رواية ليالي الغول اقتباس من الفصل الأخير بقلم لوجي احمد

  اخت جوزي كامله بقلم منال عباس

اخت جوزي كامله بقلم منال عباس

الاول

كنت عمري ما قولت لأخت جوزي إن المدرسة الدولية الكبيرة اللي كانت بتلف عليها من مكتب لمكتب علشان تدخل ابنها فيها هي في الحقيقة ملكي أنا

كانت كل ما تشوف بنتي تقول دي بنت بطيئة ومش من مستوانا وكانت تمنع ابنها حتى يلعب معاها وتفضل تقول قدام الناس ابني عبقري ومستقبله كبير لكن بنتك دي مكانها أي مدرسة حكومة وخلاص

وفي يوم مقابلة القبول كانت قاعدة في قاعة الانتظار وكل اللي حواليها سامعين كلامها السام وهي بتبصلي من فوق لتحت وكأني ولا حاجة

ضحكت بصوت عالي وقالت قدام الكل إيه اللي جابك هنا يا هدى هو انتي جاية تمسحي الأرض ولا إيه

وقبل ما أرد عليها بلحظة واحدة اتفتحت أبواب الإدارة

ومدير المدرسة خرج بسرعة وأول ما شافني وقف باحترام وقال اتفضلي يا فندم مجلس الإدارة مستني حضرتك

دخلت بهدوء وقعدت ورا أكبر مكتب في القاعة وبصيت لها وأنا محافظة على هدوئي وقلت ابنك سقط في اختبار القبول وإحنا هنا مبندخلش المتنمرين ولا اللي اتربوا على إيد متنمرين

كانت قاعة الانتظار في مدرسة القمة الدولية هادية بشكل يخوف وكل اللي فيها لابسين شيك وكل واحد ماسك ملف ابنه وكأنه شايل عمره كله بين إيديه

أنا كنت قاعدة في آخر القاعة لابسة بدلة بسيطة من غير أي مظاهر ولا شنطة ماركات ولا مجوهرات تلفت النظر وكنت بقلب في ملف أزرق سميك بكل هدوء

بعد شوية الباب اتفتح بعنف ودخلت أخت جوزي نجلاء وهي ماسكة إيد ابنها كريم وكانت ماشية وكأن المدرسة كلها ملكها

أول ما عينيها وقعت عليا وقفت مكانها لحظة وبعدها ضحكت ضحكة مستفزة خلت كذا حد يبص علينا

قالت بصوت عالي يا نهار أبيض هدى هنا

كل الناس بقت تبص ناحيتنا وهي كملت كلامها بمنتهى الشماتة

إيه ده انتي كمان مقدمة لبنتك هنا بجد عندك أمل يقبلوها دي

أنا مردتش ولا رفعت عيني من الملف

قربت مني أكتر وقالت ولا تكوني جاية تدوري على شغل في المدرسة أصلهم أكيد محتاجين حد ينضف الفصول

ضحكت لوحدها وهي مستنية أي حد يضحك معاها لكن محدش عبرها

رجعت قالت وهي بتبص لبنتي اللي كانت قاعدة جنبي بهدوء بصي يا حبيبتي المدارس دي للناس اللي عندها مستقبل مش لأي حد داخل وخلاص

بنتي بصتلي بعين مليانة دموع لكنها سكتت عشان كانت عارفة إني دايمًا بقولها الكرامة أهم من أي رد

قفلت الملف براحة ورفعت عيني لأول مرة وبصيت لنجلاء وقلت بهدوء أنا موجودة هنا علشان أتأكد إن المدرسة هتفضل محافظة على مستواها

قهقهت بصوت أعلى وقالت أيوة طبعا حافظي على المستوى وخلي بالك من الزبالة قبل ما الضيوف يوصلوا

وفي اللحظة دي باب مكتب المدير اتفتح

خرج المدير الأستاذ شريف وهو راجل الكل بيعمله ألف حساب

نجلاء عدلت هدومها بسرعة وابتسمت ابتسامة مصطنعة ومدت إيدها وقالت أستاذ شريف أخيرا اتقابلنا

