رواية حكاية بنت الريف الفصل التاسع وعشرون 29بقلم صباح عبد الله حصريه
رواية حكاية بنت الريف الفصل التاسع وعشرون 29بقلم صباح عبد الله حصريه
#الفصل_التاسع_والعشرون من #حكاية_بنت_الريف
#الكاتبة_صباح_عبدالله_فتحي
بسم الله الرحمن الرحيم
في الغرفة اللي فيها دهب، الكل قاعد مستني دهب تفتح عينيها. وأخيرًا دهب فتحت عينيها، بس قفلتهم تاني.
نور بفرحة: دهب بتفتح عينيها أهو يا ماما سماح!
سماح تبص على دهب وتلاقيها فاقت فعلاً زي ما نور بتقول، وبدموع:
حبيبتي، حمدلله على السلامة يا قلبي.
دهب وهي لسه تحت تأثير البنج وبصوت ضعيف:
فين مهند؟ أنا مش شايفاه.
هاني: حمد لله على سلامتك الأول يا دهب، ما تخافيش، مهند هنا بس يمكن بيعمل حاجة وزمانه جاي.
أم سعيد بدموع: حمد لله على سلامتك يا بنتي، والله أنا مكسوفة من نفسي قوي يا دهب على الكلام اللي قولته ليكي… سامحيني بالله عليكي.
سماح: مش انتي بس يا أم سعيد اللي غلطتي بالكلام، إحنا كلنا غلطنا في حقك جدًا… سامحينا يا بنتي.
دهب تمسح دموعها: خلاص يا جماعة اللي حصل حصل. (باستغراب)بس أنتم ليه بتطلبوا السماح مني؟
هاني: مافيش داعي للتمثيل يا دهب، إحنا عرفنا كل حاجة (ويبص على نور)وعرفنا مين هو الخاين الحقيقي.
دهب بخوف وتوتر، وتقوم بسرعة:
ده بجد؟! عرفتوا؟ طيب فين مهند؟ أنا عايزة مهند!
سماح: اهدي يا بنتي، مالك خوفتي كده ليه؟
دهب بدموع: بالله عليكي يا ماما، فين مهند؟ أنا عايزة مهند!
(يدخل مهند من الباب وبصوت خالي من المشاعر)
مهند: خير يا دهب، عايزة إيه مني؟ أنا أهو.
دهب تقوم من على السرير وتجري تحضنه:
مهند حبيبي! إنت كويس؟ في حد عمل فيك حاجة؟
وتبص على جسمه وتحسس عليه بقلق ودموع:
حد أذاك يا مهند؟
مهند باستغراب: اهدي يا دهب، أنا كويس! حد مين اللي هيعمل فيا حاجة؟ مش فاهم.
دهب تبص عليه وتسكت باستغراب:
مش أنتم عرفتوا الحقيقة؟
مهند يبعد عنها:
عرفت إيه يا دهب؟
دهب ببراءة واستغراب:
مش أنتم عرفتوا مين الخاين؟
(مهند يحب يستغل براءتها علشان يعرف الحقيقة بنفسه)
مهند بهدوء: أيوه يا دهب، عرفنا، بس عايز أسمعها منك إنتي.
دهب تبص على مهند:
مش إنت عرفت إنها…
(ولسه هتكمل، يدخلوا سميرة وسوزان فجأة، ودهب تتصدم وتفهم إن محدش لسه عرف عنهم حاجة، فتسكت فورًا)
مهند باستغراب: سكتي ليه يا دهب؟ هي مين؟ كملي!
سميرة بتوتر (تهمس لسوزان):
يا لهوي! الغبية دي كانت هتحكي كل حاجة لمهند!
الحمد لله إننا وصلنا في الوقت المناسب، ولا كونا دفنا نفسنا بايدينا!
(وتبص على دهب بغضب ويتغير وشها كالحرباية)
سميرة بخبث: دهب حبيبتي، حمد لله على السلامة! خوفتينا عليكي والله يا بنتي!
(وتحضنها قدام الكل، وتهمس في ودنها بصوت الأفاعي):إنتي اتجننتي؟ كنتي عايزة تكشفي كل حاجة لمهند؟عارفة لو كنتي قولتي كلمة واحدة بس…كنت هولع فيكي وفيه قدام عينك!
