رواية ليالي الغول اقتباس من الفصل الأخير بقلم لوجي احمد

رواية حكاية عشق "الجزء الاول" الفصل الثالث عشر والرابع عشر بقلم نهلة مجدى 

رواية حكاية عشق "الجزء الاول" الفصل الثالث عشر والرابع عشر بقلم نهلة مجدى 

#حكاية_عشق

الفصل الثالث والرابع عشر

انطلق طارق بسيارته مع ايمي الى منزلها في صمت ،قاطع صمتهم رنين هاتف ايمي برقم شقيقتها ،اجابت بسرعة

ايمي:وحشتيني 

منه:وانتى كمان وحشتيني اوي

كان طارق يراقبها وهي تتحدث بصمت

ايمي:عاملة اية وبابا وماما كويسين

منه:احنا كويسين المهم انتي

ايمي:انا الحمدلله كويسة

منه:خطوبتي بكرا خلاص 

ايمي:ربنا يتمملك على خير ياحبيبتي 

منه:انا خايفه اوي يا ايمي

ايمي:ليه بس

منه:خايفه من خالد شكله صعب اوي

ايمي:طول ما وراكي بابا اوعي تخافي لو عملك حاجة قولي لبابا ومتخافيش

منه:حاضر 

ايمي:خلي بالك من نفسك

منه:وانتي كمان سلام

ايمي:باي

اغلقت الهاتف وزفرت بتعب وشردت قليلا في امر خطبة شقيقتها وظلت تقول في نفسها:"ربنا يستر عليكي يامنه...انا من زمان مش برتاح خالد ولا طريقة معاملته يارب ميزعلهاش يارب وتقدر تتعامل معاه"

قاطع شرودها صوت طارق قائلا:سرحانه في ايه

نظرت له وقالت:هه مفيش

طارق:كنتي بتكلمي اختك

ايمي:اه منه 

طارق:شكلك بتخافي عليها اوي

ايمي:اه

طارق:اسكت مش عايزة تتكلمي انا مضايقك

ايمي:لا ابدا انا بس قلقانه شوية

طارق:على اختك؟!

ايمي:ايوا 

طارق:لو عايزة تحكي انا معاكي اهو

ايمي:مش قادرة دلوقتي طارق:فاضية بكرا

ايمي:لا مش فاضية غير بعد يومين

طارق:خلاص يبقى يوم الجمعه هنقضي يوم سوا ينفع

صمتت قليلا حتى ظن طارق انها سترفض ولكنها اجابت:موافقه

ابتسم طارق بسعادة وقال:هخليكي تقضي يوم مش هتنسيه ابدا

ابتسمت ايمي ولم تعقب ،وصلت السيارة امام منزل ايمي ،مدت يدها لتصافحه فقبل يدها بحب وقال:خلي بالك من نفسك

ايمي بخجل:حاضر وانت كمان 

نزلت من السيارة ودخلت منزلها وانطلق طارق عائدا الى منزله..

******************************************

مر الوقت وتم خطبة منه وخالد وايمي وطارق يتحدثون كل يوم على الهاتف واستقر عمل ايمي ولارين بنجاح ،اما خالد سافر لكي ينهي اعماله خارج البلاد اما منه فهي كانت تخشى الحديث مع خالد فهو سريع الغضب وايضا يتعامل معها بحدة وهي رقيقة جدا لا تستطيع ان تجادل معه فتبكي وتصمت.