لكنه عدى من جنبها كأنها مش موجودة واتجه ناحيتي مباشرة

وقف قدامي بكل احترام وقال يا فندم مجلس الإدارة مستني حضرتك وكل الملفات جاهزة على مكتبك

في اللحظة دي القاعة كلها سكتت

ونجلاء سحبت إيدها ببطء وهي مش فاهمة اللي بيحصل

أما أنا فوقفت بكل هدوء وابتسمت ابتسامة صغيرة وأنا شايفة الصدمة مرسومة على وشها ولسه المفاجأة الحقيقية ما بدأتش أصلا…بقلم منال عباس

وقفت نجلاء مكانها كأن الأرض اتسحبت من تحت رجليها وبقت تبصلي مرة وللمدير مرة وهي مش مستوعبة اللي سمعته

قالت وهي بتحاول تضحك أكيد حضرتك تقصد حد تاني

المدير رد بمنتهى الهدوء لا يا فندم أنا بكلم الأستاذة هدى رئيسة مجلس إدارة مجموعة المدارس

وشها اصفر في ثانية ولسانها اتربط أما الناس اللي كانوا قاعدين في الانتظار فبدأوا يبصوا لبعض ويهمسوا

واحدة ست كانت قاعدة جنبها قالت بصوت واطي معقول دي صاحبة المدرسة

ورجل كبير قال واضح إننا كنا قاعدين مع أهم شخصية هنا ومحدش خد باله

نجلاء قربت مني وهي بتحاول تبتسم وقالت هو إنتي بتهزري معانا ولا إيه

بصيت لها بهدوء وقلت أنا عمري ما بهزر في شغلي

المدير فتح باب المكتب وقال اتفضلي يا فندم اللجنة كلها مستنية حضرتك

دخلت وأنا ماسكة ملف القبول والباب اتقفل ورايا

جوه القاعة كان أعضاء مجلس الإدارة قاعدين وكل واحد قدامه ملفات الأطفال المتقدمين

أول ما دخلت وقفوا كلهم يسلموا عليا

قعدت على الكرسي الرئيسي وقلت يلا نبدأ

أول ملف اتحط قدامي كان ملف كريم ابن نجلاء

فتحت الملف بهدوء وبدأت أراجع درجاته

واحد من أعضاء اللجنة قال الولد مستواه الدراسي متوسط لكن كانت عندنا ملاحظات مهمة أثناء المقابلة

قلت إيه هي

رد اتخانق مع طفل تاني أول ما دخل وقاله إنت شكلك غلبان ومش هتتقبل هنا وبعدها زقه قدام اللجنة ولما طلبنا منه يعتذر رفض وقال بابا ومامته علموه إنه أحسن من أي حد

سكت ثواني وأنا بقلب باقي الأوراق

ولقيت تقرير الأخصائية النفسية مكتوب فيه إن الطفل عنده مشكلة واضحة في احترام الآخرين وإن سببها أسلوب التربية داخل البيت

قفلت الملف وأنا بفكر

في نفس الوقت كانت نجلاء برا مش قادرة تستنى

قامت من مكانها وفضلت تمشي رايح جاي وهي بتقول لكل الموجودين أكيد هدى عرفِت المدير بطريقة ما مستحيل تكون صاحبة المدرسة دي أكيد حركة علشان تكسفني

لكن بعد دقائق الباب اتفتح

خرج سكرتير المجلس وقال الأستاذة نجلاء وابنها كريم يتفضلوا

دخلت وهي رافعة راسها ومتصنعة الثقة

أول ما دخلت وشافتني قاعدة على رأس الطاولة وكل أعضاء المجلس قاعدين على الجانبين فهمت إن الحقيقة اللي كانت بتحاول تهرب منها بقت قدام عينيها

وقفت ساكتة وأنا بصيت لها وقلت اتفضلي اقعدي لأن اللي هتسمعيه النهارده هيغير حاجات كتير جدا في حياتك كلها..بقلم منال عباس

نجلاء قعدت على الكرسي وهي بتحاول تثبت نفسها لكن إيديها كانت بترتعش وابنها كريم قعد جنبها وهو بيبص حواليه بخوف