(وتشدها من دراعها جامد وتهمس تاني)
خدي بالك يا حبيبتي، علشان ما تشوفيش حبيبك مقتول قدامك!
(وبصوت عالي وهي تمسح على وش دهب)
حبيبتي، ما شاء الله عليكي، عسولة قوي مع إنك تعبانه بس جمالك باين!
سوزان تقرب وتحضن دهب:
حمد لله على السلامة يا حبيبتي (وبصوت واطي) شيرين صاحبتك… تعيشي إنتي يا حبيبتي، في حد قتلها!
دهب تفتح عينيها على آخرهم من الصدمة، وبصوت واطي ما يسمعوش غير نفسها: شيرين ماتت إزاي؟
وتبص على سميرة وسوزان: معقولة هما اللي قتلوها؟ طيب قتلوها ليه؟
وفجأة تحس بوجع في بطنها وتحط إيديها على بطنها، وبصوت عالي من الوجع: آه بطني!
مهند يمسك دهب بخوف: حبيبتي إنتِ كويسة؟
دهب بدموع: بطني وجعاني قوي يا مهند.
مهند بحزن: معلش يا قلب مهند.
ويشيل دهب وياخدها وينيمها على السرير: ارتاحي، وأنا هروح أشوف الدكتورة اللي عاملة لكِ العملية تكتب لكِ على مسكن ولا حاجة، أكيد ده من العملية وتأثير البنج راح.
دهب تمسك في دراع مهند...سوزان واقفة وعينيها على إيد دهب اللي ماسكة بيها مهند، ومن الغضب توقع كوباية المية اللي محطوطة على الكومودينو اللي جنب السرير اللي دهب نايمة عليه.الكل ينتبه لصوت الكوباية لما وقعت على الأرض.
سوزان بخبث: أنا آسفة يا جماعة، ما أخدتش بالي إن في كوباية على الكومودينو.
وتركع على ركبها وتعمل إنها بتلم الإزاز، وتبص على دهب بغضب وحقد وغل، وتمسك إزازة من اللي على الأرض وتخوف دهب بيها، وتبص على مهند والإزازة في إيديها وتهدد دهب إنها هتقتل مهند — بس بالنظرات والحركات مش بالكلام. دهب تفهم حركاتها وتخاف من نظرات سوزان، وتبص على مهند وتيجي شايلة إيديها من عليه.
مهند: دهب، حبيبتي إنتِ كويسة؟ كنتِ عايزة حاجة مني أو عايزة حاجة أجيبها لكِ؟
دهب تبص على مهند والكل وتسكت:
(كانت عايزة تقول له) "نفسي أقولك افضل جنبي يا مهند، إنت واحشني قوي، نفسي أخدك في حضني زي زمان... آه يا مهند لو تعرف قد إيه حضنك واحشني قوي..."
مهند بخوف: مالك يا دهب يا حبيبتي ساكتة ليه كده؟ حاسة بإيه؟ في حاجة بتوجعك؟ الوجع جامد؟
دهب بحزن: لا يا مهند، أنا كويسة، هو في مغص بس مش جامد.
سماح: طيب معلش يا حبيبتي، روح يا مهند يا ابني للدكتورة، خليها تيجي تكتب على حاجة للمغص، وإحنا نجيبها لها من أي صيدلية.
مهند: حاضر يا ست الكل.
ويقوم علشان يروح للدكتورة علشان تكتب حاجة عشان المغص اللي عند دهب...سوزان تشوف إن مهند طلع من الأوضة، وبابتسامة خبيثة: بعد إذنكم يا جماعة.
وتطلع تجري ورا مهند.
دهب تكلم نفسها بغيظ: أكيد طالعة علشان تشوف مهند... آه يا ربي، أنا واحدة هبلة، سايبة واحدة تانية تعمل اللي هي عاوزاه وتقرب من جوزي قدام عيني! بس أعمل إيه؟ أنا لو اتكلمت ولا قولت حاجة ممكن يقتلوه... أنا مستعدة أستحمل أي حاجة غير إني أشوفه مجروح، حتى لو شوكة شاكته... أنا ما أقدرش أشوفه مجروح أو فيه حاجة... يارب احميلي جوزي من كل شر.