جاء يوم الجمعة اليوم الذي انتظره طارق بفارغ الصبر ،ارتدى بدله سوداء وقميص ابيض وربطة عنق ووضع عطره المميز ،ركب سيارته واتجه لمنزل ايمي وصل امام المنزل وهاتفها ،بعد دقيقتين ظهرت ايمي بطلتها الرائعه كانت ترتدي بنطلون من الجينز وقميص يصل الى قبل الركبة بقليل وحجابها ،نزلت من سيارته واقترب منها وقبل يدها بحب وقال:شكلك حلو اوي

ايمي بخجل:ميرسي

استقلوا السيارة وذهبوا الى المطاعم على البحر وجلسوا ،كانوا بتحدثون وهم يتناولون العشاء

طارق:انتي عندك كام سنه

ايمي بمرح:طب ليه الاحراج ده

ضحك طارق بشدة وقال:احراج ليه انتي شكلك صغير

ايمي:عندي 27 سنه

طارق:بتهزري صح شكلك ميديش كدة خالص

ضحكت ايمي وشرد طارق في ضحكتها ولون عيناها 

طارق بحب:انتي عينكي حلوة اوي

ايمي بخجل:بجد 

طارق:ايه محدش قالك ان عينكي حلوة قبل كدة

ايمي:لا في واحد

طارق بضيق:ومين ده

ايمي:خالو 

طارق:اها وباباكي ومامتك لا

ايمي بحزن:بابا وماما عمرهم ماقالولي حاجة

طارق:ايمي انتي ليه دايما عينكي حزينه

نظرت له ايمي وعيونها تلمع بالدموع ولم تجب

طارق:طب خلاص انا اسف ممكن تحكيلي عن نفسك 

نظرت ايمي ناحية البحر واشارت الى صخره كبيرة عند البحر وقالت:طب انا عايزة اروح عند الصخرة دي

نظر طارق للصخرة وقال بحب:اوامرك 

امسك يدها واخذها في اتجاه الصخرة وجلسوا عليها امام البحر ،ظلت تنظر للبحر وبشرود اخرجها من شرودها صوته قائلا بمرح:لا ما احنا جاين هنا عشان تتكلمي مش تسرحي

ايمي بابتسامة:معلش بقى 

طارق:بتقولي ايه للبحر

ايمي:بشتكي له

طارق:من مين

ايمي:من الدنيا

طارق:احكي يالا

ايمي:اسمي ايمان سمير عندي 27 سنه بشتغل دكتورة نسا وتوليد عندي اخت اسمها منه اصغر مني ب10 سنين جيت هنا بعد ما خلصت ثانوية عامه مليش صحاب غير لارين بس

طارق:ايه اللي خلاكي جيتي هنا

ايمي بهروب:عادي حبيت ادرس برا 

طارق:واهلك وافقوا عادي

ايمي:لا طبعا بابا وماما كانوا رافضين بس خالو اللي اقنعهم

طارق:باين ان خالك بيحبك اوي

ايمي:ايوا وانا كمان بحبه جدا انا بقوله يا بابا اصلا هو اللي مربيني

طارق:ولما خلصتي دراسه ليه مرجعتيش

ايمي:من يوم ماجيت هنا وانا قررت مش هرجع تاني...طارق يالا نقوم نتمشى

نهضوا وظلوا يمشون وهم يتحدثون

طارق:ليه كنتي قلقانه على اختك

كادت ان تجيب ولكن قاطعها صوت تعرفه جيدا يقول:ايمان

التفتت لتجده كما توقعت ،نعم خالد!!

اقترب منها وقال:ازيك يا ايمان

ايمي:كويسة ازيك انت

وهو ينظر لطارق:كويس

نظرت ايمي لطارق وقالت:باشمهندس طارق ده خالد ابن عمي 

خالد باشمهندس طارق مهندس ديكور

صافحه طارق قائلا:فرصه سعيدة يا استاذ خالد

خالد:انا اسعد 

نظر طارق لايمي بمعنى هل ارحل ،اومأت ايمي براسها فرحل طارق ،كان يود ان يبقى معها اكتر ولكن مجيئ خالد دمر كل شئ ،نظرت ايمي لخالد وقالت:انت بتعمل ايه هنا