بصيت في الملف مرة أخيرة وبعدها رفعت عيني عليها وقلت

قبل ما نتكلم عن النتيجة أنا عندي كام سؤال

قالت بسرعة وهي بتحاول ترجع ثقتها

اتفضلي

قلت

هو صحيح إنك علمتي ابنك إن في ناس أقل منه علشان فلوسهم أقل

وشها اتغير وقالت

أكيد لا مين قال الكلام ده

لفيت الملف ناحية أعضاء اللجنة وقلت

ده تقرير الأخصائية النفسية وده تقرير لجنة المقابلة وكلهم كتبوا نفس الملاحظة

واحد من أعضاء اللجنة فتح ورقة وقال

الطفل قال بالنص إن والدته قالت له ميصاحبش الأطفال اللي أهلهم مش أغنيا لأنهم هيأخدوه لتحت

نجلاء اتوترت وقالت

ده طفل صغير أكيد فهم غلط

بصيت لكريم وقلت بهدوء

يا كريم محدش هيزعقلك قول الحقيقة

الولد بص لأمه وبعدين وطي راسه وقال بصوت ضعيف

ماما قالتلي كده فعلا وقالت لو لقيت بنت اسمها ملك متلعبش معاها لأنها بنت خالتك وغلبانة

نجلاء صرخت فيه

اسكت

لكن كريم كمل وهو بيعيط

وقالتلي كمان لو حد سألني عن بنت خالتي أقول معرفهاش

القاعة كلها سكتت

وأعضاء المجلس بقى واضح على وشهم الاستياء

أنا أخدت نفس طويل وقلت

إحنا هنا مش بنقيم الأطفال في الرياضيات واللغات وبس إحنا بنقيم البيئة اللي هيتربوا فيها كمان

نجلاء قالت بعصبية

يعني هتعاقبوا ابني بسببي

رديت بهدوء

إحنا بنحمي باقي الأطفال

واحد من أعضاء المجلس قال

الأستاذة هدى من أول يوم حطت لائحة واضحة إن أي طفل يثبت إنه بيتنمر أو بيحتقر غيره بسبب الفلوس أو الشكل أو المستوى الاجتماعي بيتم رفض طلبه حتى لو درجاته كاملة

وش نجلاء احمر من الغضب وقالت

يعني علشان بيني وبينها مشاكل شخصية هترفضوا ابني

في اللحظة دي فتحت درج المكتب وطلعت ظرف أبيض كبير…يتبع

الثاني والاخير

نجلاء بصت للظرف وكأنها شايفة فيه نهايتها ومدت إيدها وهي بتحاول تخبيه بسرعة لكن أنا سحبته قبل ما تلمسه وقلت بهدوء

لا متستعجليش ده لسه متفتحش

واحد من أعضاء مجلس الإدارة قال

لو سمحتي يا أستاذة هدى نشغل التسجيل

هزيت راسي بالموافقة

المدير ضغط على زر صغير وفي ثواني امتلأت القاعة بصوت نجلاء وهي بتضحك بصوت عالي

يا ساتر دي جاية تقدم لبنتها هنا والله العظيم دي لو دخلت المدرسة هتبقى خدامة لبنتي