برّه الغرفة سوزان بدلع: مهند استنى
مهند ينتبه إن في حد بينادي عليه، يبص ورايَه يلاقي سوزان. يقول باستغراب: سوزان عايزة حاجة؟
سوزان بدلع: لا مش عايزة حاجة، هعوز إيه يعني؟ بس قلت أسأل عليك، لأنك أنت مش بتسأل على حد يعني. أنا بقى ليا فترة عندكم في البيت وحتى ما فكرتش تيجي تسلم عليا، من حقي أزعل طبعًا.
مهند بأسف: أنا آسف والله يا سوزان، مش قصدي، بس إنتي شايفة الظروف اللي في البيت والمشاكل اللي مش بتخلص.
سوزان تحط إيديها على شعرها وتشيل الشعر المتمرد من على وشها وتحطه ورا ودنها وهي بتقول: عادي يا مهند، ولا يهمك إحنا لسه فيها.
وتيجي بكل برود وتحتضنه. مهند واقف مصدوم من حركة سوزان ومش عارف يعمل إيه، وحاسس بإيديها بتمسّ على جسمه بكل حقارة؛ يغمض عينيه ومحرج إنه يكسف سوزان مهما كان — هي بنت عمته وهو بيعتبرها زي أخته الصغيرة ومحرج إنه يكسفها قدام الناس الغريبة اللي في المستشفى. سوزان حضنه مهند جامد ومستمتعة بحضنه، وعمالة تحسس على جسمه بإيدها بكل وقاحة وقلة حياء. مهند يبعد سوزان عنه وباحراج: سوزان أنا اتجوزت دلوقتي، وإنتي كمان كبرتي، مش مسموح لك تقربي مني بالشكل ده مرة تانية، وأنا آسف لو كلامي هيجرحك، بس أنا بحب مراتي وبحب أفضّل لها، ومافيش واحدة تانية تقرب مني غيرها.
سوزان تحاول تفضل هادئة، تبص لمهند وتفضل ساكتة وهي بتفرك في إيديها جامد. مهند بأحراج: أنا آسف يا سوزان لو كلامي زعلك. بعد إذنك هروح أشوف الدكتورة تكتب حاجة لدهب علشان هي تعبانة، عاوزة حاجة أجيبها لك وأنا جاي.
سوزان من غير وعي: أنا مش عايزة غيرك ومش هاسيبك غير لمّا آخدك مني.
مهند بعدم فهم: إنتي بتقولي إيه؟ أنا مش فاهم كلامك.
سوزان تاخد بالها: ها لا، ولا حاجة.
وبدموع تمساح: بس كلامك جرحني أوي. أنا طول عمري بحبك، كأخ ليا، ولما حضنتك حضنتك علشان أنت وحشتني، مش علشان الطريق الرخيص اللي انت بتفكر فيها ده. متخيلتش إنك بعد الجواز هتفكر فيا بالشكل ده.
وتاخد نفسها وتجري من قدام مهند قبل ما يسمع ردها.
مهند: سوزان استني، مش قصدي أزعلك والله.
ويجري ورا سوزان علشان يصلحها ويمسكها من دراعها: استني يا سوزان، أنا آسف والله، مش قصدي أجرحك.
سوزان بدموع: بس أنت جرحتني أوي يا مهند» وتتحضن مهند «أنا بحبك بجنون».
وتجي بكل وقاحة وتبوس مهند.
❈-❈-❈
في الغرفة دهب عاملاها تعيط من كتر الوجع وسماح قاعدة معاها ساكتة.
سماح: معلش يا حبيبتي استحمالي شوية، والله أنا مش عارفة مهند اتأخر كده ليه. ما تروحي يا هاني تشوف أخوك اتأخر ليه؟
هاني: حاضر يا أمي.
ويطلع من الغرفة ويتصدم من اللي شايفه — هو شاف مهند وسوزان واقفين وبيبوسوا بعض، وبص على دهب بحزن، ويرجع يبص على مهند وسوزان بقرف، ويسبهم ويروح يجيب العلاج لدهب.