خالد:هنتكلم واحنا واقفين تعالي نقعد في اي حته نتكلم

وافقت ايمي وذهبوا لاحدى الكافيهات وجلسوا

خالد:انا كنت جاي عشان اصفي شغلي هنا وارجع استقر في مصر 

ايمي:طب كويس

خالد:مش ناوية ترجعي مصر

ايمي:مش دلوقتي

خالد:اومال امتى ده ابوكي وامك نسيوا شكلك من كتر ما انتي بعيد ده حتى اختك متعرفيش شكلها من وهي عندها 8 سنين

ايمي:خالد لو سمحت متتكلمش في الموضوع ده 

خالد:مين اللي كان معاكي ده

ايمي:ما قولتلك مهندس ديكور هو اللي كان بيجهز المركز بتاعي

خالد:وايه اللي جابه معاكي النهاردة

ايمي بضيق:وانت مالك لسه بتدخل في اللي ملكش فيه

خالد بحده:ايمان لمي لسانك

ايمي:الزم حدودك معايا يا خالد 

امسكها خالد من يدها حتى تآلمت 

ايمي بآلم:خالد سيب ايدي الناس بتبص علينا 

خالد بغضب:لما الاقي بنت عمي ماشيه مع راجل غريب واسيبها ايه قالولك عليا اريال

ايمي:انا حره ملكش دعوة واوعى تستخدم اسلوبك الهمجي ده مع منه اذا كانت هي متعرفكش انا عارفاك كويس ووش الملاك اللي راشمه قدام ابويا ده ميخلش عليا فاهم يا خالد

تركها خالد بقوة وقال:ماشي يا ايمان ليكي اب يترد عليه

وتركها وذهب زفرت ايمي بضيق وعادت الى المنزل وعي غاضبه..

يتبع..

بقلمي:#نهلة_مجدي

الفصل الرابع عشر

عادت ايمي الى المنزل وهي غاضبة ،جاءت لارين من غرفتها عندما سمعت صوت ايمي ،جلست بجانبها وظلت صامته قليل ثم تحدثت وقالت:مالك يا ايمي طارق زعلك

ايمي:لا مش طارق

لارين:اومال مين

ايمي بضيق:زفت خالد

لارين:خالد ده خطيب اختك

ايمي:ايوا هو 

لارين:شوفتيه فين

ايمي:شافني مع طارق و"قصت عليها ماحدث"

لارين بحده:ايه الحيوان ده..... بس افرضي قال لابوكي

ايمي:يقوله انا معملتش حاجة غلط قبلت مهندس الديكور صدفه ووقفت اسلم عليه

لارين:بجد ليكي حق تقلقي على منه من خالد ده

ايمي:ربنا يستر نكد عليا الله ينكد عليه

لارين:معلش ياحبيبتي تتعوض ان شاء الله

ايمي:انا هدخل انام تصبحي على خير

لارين:وانتي من اهل الخير

*******************************************

مر اسبوع وايمي وطارق يقتربان من بعضهم اكثر وفي يوم كانت تجلس في مكتبها ،سمعت صوت طرقات على باب المكتب فأذنت بالدخول ،فتح الباب ودخل منه طارق