وبعدها سمعوا صوتها وهي بتقول

أنا ابني مينفعش يقعد مع عيال غلابة ولا مع بنت هدى دي أصل الطباع بتتعدي

الصمت نزل على القاعة بشكل مخيف

نجلاء حطت إيديها على وشها وقالت بسرعة

أنا كنت بهزر

لكن التسجيل مكملش عند كده

ظهر صوتها وهي بتقول لابنها

لو شوفت ملك اقفل وشك في وشها ومتردش عليها خليها تعرف إنها أقل منك

كريم أول ما سمع كلام أمه خبى وشه في حضنها وبدأ يعيط

أنا بصيتله بحزن وقلت

الولد مش مذنب الذنب الحقيقي على اللي زرع جواه الكبر والاحتقار

نجلاء قامت من مكانها وقالت بعصبية

إنتي بتنتقمي مني علشان غيرانة مني طول عمرك

كل أعضاء المجلس بصوا لها باستغراب

ابتسمت بهدوء وفتحت درج المكتب مرة تانية وطلعت ملف قديم عليه طبقة تراب خفيفة

قلت

فاكرة الملف ده

اتوترت وقالت

أي ملف

فتحت أول صفحة ووريتها لها

وشها اتغير في لحظة

ده كان ملفي أنا من عشر سنين لما جيت أقدم بنتي في المدرسة

وقتها إنتي كنتي معايا

فاكرة قولتي للموظفة إيه

سكتت ومردتش

بصيت للمدير

قال

الملف محفوظ بكل تفاصيله

فتحت الصفحة الأخيرة وكان فيها تقرير بخط المدير القديم

تم قبول الطفلة بتفوق لكن والدتها طلبت تأجيل الإجراءات بسبب ظروف عائلية

رفعت عيني على نجلاء وقلت

تعرفي إيه اللي حصل يومها

إنتي خرجتي قدام كل الناس وقلتيلي إن بنتي مهما دخلت مدارس كبيرة عمرها ما هتبقى زي ابنك وإن الفلوس هي اللي بتعمل قيمة الإنسان

أنا وقتها سكت ومردتش

مش ضعف لكن علشان كنت عارفة إن الزمن بيرد أحسن من أي كلام

واحد من أعضاء المجلس قال

إحنا مش هنا علشان خلافات عائلية إحنا هنا علشان مستقبل أطفال

قلت

وعشان كده القرار عمره ما كان شخصي

وبعدين سحبت ملف تاني من فوق المكتب

الملف كان لونه أخضر ومقفول بختم المدرسة الرسمي

المدير أول ما شافه اتعدل في قعدته

وأعضاء المجلس بصوا لبعض باستغراب

أما نجلاء فقالت بتوتر

هو ده ملف مين

ابتسمت وأنا حطيت إيدي عليه وقلت

ده الملف اللي هيكشف الحقيقة اللي محدش في العيلة كلها يعرفها والسبب الحقيقي اللي خلاني أخفي عنكم سنين إني المالكة الفعلية للمدرسة من الأساس…بقلم منال عباس

نجلاء فضلت تبص للملف الأخضر كأنها خايفة حتى من اسمه وقالت بصوت مهزوز

يعني إيه السبب الحقيقي

ابتسمت بهدوء وفتحت أول صفحة ولفيتها ناحيتها

أول ما عينيها وقعت على الورق شهقت وقالت

مستحيل

كان قدامها عقد التأسيس الأصلي للمدرسة

واسمي متكتب فيه بصفتي المالكة وصاحبة أكبر نسبة من الأسهم

قالت وهي مش مستوعبة

بس إنتي طول عمرك عايشة حياة عادية

قلت

لأن الفلوس بالنسبة لي وسيلة مش غاية

أنا كنت عايزة بنتي تكبر وهي تعرف قيمة الناس بأخلاقهم مش بحساباتهم في البنك

واحد من أعضاء المجلس قال

الأستاذة هدى كانت رافضة يظهر اسمها في أي إعلان أو احتفال خاص بالمدرسة وكانت بتتابع كل حاجة من بعيد

