هايفه

= خالتو بتشتكي منك مش عاوز تتقدم لحد ليه؟ خلينا نخلص منك بقا

وقف وبصلي: تفتكري مش عايز ليه؟

- انا شايفه انك تدي فرصه لنفسك يا يحيى و تعمل علاقة وتبني حياة

= شايفه اني ادي لنفسي فرصة؟ مع حد تاني!

- ايوة

= وليه انتي متديش علاقتنا فرصة

- يحيى انا و انت متعودين على بعض زي الاخوات مش حاجه تانيه وعلاقتنا اخوية

= فريده انا مش عايز اتكلم في الموضوع ده

- لا هنتكلم! انت موقف حياتك على الفاضي ياريت تفهم ده! 

بدأت اتعصب من سكوته: انا عمري ما هبقي معاك فاهم ؟!! مستوعب ولا هتفضل محملني ذنبك

رفع عيونه وبصلي: تمام تمام

- ايه هو الى تمام؟

= تشربي عصير قصب؟

- هو انت مجنـ ـون !!

= يلا نجيب الجو حر وهدفع انا عشان انتي بخيلة

" فتحت عيني بدهشه وبصتله وبعدين زفرت انفاسي بغيظ من تناحته!! و برضو منفذتش الى كنت عاوزاه! و اليوم عدي و رجعنا البيت.. "

" كنت منهكه و فاتت فتره مش طويلة وانا بحاول ابعده عني لكن هو مش بيستسلم ابدا.. عشان يجي اليوم الى كله حاجه فيه تتقلب..! وكل الى مخططه له يتهد بالبطيئ "

>>>>>>>>>>>>>>>>>>>>>>>>>>>>>>>>>

|| في المستشفي ||

" فتحت عيني ببطئ مكنتش فاكره أحداث كتير بدأت اركز وادركت اني في مستشفى.. افتكرت اننا كنا خارجين انا و يحيى.. كنت بشتري حاجه وقولتله هننزل سوا.. ولفينا كتير شوية فا تعبت "

" قرب مني مره واحده وهو عيونه قلقانه قلق رهيب و الدموع متجمعه فيها "

- فريده انتي كويسه؟؟ حاسه بـ ايه؟؟ انتي كويسه؟؟

بصتله وانا بعيط وبحاول انفي الى في دماغي: انت عرفت حاجه؟!!! عرفت يا يحيى ؟؟ 

مسح على وشه وقعد جمبي بقلة حيله: ليه خبيتي

" مكنتش مصدقه انوه عرف.. مكنتش مصدقه اني هبان ضعيفه قدامه و كل حاجه خطط لها بتبوظ فضلت اعيط كتير وهو بيحاول يهديني ويتماسك ويبين القوة عشاني!! "

- عشان خاطري بلاش تعملي كده.. اهدي! كل حاجه هتبقي كويسة والله صدقيني خلي عندك امل في ربنا يا فريده 

= انا مكنتش عايزه حد يعرف!!

- ازاي؟ ليه تختاري تبقي لوحدك في ده!!

= عشان مشوفش من اي شخص النظرة الى في عينك دلوقتي!! انا مفيش فيا أمل!! انا كنت بتستخبي ورا كدبه اني كويسة عشان محدش يعرف!! لأن ببساطه مفيش امل ده كانسر في الدم في مرحلة متأخره!! وانا دكتوره يا يحيى وعارفه انوه خلاص! ملهاش حل!!

" كنت بتكلم وانا منهاره وبصتله "

- ماما ملهاش غيري انا وهي ملناش الا بعض من ساعه لما بابا سابها!! عاوزاني اخليها عايشة في رعب لحد ما امو ت ؟؟ ليه!!

قرب ومسك ايدي: فريده متقوليش كده!! فاهمه؟

- كنت عاوزاني اتجوزك يا يحيى و ادمر حياتك!! وانا حياتي خلاص بتنتهي!!

= اسكتي يا فريده!!

"دموعي نزلت بتعب"

- انت قولت لهم؟؟

= قولت انك تعبتي! وزمانهم جايين

- أرجوك متعرفش حد ارجوك!!

بدأت اعيط: عشان خاطري

مسك ايدي: طب اهدي هعمل الى انتي عاوزاه اهدي!

" فضلت امسح في وشي واهدي عشان محدش فيهم يحس بحاجه.. وهو قال لدكتور ميجبلهمش خبر.. عمل الى انا عاوزاه زي ما وعدني..! و قالو لهم هبوط و إرهاق عادي.. " 

" سابني يومين كنت مكتئبة.. مش قادره اتكلم مع حد..! خالتو جت تزورني.. و أدهم لكن هو مجاش!!"

" بس انا اديته عزره مانا برضو بفهمه زي ما بيفهمني! هو كان مصدوم من الخبر.. وبياخد وقته عشان يستوعب..مكنتش عايزه اعمل فيه كده! "

" تالت يوم اتفاجئت انوه بيزورني.. استغربت انوه جالي.. "

- عامله ايه؟

= كويسة..

بصتله بمرح: متقمصتش كتير كا العاده

اتكلم بجديه: هو ده وقت هزار

" لاحظت التعب الى باين عليه و الحزن "

- لو اتعاملنا كأن مفيش حاجه انت كده بتريحني

= حلو اوي موافق.. انا بقا عندي الي عايز اقوله برضو كمان ساعتين هجيب بابا و خالتك و ادهم وهنيجي و هتقدملك و هتوافقي يا فريده 

 بصتله بدهشه: انت مجنون !! 