طارق بابتسامة:ممكن ادخل 

ايمي بفرحة:طارق تعالى اتفضل

دخل طارق ومد يده ليصافحها 

طارق:عامله ايه

ايمي:الحمدلله وانت

طارق:الحمدلله... وحشتيني

اخفضت ايمي نظرها بخجل فاكمل طارق:هو انا موحشتكيش

ايمي:طارق مبحبش الكلام ده

طارق:هو انا قلت حاجة عيب

ايمي:اقعد ياطارق 

جلس طارق في المقعد المقابل لها وقال:هو انا معطلك

ايمي:لا ابدا انا مش بعمل حاجة كنت ماشية

نهض طارق وقال:طب يالا اوصلك ونتكلم ايمي:اوكي

خرجوا من المركز واستقلوا سيارة طارق 

طارق:عملتلك مشاكل مع ابن عمك صح

ايمي:عادي

طارق:عملك حاجة

ايمي:ميقدرش

طارق بمرح:واثقه انتي

ابتسمت ايمي وقالت:خالد من يومه سخيف وبدخل في اللي ملهوش فيه وبيحب يتهزق 

ضحك طارق وقال:ده انتي مشكلة... هو ده خطيب اختك

ايمي:هو بعينه

طارق:ربنا بعينها عليه

******************************************

اما في مصر عاد خالد من لندن ويتوعد لايمي فذهب الى منزل عمه ،بمجرد ان علمت منه انه عاد شعرت بالخوف لا تعلم لماذا ،جلس خالد ينتظر عمه في الحديقة ،جاء سمير

سمير:ازيك ياخالد حمدلله على السلامه

خالد:الله يسلمك ياعمي.. عايز اتكلم معاك في موضوع بخصوص ايمي

سمير بقلق:مالها ايمي 

خالد:حضرتك ليه مقولتليش ان ايمي في لندن

سمير:مانت مسألتنيش ليه في ايه

خالد:في ان احنا هنا نايمين على ودانا والهانم دايرة على حل شعرها هناك

سمير بغضب:احترم نفسك يا خالد انا بنتي متربية 

خالد:اه بامرة اني لاقتها ماشية مع راجل ولما اسألها مين تقولي وانت مالك

سمير بغضب:خااالد متنساش ان دي بنتي اتكلم عنها عدل

خالد:انا قولتلك اللي شوفته واللي عندك اعمله سلام

تركه خالد وذهب اما سمير فدخل بسرعة الى منزله وامسك هاتفه ليهاتف ايمي

******************************************

ظلوا حوالي 10 دقائق صامتين فقال طارق:مكملناش كلامنا المرة اللي فاتت مش هتكملي

ايمي:خلاص شوف فاضي امتى 

كاد ان يتكلم ولكن قاطعه رنين هاتف ايمي ،نظرت ايمي للهاتف وعندما وجدت والدها اجابت بسرعة:بابا ازيك

سمير بغضب مكتوم:الكلام اللي ابن عمك قاله ده صح

ايمي بعدم فهم:كلام ايه

سمير بصوت عالي:ايمان بلاش استعباط

ايمي:بابا لو سمحت اهدا انا مش فاهمه حاجة

ظل طارق يراقبها بقلق وهو يرى دموعها تنهمر على وجنتيها 

سمير عبر الهاتف: الظاهر اني كنت غلطان لما وافقت انك تسافري وتعيشي في بلد الناس اللي فيهم لا عندهم دين ولا اخلاق والظاهر كمان انك اتعلمتي منهم 

ايمي بدموع:بابا بلاش تقول كدة انت عارف بنتك كويس

سمير:الكلام ده ميفرقش معايا قدامك اسبوع وترجعي كفاية لحد كدة 

ايمي:انا اسفه يا بابا بس انا مش راجعه تاني

سمير:براحتك يا ايمان بس خليكي عارفه انك عصيتي ابوكي

واغلق الهاتف ظلت ايمي تبكي بشده ،اوقف طارق السيارة والتفت اليها وقال بقلق:ايمي اهدي 

ظلت تبكي اكثر كلما تذكرت ما قاله والده وماضيها الصعب

ربت طارق على يدها بحنان وحاول تهدأتها ولكنها لم تهدأ وجد نفسه يضمها بشده تمسكت ايمي به وظلت تبكي كأنها وجدت امانها في حضنه ظل طارق يهمس لها:اهدي عشان خاطري... ايمي كفاية بكى دموعك دي صعبه عليا اوي

ظل يضمها كانه يريد ان يخبئها بداخله حتى هدأت ايمي ووجدت نفسها في احضانه ،رفعت نظرها اليها بخجل فمسح دموعها وظل يملس على وجنتيها وقال بحب واضح:دموعك دي بتوجعني اوي 

ايمي..... 