المدير كمل كلامه وقال

حتى الموظفين الكبار مكانوش يعرفوا شخصيتها غير بعد توقيعهم على تعهد بالسرية

نجلاء كانت بتحاول تستوعب اللي بيحصل وقالت

طب ليه خبيتي كل ده حتى عن أخويا

سكت شوية وبعدها قلت

علشان كنت عايزة أعرف الناس بتحبني لشخصي ولا لفلوسي

وللأسف إنتي كنتي أول واحدة كشفتي حقيقتك

كل مرة كنت باجي بيت العيلة كنتي تتعمدي تقللي مني

مرة علشان عربيتي بسيطة

ومرة علشان هدومي

ومرة علشان الهدايا اللي بجيبها

وكل مرة كنتي تقولي قدام الناس إن أخوكي اتجوز واحدة على قد حالها

أنا كنت بسكت

مش علشان ضعيفة

لكن علشان كنت مستنية اليوم اللي تشوفي فيه الحقيقة بنفسك

نجلاء نزلت عينيها في الأرض لأول مرة

لكن فجأة رفعت راسها وقالت بعصبية

حتى لو كل ده حقيقي إنتي برضه ظلمتي ابني

أنا بصيت لكريم وقلت

تعالى يا كريم

الولد قام ببطء وقرب مني

نزلت لمستواه وقلت

لو دخلت المدرسة دي هتتعلم إيه

بصلي وقال

هتعلم إن محدش أحسن من حد

ابتسمت وربت على كتفه وقلت

أنا فرحانة إنك فهمت الدرس بسرعة

الولد حضني فجأة وهو بيعيط وقال

أنا آسف يا طنط هدى وآسف لملك

الكلمة دي خلت القاعة كلها تسكت

حتى أعضاء المجلس اتأثروا بالمشهد

لكن نجلاء فضلت واقفة مكانها والكبرياء لسه مانعها تعترف بغلطها

في اللحظة دي الباب خبط

السكرتيرة دخلت وهي باين عليها التوتر وقالت

معلش يا فندم في شخص برا مصر يطلب يقابل حضرتك حالا وبيقول إن الموضوع يخص المدرسة ويخص الأستاذة نجلاء كمان

أنا استغربت وقلت

مين

ردت وهي بتبص في الورقة اللي بإيدها

بيقول اسمه المستشار شريف السيوفي وبيقول إن معاه مستندات لو اتفتحت النهارده هتغير حياة كل الموجودين في القاعة

أول ما نجلاء سمعت الاسم وشها بقى أبيض كأنه اختفى منه الدم كله وهمست من غير ما تحس

لا مستحيل هو رجع تاني..بقلم منال عباس

أول ما سمعت همسة نجلاء ركزت في وشها ولقيت الرعب مالي عينيها بطريقة عمري ما شوفتها قبل كده

قلت بهدوء

واضح إنك تعرفيه كويس

هزت راسها بسرعة وقالت

لأ معرفوش

لكن صوتها كان بيرتعش بشكل فضحها

بصيت للمدير وقلت

خليه يدخل

بعد ثواني الباب اتفتح

دخل راجل في أواخر الخمسينات لابس بدلة رمادي وملامحه كلها هيبة وكان ماسك شنطة جلد قديمة

أول ما دخل بص على نجلاء وقال

بعد السنين دي كلها لسه بتهربي من الحقيقة

نجلاء قامت من مكانها وهي بتزعق

إنت ملكش حق تيجي هنا

بصلي الراجل وقال

حضرتك الأستاذة هدى

قلت

أيوة

مد إيده بالشنطة وقال

الشنطة دي كانت أمانة عندي من أكتر من خمس سنين ومكتوب عليها إنها تتسلم لحضرتك أول ما يحصل خلاف يخص المدرسة أو يخص الأستاذة نجلاء

القاعة كلها بقت ساكتة

المدير أخد الشنطة وحطها قدامي

فتحتها بهدوء

كان جواها ظرف كبير وأوراق كتير وفلاشة صغيرة

فتحت أول ورقة

كانت عبارة عن إقرار رسمي موقع من نجلاء

بصيت لها باستغراب

وقالت وهي بترتعش

متفتحيش الورق ده

لكن المستشار قال

لازم يتفتح لأن الحقيقة اتأخرت كتير

بدأت أقلب الأوراق

ولقيت عقود وإيصالات وتحويلات بنكية

وفجأة وقعت عيني على صورة

أول ما شفتها اتجمدت

كانت صورة لنجلاء وهي خارجة من مكتب واحد من الموظفين القدام في المدرسة

وبتسلمه ظرف مليان فلوس

رفعت الصورة قدام الجميع

وقلت

إيه ده

المستشار رد

دي صورة من كاميرات المكان اللي كان شغال فيه الموظف قبل ما يتفصل

نجلاء صرخت

الصورة دي متفبركة

قال

مستعجلة ليه

لسه في تسجيلات

شغل الفلاشة على الشاشة الكبيرة

ظهر الموظف القديم وهو بيتكلم بصوته

الأستاذة نجلاء جتلي قبل سنين وطلبت مني أضيع ملف خاص بالأستاذة هدى وبنتها مقابل مبلغ كبير وقالت إن لازم محدش يعرف حقيقتها

أنا رفضت في الأول لكنها فضلت تضغط عليا لحد ما غلطت ووافقت وبعدها ندمت واعترفت بكل حاجة قبل ما أسيب شغلي