مهند يفوق هو اتخيل دهب في سوزان. وبغضب يبعد عنها ويجيضربها بالقلم: انتي اتجننتي يا بنت؟! انتي! الحق عليا إني جاي أصلح واحد رخيص زيك.
سوزان حطت إديها على وشها مكان القلم اللي أخدته من مهند وبغضب: فين الغلط في اللي أنا عملته؟ أنا بحبك، بحبك يا مهند، ومن زمان قوي بحبك من وانا عندي 15 سنة. بحبك بجنون ومستعدة أعمل أي حاجة علشان تكون معايا أنا وبس يا مهند.
ومن غير وعي منها: حتى مستعدة أقتل دهب يا مهند لو ما بعتش عنها وبقيت ليا أنا. وعد مني هتشوفها ميتة وهيكون موتها على إيديّ أنا.
مهند يمسك سوزان جامد من دراعها: «انتي اكيد اتجننتي يا بنت انتي إيه الكلام اللي انتي بتخرفي وتقوليه ده؟ وانتي عارفة لو لمستي شعرها بس من شعر دهب أنا هاعمل فيك إيه؟
سوزان بغضب: مهند هتعمل إيه يعني؟ أخطر من اللي انت عملته. أنا من يوم ما وعيت على الدنيا حبيتك، وانا عايشة في عذاب كله بسببك يا مهند، وصدقني أنا مستعدة أنفذ كل كلمة أنا بقولها لك دلوقتي.
مهند بغضب: لأ بقى ده انتي اتجننتي رسمي باين عليكي.
ويتركها ويمشي. سوزان بصوت عالي: أنا فعلا اتجننت، بس تجننت بيك يا مهند، واتجننت من يوم ما حبيتك. ووعد مني مش هاسيبك في حالك، لا انت ولا الغبية اللي انت بتقول عليها حبيبتك ومراتك، أنا هقتلها أنت سامع؟ هقتلها.
وتقعد على الأرض وتفضل تعيط: وأنا إيه الغلط اللي أنا عملته ده كله علشان بحبك.
وتمسح دموعها بغضب وتقوم من على الأرض: دهب انتي السبب في كل عذابي ده، وانتي اللي أخدتي مني حبيبي مهند. أنا هقتلك بإيدي.
في الغرفة دهب نامت من كتر التعب.
نور بحزن: دي نامت يا ماما.
سماح: كويس إنها نامت، سيبها ترتاح شوية على ما هاني ومهند يجيبوا العلاج.
هاني يدخل بالعلاج اللي الدكتورة كتبته علشان دهب: أهو يا أمي.
نور: دهب نامت يا هاني.
هاني يبص على نور بغضب: هو أنا وجهت لكِ كلام؟ لما أبقى أكلّمك ابقي ردي.
نور بدموع: أنا آسفة يا هاني.
سماح بعصبية: إيه يا هاني بتكلم نور كده ليه يا ابني؟ إحنا كلنا عارفين إنها غلطانة غلطة كبيرة كمان، بس إحنا في النهاية بشر وكلنا بنغلط، وهي اعترفت بغلطها وطلبت السماح، وإحنا كلنا سامحنا، وإنت بقى لسه زعلان ليه؟
هاني: دي ما تستاهلش حد يسامحها يا أمي، دي خنتنا وخدعتنا كلنا.
نور بدموع: أنا آسفة والله، أنا عارفة إني غلطت، بس والله أنا ندمانة من كل قلبي، والله يا هاني أنا آسفة بالله عليك سامحني يا هاني، أنا عارفة إني غلطت، بس والله أنا بحبك قوي وما أقدرش أعيش من غيرك، ومش قادرة على بعدك عني ونظرات الكره دي، أنا اتعودت على هاني اللي بيحبني ونظرات الحب منك، مش الكراهية اللي بتحرق قلبي.
هاني: وأنا كمان حبيت نور البنت البريئة الطيبة اللي على نيتها، اللي ما تقدرش تؤذي حتى حشرة، مش نور البنت الخاينة والمخادعة والكذابة والمجرمة اللي قتلت طفل قبل ما ييجي على الدنيا. أنا قررت ننفصل أنا وانتي يا نور، ما بقيتش قادر آمن على مستقبلي ومستقبل عيالي معاكي، أنا آسف.