اكمل طارق:انا مش عارف انتي عملتي فيا ايه عايزك دايما جانبي ،بحب اشوفك دموع لما بتنزل بحس نار جوايا قوليلي ده ايه

ابتعدت ايمي عنه وقالت بدموع:طارق روحني

طارق:ايمي ٱآ

ايمي:ارجوك روحني انا تعبانه

طترق باستسلام:حاضر 

ادار محرك السيارة واوصلها الى المنزل وذهب ،دخلت ايمي للمنزل ووجدت لارين ارتمت في احضانها وظلت تبكي ،تركتها لارين حتى تهدأ ولم تتكلم ،بعد فترة هدأت ايمي وقصت الى لارين مكالمة والدها ولكنها لم تقول لها عن ماحدث مع طارق

لارين:طب اهدي وفكري هتعملي ايه

ايمي بدموع:معرفش معرفش انا تعبت تعبت من حياتي دي 

لارين:ياحبيبتي اهدي يعني هترجعي مصر

ايمي:مش عارفه لسه يعني هسيب شغلي وارجع ازاي هستنى شوية لما الامور تهدى وبعدين اشوف

لارين:ماشي ياحبيبتي ادخلي ارتاحي انتي شكلك تعبانه

ايمي:ماشي 

*******************************************

في اليوم التالي استيظت منه على صوت رنين هاتفها وجدته خالد اجابت بسرعة 

منه:الو

خالد:مش بتردي ليه

منه:كنت ناينة مسمعتش الموبايل 

خالد:طيب عاملة اية 

منه:كويسة وانت

خالد:كويس هتتغدي معايا الاول 

منه:طيب هقول لبابا واكلمك

خالد:ايه نقول لبابا دي هو انا مالي عينك

منه:لا مقصدش بس لازم استأذن بابا

خالد بضيق:طيب ياختي نص ساعة وهكلمك تاني 

اغلق الهاتف دون ان يسمع ردها 

منه محدثه نفسها:اووف ياربي انا اين اللي كان وقعني الوقعه المنيلة دي 

نهضت ودخلت المرحاض وتوضاءت لتصلي وبعدها خرجت لوالدها وجدته يجلس في الحديقة شاردا

منه:بابا بابا

سمير:هه منه انتي صحيتي

منه:اه ياحبيبي صباح الخير

سمير:صباح النور ياحبيبتي ايه الي مصحيكي بدري مش عادتك يعني

منه بضيق:خالد هو اللي صحاني 

جاءا منال وجلست هي الاخرى

منال:صباح الخير يامنه

منه:صباح الخير يا مامتي... بقول لحضرتك يا بابا خالد كان عايزني اتغدى معاه النهاردة قولتله هستأذن حضرتك الاول 

سمير: ومتصلش هو يقولي ليه

منال:طبعا ملهوش عين. بعد اللي عمله

منه بعدم فهم:عمل ايه

سمير ليغير مجرى الحديث:ولا حاجة روحي يا منه

شعرت منه بالاحباط فهي كانت تتمنى ان يرفض والدها الخروج مع خالد فهي حقا تخشى التعامل معه بسبب حدته ولكن والدها خيب امالها

******************************************

كان طارق جالسا في منزله لم يذهب الى عملها فجاء اليه عماد

عماد:ايه ياعم مجتش الشغل ليه مش عوايدك

طارق:مش فايق خالص للشغل

عماد:مالك

قص عليه طارق ماحدث في الايام الماضية

عماد:وهتعمل ايه؟!! 

طارق باصرار:هقولها اني بحبها

يتبع... 

 تكملة الرواية من هناااااااا 

لمتابعة باقى الرواية زورو قناتنا علي التليجرام من هناااااااااا

بدل ماتدور وتبحث علي الروايات عمل 

متابعه لصفحتنا على فيس بوك هنااااااااااا

الرواية كاملةمن هناااااااااا

مجمع الروايات الكامله 1اضغط هناااااااا

 مجمع الروايات الكاملة 2 اضغط هناااااا