وش نجلاء فقد كل لونه

وأعضاء المجلس بقوا يبصوا لها بصدمة

واحد منهم قال

يعني إنتي حاولتي تلعبي في ملفات المدرسة

المستشار قال

وده مش كل حاجة

لسه في أوراق أخطر

فتحت الظرف الكبير

ولقيت تقرير مكتوب بخط واضح

عنوانه

محاولة تزوير مستندات خاصة بالقبول

قلبي دق بسرعة

وبدأت أقرأ

وكانت المفاجأة إن المستندات بتقول إن نجلاء قبل كده حاولت تدخل ابنها المدرسة من باب الواسطة بعد ما سقط في أول اختبار من سنتين لكن طلبها اترفض واتحفظت الأوراق في سرية كاملة حفاظا على سمعة العيلة

بصيت لنجلاء وقلت

يعني دي مش أول مرة ابنك يترفض

نزلت دموعها لأول مرة

لكن قبل ما تنطق بكلمة واحدة خرج صوت من آخر القاعة

صوت راجل أنا أعرفه كويس

قال وهو داخل بخطوات سريعة

أنا كمان عندي حقيقة لو اتقالت دلوقتي محدش فيكم هيصدق إن نجلاء قدرت تخبيها السنين دي كلها…بقلم منال عباس

كل الأنظار اتجهت ناحية الباب

دخل جوزي سامح وهو بيجري ووشه كله غضب وصدمة وفي إيده ملف قديم

أول ما نجلاء شافته شهقت وقالت

إنت إيه اللي جابك

بصلها وقال

جبت الحقيقة اللي دفنتيها سنين

وقف قدامي ومدلي الملف وقال

أنا آسف يا هدى

بصيتله باستغراب وقلت

آسف على إيه

قال وهو بيحاول يمسك دموعه

آسف إني صدقت أختي كل السنين دي

فتحت الملف

كان جواه عشرات الرسائل المطبوعة وتحويلات بنكية وصور

سامح قال

من أسبوع كنت بدور على ورق قديم في بيت أبويا بعد وفاته ولقيت صندوق مقفول باسمي

أول ما فتحته لقيت كل المستندات دي ورسالة من أبويا

طلعت الرسالة وبدأت أقراها

لو الرسالة دي وصلت ليك يا سامح يبقى الحقيقة لازم تظهر

أختك نجلاء حاولت أكتر من مرة توقع بينك وبين مراتك لأنها كانت شايفة إن هدى أحسن منها في كل حاجة وكانت بتخاف إن الحقيقة تظهر وإن هدى هي المالكة الحقيقية للمدرسة اللي كل الناس بتحلم تدخلها

لو يوم شكيت في مراتك افتكر إنها عمرها ما طلبت مني ولا جنيه وإنها هي اللي ساعدتني في أصعب أيام حياتي من غير ما حد يعرف