نور بدموع وتحط إيديها على ودانها: بس يا هاني كفاية بالله عليك، أنا ما بقيتش قادرة أستحمل بعدك عني لحظة، وانت بتقول ننفصل؟ عارفة إني غلطت بس انت مش حاسس بالعذاب وتأنيب الضمير اللي أنا فيه، مش تيجي انت وتزودها عليا! أنا عارفة إني غلطانة بس والله ندمانة وندمانة قوي كمان.
وتنهار على الأرض وبدموع: أنا أكتر واحدة غبية، أنا دمرت حياتي ومستقبلي وحياتي الزوجية قبل حتى ما تبدأ، وكسرت ثقة وحب الشخص اللي أنا ما حبتش غيره طول حياتي، بسبب غبايي أنا دمرت سعادتي بإيدي.
سماح بحزن وتروح وتحضن نور: لا حول ولا قوة إلا بالله العلي العظيم، هو إيه اللي بيحصل ده يا ربي؟ ده كله كان مستخبي لنا فين بس يا ربي؟ يعني في أسبوعين ده كله يحصل؟ جوزي مات، وابني الكبير مراته سقطت، والصغير بيدمر حياته بإيديه! آه يا ربي، لسه في إيه تاني مخبيه لنا من مشاكل وهموم؟ يا رب ارحمنا برحمتك يا رحمن يا رحيم.
أم سعيد بحزن: معلش يا حبيبتي، ده امتحان من ربنا ولازم نصبر عليه.
سماح بدموع: ده امتحان صعب أوي، يا ربي الطف بينا يا رحمن.
مهند يدخل وفي إيده كيس علاج وباستغراب وخوف: إيه يا جماعة في إيه؟ ويروح عند أمه: خير، مالك يا ست الكل بتعيطي ليه؟
سماح بدموع: تعالَ يا ابني شوف أخوك بيقول إيه.
مهند يبص على هاني: إيه يا هاني، في إيه؟
هاني يبص لمهند بغضب ويفتكر اللي هو شافه ويكمل بحزن: أنا قررت أنفصل أنا ونور، ما بقيتش عاوزها، ومش هقدر أكمل حياتي معاها بعد اللي هي عملته.
مهند بصدمة: إنت بتخرف؟ بتقول إيه يا هاني؟
هاني: أيوه زي ما سمعت، أنا ما بقيتش عاوزها.
نور بدموع: بس أنا بحبك، وما أقدرش أعيش من غيرك! إنت هتقدر تعيش من غيري؟ طيب، هتكون مرتاح ومبسوط لو انفصلنا؟
هاني من غير ما يبص لنور: أيوه، هكون مبسوط ومرتاح، وانتي مش أول واحدة ولا آخر واحدة.
نور بدموع: بقى كده يا هاني؟ عارفة إني غلطانة والله، بس عقابك ده صعب أوي يا هاني.
وتحط إيديها على بوقها لتكتم صوت عياطها، وتطلع تجري على بره.
مهند بحزن: ما تظلمهاش يا هاني، إحنا كلنا عارفين إنها غلطت وغلطها كبير أوي، بس إحنا في النهاية بشر، وكلنا بنغلط، وهي طلبت السماح واعترفت بغلطها، أنا في رأيي تديها فرصة تانية.
هاني ينظر لمهند نظرات غير مفهومة: وانت ليه ما ادّيتش دهب فرصة تانية؟
يتبع...
فى رايكم نور تستاهل فرصة تانيه؟
اذكر ربك.. ذكر الله راحة للقلب وطمأنينة للنفس،
قول: سبحان الله، الحمد لله، لا إله إلا الله، الله أكبر.
«وَذَكِّرْ فَإِنَّ الذِّكْرَى تَنْفَعُ الْمُؤْمِنِينَ»
تكملة الرواية من هناااااااا
لمتابعة باقى الرواية زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كاملةمن هناااااااااا
مجمع الروايات الكامله 1اضغط هناااااااا
مجمع الروايات الكاملة 2 اضغط هناااااا
تعليقات
إرسال تعليق