" بصيت على الباب بتاع المطبخ و وطيت صوتي لأننا في الصاله "

- ايه الى بتقوله ده

= الى سمعتيه.. انتي ضيعتي كتير اوي يا فريده

- يحيى بطل غباء !! انت بتشفق عليا ولا اسمي ده ايه!! 

= سميه اني مش هسيبك تحت اي ظرف

- انت عايز تضيع حياتك عليا!!! انت هتندم دلوقتي مش هتفهم مدي غباء قرارك

= الحاجه الوحيده الى ندمان عليها اني مكنتش جمبك في كل الى فات بس دلوقتي انا عرفت وانا الى بختار

- مش هوافق يا يحيى !!

= يبقي خالتو تعرف كل حاجه

بصتله بصدمه: انت بتلوي دراعي؟ و بـ ايه!!

- بطلي عناد يا فريده

= مش هوافق يا يحيى.. وانت مش هتقولها انا عرفاك 

قبصْ ايده بعصبيه: انتي بتعملي كده ليه!!!!

" ماما دخلت وقاطعت كلامنا وهو استأذن بسرعه ونزل.. كله حاجه بتبوظ!!! " 

>>>>>>>>>>>>>>>>>>>>>>>>>>>>>>>>>>

" وصلت البيت و مغيرتش حاجه في كلامي مع أهلي.. هاروح و هتقدملها.. فتحت موبايلي وبعتلها مسدج طويله حاولت اطمنها.. و اعرفها برضو انها مش هتقدر تهرب مني في اي مكان.. حاولت لحد اخر لحظه مكنتش مديها الأمان.. بس كل ده اتحول لما قالت انها موافقة! "

" بدأنا نجهز كل حاجه.. و محدش في اهلنا كان فاهم ليه مستعجلين.. بس احترمت رغبتها ومجبتش سيرة لحد.. كنت بشجعها تكمل علاجها.. مكنتش بحسسها ان فيها حاجه كل شيء  مشي مظبوط.. حتي كتب الكتاب.. كتبناه وقولنا نعمل الفرح على مهلنا عبال ما كمان الشقة تخلص.. و بعد كتب الكتاب اخدتها و نزلنا.. "

- فريده

= قولتلك بقا ممعيش فلوس جبت بيهم طقم الاركوبال السحري

- شوف البت و التكييف ابو 35 ألف الى جبته ده

= معروفة التكييف عليك و المروحه عليا

- طب ما علينا.. انتي اخبارك ايه مبسوطه

ابتسمت وبصتلي: اه مبسوطه أوي.. عمري ما تخيلت اليوم ده يجي كنت بحلم بيه بس متخيلتش يجي

= ليه يا فريده!

- عشان كنت هحس اني انانيه.. وانا لسه حاسه بكده

= ممكن متحسيش تاني

- طب فين العصير الى قولت هتجبهولي.. بطلوا نصب بقا اتقوا بقا

ضحكت: طب عايز اقولك حاجه

- مش هسلفك تؤ

ابتسمت بصتلها بحب: انا عايز اقولك اني بحبك و مش ندمان لحظه واحده اني معاكي لو عمري فاضله ساعه عاوزها تكون معاكي انتي.

بصتلي وعيونها بتلمع: وانا كمان بحبك يا يحيى.. من واحنا صغيرين!

- لا بلاش عياط! انا هجيب العصير..

"ضحكت فا نزلت من العربية روحت اجيبه و رجعت"

- المنظر جميل من الشباك يحببتي بس بلاش تتنيح

"ضحكت ولقتها مبصتليش"

- فريده ؟ فريده !!!!

>>>>>>>>>>>>>>>>>>>>>>>>>>>>>>>>>>>

|| بعد مرور سنه || 

" كنت واقف قدام قبرها.. بحكي معاها كالعادة.. 

و بطمنها اننا هنبقي سوا في عالم تاني.. قصتنا مخلصتش لحد هنا.. مستحيل قصتنا تخلص بالطريقة دي.. هي تؤام روحي.. "

" حطيت الورد الى كانت بتحبه "

" و وقفت قبل ما اتحرك "

- نسيت اقولك حاجه يا فريده.. خالتو لسه بتفتح الجواب بتاعك لحد انهارده وعمرها ما زعلت يوم منك عشان خبيتي انا عارف اني كل مره بقولك كده..

- بس عايز اطمنك عشان كنتي خايفه تزعل لما تعرف انك كنتي مخبيا.. تعرفي؟ انا فخور بيكي اوي يا فريده! انتي قوية! 

- انتي اقوي بنت في الدنيا.. و اجمل حد عرفته في حياتي..

مسحت دموعي وكملت: فاكره يا لمضه يا جلابه المصايب عم محمد الى كنتي بتفرقعي صواريحْ قدام بيته في العيد؟ و تقعدي تحدفي بلالين فيها مياه.. و ترشي تلج..

- العيد ده.. مكنتش عارف اعمل حاجه من غيرك.. بس كنت بفتكر كل ذكرياتنا سوا.. هفضل فاكرك يا فريده للأبد.

>>>>>>>>>>>>>>>>>>>>>>>>>>>>>>>>>>>

" كنا مثل الشمس و القمر.. كلا منهما يُكمل الآخر يتواجدون في نفس المكان لكنهم لم يتقابلوا مطلقا.."

" تمت " 🥹💗 هستني رأيكم