دموعي نزلت غصب عني

أما سامح فبص لنجلاء وقال

كل مرة كنتي تيجي تقولي إن هدى بتغير منك كنت بصدقك

كل مرة كنتي تقولي إنها بتصرف فلوس كتير من ورايا كنت بصدقك

حتى لما قولتيلي إنها حاولت تمنع كريم يدخل المدرسة صدقتك

لكن طلعتي إنتي اللي كنتي بتكدبي عليا طول السنين

نجلاء قعدت على الأرض وهي بتعيط وقالت

أنا عملت كده لأني كنت حاسة إن الكل بيحبها أكتر مني

بابا كان دايما يفتخر بيها

وأمي كانت تقول إنها بنت أصول

وأخويا عمره ما رفع صوته عليها

وأنا كنت كل ما أشوفها أنجح أحس إني بصغر

أنا غيرت منها

آه غيرت منها

وده خلاني أعمل حاجات عمري ما تخيلت إني أعملها

سامح قال بوجع

يعني دمرتي بيتي علشان الغيرة

قالت وهي بتنهار

أنا كنت فاكرة إنها لو خسرت كل حاجة هرتاح

لكن كل ما كانت تقع كانت بتقوم أقوى

وأنا اللي كنت بخسر نفسي كل يوم

قمت من مكاني وقربت منها

كل الموجودين افتكروا إني هوبخها

لكن قلت بهدوء

أنا مسامحاكي على حقي الشخصي

لكن في حقوق تانية مش بتاعتي

حق بنتي اللي كسرتي قلبها

وحق ابنك اللي علمتيه يحتقر الناس

وحق المدرسة اللي حاولتي تستغليها

بصيت لأعضاء مجلس الإدارة وقلت

أنا بطلب تنفيذ اللائحة كاملة من غير أي مجاملة حتى لو الموضوع يخص أقرب الناس ليا

وقف رئيس المجلس وقال

بعد مراجعة كل الأدلة قرر المجلس بالإجماع رفض طلب قبول كريم هذا العام مع منحه فرصة للتقديم من جديد العام القادم بعد اجتياز برنامج سلوكي وتأهيلي مع والدته لأننا بنؤمن إن التربية ممكن تتصلح لو في اعتراف حقيقي بالخطأ

كريم جري ناحيتي وحضني وهو بيبكي وقال

أنا أوعدك يا طنط هدى إني هبقى إنسان كويس وهعتذر لملك قدام المدرسة كلها

ابتسمت وربت على راسه

وفي اللحظة دي حسيت إن أكبر انتصار مش إن الحقيقة ظهرت

لكن إن طفل صغير فهم في يوم واحد الدرس اللي الكبار معرفوش يتعلموه طول عمرهم…بقلم منال عباس

عدى سنة كاملة

وفي أول يوم من التقديم الجديد للمدرسة كنت واقفة في نفس المكان اللي بدأت منه الحكاية

لكن المرة دي كان في فرق كبير

الباب اتفتح

ودخلت نجلاء وهي ماسكة إيد كريم

مكنش لابس هدوم غالية ولا ماشي بتكبر

كان أول ما شاف بنتي ملك جري عليها وقال

أنا آسف على كل كلمة وحشة قولتها زمان

ملك ابتسمت ومدتله إيديها وقالت

خلاص إحنا أصحاب

نجلاء بصتلي بعين كلها دموع وقالت

أنا معرفتش أربي ابني غير لما اتربيت أنا الأول

قربت مني ومدتلي ملف صغير وقالت

ده تقرير البرنامج السلوكي اللي طلبتوه

وأنا أول واحدة اتعلمت منه

بطلت أبص للناس من فوق

وبقيت أعرف إن الإنسان بأخلاقه مش بفلوسه

ابتسمت وأنا أخدت الملف

ولما راجعناه لقينا إن كريم اتغير فعلًا بشهادة كل المدرسين والأخصائيين

مجلس الإدارة وافق بالإجماع على قبوله

أول ما سمع الخبر حضن أمه وهو بيعيط من الفرحة

وسامح وقف يبص لأخته وقال

أنا رجعت أختي من جديد

بعدها نجلاء بصتلي وقالت

عمري ما هقدر أردلك اللي عملتيه معايا

أنا كنت مستنية منك انتقام

لكن إنتي ربيتي ابني بدل ما تكسريه

قلت لها بابتسامة

الانتقام بيخلق عداوة جديدة

لكن التربية بتخلق إنسان جديد

خرجنا كلنا سوا

وأولادنا كانوا بيجروا في جنينة المدرسة ويضحكوا من غير ما يعرفوا يعني إيه فرق بين غني وفقير

وقفت أبص ليهم وأنا افتكرت اليوم اللي اتسخرت فيه قدام الناس كلها

وقتها كنت أقدر أرد الإهانة بإهانة أكبر

لكن اخترت الصبر

واكتشفت إن الحقيقة مش محتاجة صوت عالي

الحقيقة كفاية إنها تظهر في وقتها

ومن يومها اتأكدت إن أغلى حاجة ممكن يملكها الإنسان مش مدرسة ولا شركة ولا ملايين

أغلى حاجة هي الأخلاق

لأن الفلوس ممكن تشتري مبنى كبير

لكن عمرها ما تشتري احترام الناس

واللي يربي ابنه على التواضع يكسب قلبه وقلب كل اللي حواليه

أما اللي يربيه على الكبر فحتى لو امتلك الدنيا كلها هيخسر أهم حاجة فيها وهي إنسانيته

تمت